ل ترکیێ و باکورێ کوردستانێ بەحسا قاشۆ پێڤاژۆیەکا نوویا چارەسەریێ تێ کرن. د ڤێ دەربارێ دە گاڤا ھەری رادیکال سەرۆکێ مەھەپێ دەولەت باخچەلی ئاڤێت. باخچەلی ب ناڤێ تفاقا جومھور داخویانیەک دا و ئەردۆگان ژی ب ھەموو ئاوایی پشتگریا خوە د ڤێ دەربارێ دە دا کەشفکر.
باخچەلی گۆت: بلا ئۆجالان وەرە پارلەمەنتۆیێ و د گرووپا دەمێ دە داخویانیەکی بدە و دەست بەردانا چەکان و هەلوەشاندنا پەکەکێ راگھینە. د ڤێ دەربارێ دە گەلەک نرخاندنێن جودا ھاتن کرن. ژ خوە پشتی ڤێ داخویانیێ قەندیل ب ئێریشا ئینتیحاری ل ئەنقەرە ب ئاوایەکی بەرسڤا داخویانیا باخچەلی دا. لێ نھا ژی، دێ جاردن ل سەر داخوازیا باخچەلی ھەڤسەرۆکێن دەمێ بچن ئیمرالیێ و ل گەل ئۆجالان ھەڤدیتنێ بکن.
دەزگەھێن دەولەتێ ئەڤە دەمەکە ل گەل ئۆجالان ھەڤدیتنا دکن. دەولەت دخوازە گرێدانا ناڤا دەم پارتیێ و پەکەکێ دە قوت بکە و ھەول ددە کو دەم ل گەل ئۆجالان تەڤبگەرە. ژ دانانا قەیوومان بگرن ھەتا ئێریشێن توند یێن ترکیێ ل باشوور و رۆژئاڤایێ کوردستانێ ل دژێ چەکدارێن پەکەکێ د چارچۆڤا ھەڤدیتنێن لگەل ئۆجالان دەیە.
سەدەمێ ڤێ ھەلوەستا ترکیێ ژ ئالیێ ئەردۆگان ڤە ب ڤەکری ھاتە دیارکرن. ئەردۆگان دا خویاکرن کو، ل ھەرێمێ گوھەرتنێن مەزن رووددن، ئیسرایل دکارە ئێریشێ ترکیێ ژی بکە. ژ بۆ ڤێ یەکێ دڤێت ئەم پرسگرێکێن د ناڤا خوە دە ژ ھۆلێ راکن و ئەنیەک ناڤخوەیی ب ھێز ئاڤابکن داکو، ئەم بکاربن ل ھمبەر ئێریشێن دەرڤە یەکتیا خاکا خوە بپارێزن.
پشتی روودانێن ترکیێ و گۆتوبێژن ژ بۆ دەستبەردانا ژ چەکان و تەسفیەکرنا پەکەکێ تێنە کرن، د جارکی دە ب ئێریشا هەیئەتا تەحریر ئەل-شام و گرووپێن ئۆپۆزسیۆنا سوری ل دژی رەژێما ئەسەد رۆژەڤ ھاتە گوھەرتن. لێ د راستیێ دە دخوەیە کو ھەردو پێشکەفتن ب ھەڤرە گرێداینە. ئەڤە دەمەک بوو ترکیێ دخوازا لھەڤھاتنەکی ل گەل ئەسەد دکر، د ئاستا وەزارەتێن بەرگری و دەزگەھێن ئیستخباراتان دە ترکیە و سووریە د ناڤا ھەڤدیتنا دە بوون. لێ ئەسەد ھەڤدیتن ل گەل ئەردۆگان قەبول نەکر و مەرجێ کو ترکیە ژ ئاخا سوری ڤەکشە ددا پێشیا ئەردۆگان. روسیا ژی پشتگریا ڤێ ھەلوەستا ئەسەد دکر.
لێ نھا ل ئدلبێ و حەلەبێ ئێریشا ژ نشکاڤە ھاتیە کرن، دخوەیە ب پشگریا ترکیێ یە. تایبەتی پشتی ئیسرایل ل لبنانێ حزبوللاھ تێکبری و ل سووریێ گەلەک جارا ئێریش برن سەر بنگەھێن لەشکەری یێن ملیسێن ئیرانێ، تەڤگەرێن کو ب وەکالەتا ئیرانێ پشتگریا ئەسەد دکرن گەلەک لاواز بوون. ئیسرایلێ پیشتگرێن رەژما سووریێ، واتە حزبوللا و ملیسێن ئیرانێ ب ئاوایەکی ژ ھۆلێ راکرن. ئۆپۆزسیۆنا سووریێ ب پشتگریا ترکیێ ئەڤ یەک وەک فرەسەندەکی زانین و ئێریشا خوە دەستپێکرن. ل ڤێ دەرێ ئیران ئەشکەرە ترکیێ تاوانبار دکە. ھەتا وەک نھا ترکیە د دەربارێ داخویانیێن ئیرانێ دە چ بەرسڤ نەدایە و بەرناما خوە بێ دەنگی ب ناڤێ پاراستنا سنۆرێن خوە رێڤە دبە.
نھا ھێزێن ئۆپۆزسیۆنێ کەتن ناڤا باژارێ حەلەبێ دە. ئەڤ یەک دبە سەدەم کو ھێزا پەکەکێ ل تل رەفعەتێ بێ دۆرپێچکرن و ل تاخێن حەلەبێ ژی رەوشا ھێزێن پەکەکێ دکارە بێ گوھەرتن. ئارمانجا ترکیێ یا سەرەکە ژی ئەوە کو، ل گۆر پێڤاژۆیا کو رێڤە دبە، پەکەکێ ب ئاوایەکی مەجبور بکە دەست ژ چەکان بەردە. ترکیە دزانە کو، ب داخوازیا ئۆجالان پەکەکە دەست ژ چەکان بەرنادە.
ب ڤێ ئێریشا گرووپا تەحریر ئەل-شام و گورووبێن ئۆپۆزسیۆنا سووریێ ل دژێ رەژێما ئەسەد تەوازن ل سووریێ تێ گوھەرتن و رۆلێ ترکیێ د ڤێ مژارێ دە خۆرتر دبە. دێ رۆژێن ل پێشیا مە ڤێ مژارێ زەلال تر بکە…
رۆژەڤاکورد
