مەجلیسا سووریەیا دەمۆکراتیک (مەسەدێ) تێکلداری بوویەرێن داوی یێن ل سووریەیێ داخویانیەک دا.
د داخویانیێ دە توندوتیژیا ل سووریێ شەرمەزار کر، تەکەز کر گەلەک مەترسیدارە کو ھەیەت تەحریر ئەل-شام گەلەکی باژارێ حەلەبێ و گوندەوارێ حەمایێ بێ کو رووبروویێ بەرخوەدانێ ببن کۆنترۆل کرن.
د داخویانیێ دە بانگ ل جڤاکا ناڤدەولەتی ھات کرن کو فشارێ ل ھەموو ئالیێن چالاک ل سووریێ بکە، ژ بۆ راوەستاندنا شەر و دەستپێکرنا پرۆسەیەکا سیاسی کو ھەموو ئالیێن سووریێ تێ دە بەشدار ببن.
مەسەدە کو ترکیێ ژ شەر و پەڤچوونێن ل باکور-رۆژئاڤایێ سووریێ بەرپرسیار دبینە، بانگ ل نەتەوەیێن یەکبوویی و کۆنسەیا ئەولەکاریێ کر کو د دەربارێ رەوشا کۆچبەرێن ھەرێما شەھبایێ دە دەستوەردانا لەزگین بکن و سڤیلان ژ تاوانێن شەر، قرکرن و کۆچبەریا ب دارێ زۆرێ بپارێزن.
د بەردەوامیا داخویانیێ دە بال ھات کشاندن کو مەترسیا ئیستفادەکرنا چەتەیێن داعشێ ژ رەوشا مژارا گۆتنێ ھەیە و بانگ ل هەڤپەیمانیا ناڤدەولەتی ھاتە کرن کو د ڤێ چارچۆڤەیێ دە پشتگریێ بدە ھێزێن سووریەیا دەمۆکراتیک (هەسەدێ).
د داخویانیێ دە ھەر وھا بال ھات کشاندن سەر گرینگیا رۆلا رووسیایێ د چارەسەرکرنا کریزێ دە.
مەسەدێ دیار کر کو ئەو ژ بۆ دیالۆگا لگەل ترکیەیێ ئامادە نە و ئەڤ تشت ھاتن گۆتن:
“شەر و ناکۆکیێن د ناڤبەرا ئالیێن سووریێ دە تەنێ خزمەتا بەرژەوەندیێن دژمنێن گەلێ سووریێ دکە و ئازارا سڤیلان زێدەتر دکە. ژ بۆ ڤێ ژی دڤێت دیالۆگ پێش بکەڤە.
کورد، نەتەو و ئۆلێن دن بەشەکە گرینگا دیرۆک و ئەردنیگاریا سووریێ نە، لەوما دڤێت ھەموو بنپێکرنێن ل دژی پێکھاتەیێن سووریێ بێن راوەستاندن.
“کریزا سووریێ تەنێ ب رێبازێن سیاسی و دووری دەستوەردانێن دەرڤە دکارە وەرە چارەسەرکرن.”
مەسەدێ د داویا داخویانیا خوە دە ھەلوەستا خوەیا ل سەر پاراستنا یەکپارچەییا خاکا سووریێ و ئامادەبوونا خوە یا ژ بۆ دیالۆگێ لگەل ھەموو ئالیێن سووریێ پشتراست کر و داخوازا جیبجیکرنا بریارا 2254 یا نەتەوەیێن یەکبوویی کر.
