ئارتێشا سووریەیێ دبێژە کو ڤەکشینا وێ ژ چەند ئەنیێن ل حه‌له‌ب و ئدلبێ «دەمکی»یە و ئه‌و خوە ژ بۆ ئێریشەکە بەروڤاژی ئامادە دکە.
ئارتێشا سووریەیێ ئیرۆ 30ی مژدارێ د داخویانیەکێ دە راگهاند، «د چەند رۆژێن بۆری دە، رێخستنێن تەرۆریستێن سەر ب ئەنیا ئەل-نوسرا ڤە، ب پشتەڤانیا ب هەزاران تەرۆریستێن بیانی، چەکێن گران و هەژمارەکە مەزن ژ درۆنان، ژ چەند ئالیان ڤە ئێرشەک مەزن ل ئەنیێن حه‌له‌ب و ئدلبێ پێک ئانین».
گۆت ژی: «هاتنا هەژمارا زێدە یا تەرۆریستان و بەرفرەهبوونا ئەنیێن شەر، هشت کو هێزێن مەیێن چەکدار ئۆپەراسیۆنا ژنووڤەبجهکرنێ پێک بینن، ئارمانجا وێ ژی خورتکرنا هێلێن بەرەڤانیێ، پاراستنا ژیانا سڤیل و لەشکەران و ئامادەکرنا ژ بۆ ئێریشەکە بەروڤاژییە».
فەرماندەهیا گشتی یا ئارتێش و هێزێن چەکدار تەکەز دکە کو ئەڤ تەدبیر، تەدبیرەکە دەمکییە و ئەوێ ب هەموو شێوەیان کار ژ بۆ دابینکرنا ئارامی و ئەولەهیا خەلکێ ل باژارێ حه‌له‌بێ بکە.
ئەڤ یەک د دەمەکێ دەیە، چەکدارێن دەستەیا تەحریر ئەل-شام (ئەنیا ئەل-نوسرا یا بەرێ) و هەڤالبەندێن وێ ژ رۆژا 27ێ مژدارێ ڤە دەست ب ئێریشەکێ ل سەر هێزێن رێژیما سووریەیێ ل ئدلب و حه‌له‌بێ کرنە و ئیرۆ کارین کۆنترۆلا خوە ل سەر هەژمارەکە مەزن ژ تاخێن حه‌له‌بێ فەرز بکن، بێیی هێزێن رێژیمێ بەرخوەدانەکە بەرچاڤ بکن.
