رەژیما ئەسەد د ناڤا 13 رۆژان دە ھلوەشی. وەک چاوا ھلوەشینا رەژیما سەدام قەدەرا باشوورێ کوردستانێ و ھەموو پارچەیێن دن گوھەرت، ھلوەشینا رەژیما ئەسەد و رەوشا سووریێ ژی دێ قەدەرا ھەموو کوردان بگوھەرینە. ژ بەر ڤێ یەکێ ھەموو کورد پێڤاژۆیا رۆژئاڤا ب بالداری دشۆپینن. ھەر کوردەک د ڤێ قۆناغێ دە یەکیتیا کوردان دخوازە.
د راستیێ دە، ژ 2011 ڤە ھەموو کورد ئەڤ 13 سالن د ھەر مەرجی دە پشتگرییا ھێزێن کوردان ل رۆژئاڤا دکن. و کوردان پشتگریەکە وسا ل رۆژئاڤا کریە کو ل چ پارچەیەکە کوردستانێ نەھاتیە کرن.
د ڤان ئالیکاریان دە، ب تایبەتی رۆلێ سەرۆک بارزانی گەلەکی بەرز و زەلال بوو. ھێژ 2012 دە، د دەمەکە کو رۆژئاڤا د بەر ئێریشێن ئەل نوسرەیێ دە ل بەر تونەبوونێ بوو، ئیدارەیا ھەولێرێ ب پێشەنگیا سەرۆک بارزانی ئالیکاریێن لەشکەری، سیاسی، دپلۆماتیک، خواراکی و پزشکی ل رۆژئاڤا کرن.
ھێ ژی رۆژئاڤا د پێڤاژۆیەکا ھەستییار دەیە کو دڤێت ھەموو کورد پشتگریێ لێ بکن. لێ ئەم نە ل سەر ئارمانجێن سیاسی و گۆتارێن ئیدەۆلۆژیکێن پەکەکێ، لێ ژ بۆ رۆژئاڤا ببە قەلایەک ژ کوردستانێ پشتگریێ دکن. ژ بەر کو پەکەکە بوویە ئاستەنگەکی سەرەکە ل بەر کوردستانیبوونا رۆژئاڤا.
رۆژئاڤا د 2012 دە ژی ھەبوو. کورد دکاریبوون رۆژئاڤا وەک قەلایەک کوردی ئاڤا بکن. لێ پەکەکێ، ل جھێ کو رۆژئاڤا وەک پارچەیەکە کوردستانێ یا ئازادکری ببینە، ئەو وەکە قادەکە قازانجەکا پارتیزانی و بۆ رەواکرنا ل سەر وێ دپلۆماسیێ بکە دیت.
پەکەکێ ل سەر رۆژئاڤا دپلۆماسی لگەل ئەورۆپایێ کر، پشتگری ژ ئیرانێ وەرگرت و ھەول دا کو لگەل حەشدا شەعبی ھەڤکاریێ بکە. پەکەکێ ل رۆژئاڤا سیاسەتەکا کوردستانی پێک نەئانی. د سینۆرێن خوەیێن پارتییێ دە مەسەلە گرت دەست. و ناڤێ رۆژئاڤا گوھەرت کر باکورێ رۆژھلاتێ سووریێ. پەکەکە ھەر رێخستن، کەسایەت و تەڤگەرەکە کو نەبوویی پێکھاتەیا پارتیا وێ، وەک دژمن، خایین و ئاژان ئیلان کر. ب دەھان سیاسەتمەدار و رەوشەنبیرێن رۆژاڤایی یێن کو رەخنە ل پەکەکێ دخوارن، کوشتن، گرتن و گەلەک ژ وان مەجبوور مان رۆژئاڤا تەرک بکن.
پەکەکێ یەکیتیا د ناڤبەرا کوردان دە رەد کر و تەڤی وێ یەکێ، نیفاق خست ناڤبەرا رێخستن و گەلێ کورد دە. رەمزێن کوردستانی ناسنەکرن. ئالایا کوردستانێ – ئالا رەنگین – وەک دژمن ھات ئیلان کرن و کەسێن کو ئالا رەنگین ھلدگرتن، وەک خایین-تەرۆریست ھاتن پێناسەکرن.
پەکەکێ ل رۆژئاڤا درۆشما “براتیا گەلان” بەرز کر، لێ ل ھەمبەری برایێن خوەیێن کورد دژمناھی کر. د گەلەک کامپ و جھان دا رێخستنێن چەپێن ترک – کو پرانیا وان سیخوورن ب جیهکرن. پەترۆلا کوردستانێ ل سەر سەرۆکێن عەشیرەتێن عەرەب دابەشکر و ژ بوودجەیا ھەسەدێ پەرە دان. ئیمتیازێن مەزن دان عەرەبان، لێ ژ کوردێن کو نە سەر ب پەکەکێ را نە مافێ ژیانێ ژی نە دا. رۆژنامەگەرێن کورد ھاتن گرتن، کانالێن تەلەڤیزیۆنێن کوردستانی ھاتن قەدەغەکرن.
پەکەکێ، رۆژئاڤا وەک سەنگەرەکی کو بکارە دەستھلاتا ھەولێرێ برووخینە دیت و بکار ئانی. دەسگەھێن خوەیێن مەدیایی وەکە ناڤەندەکی شەرێ تایبەت ل دژی باشوورێ کوردستانێ بکار ئانی. لایەنگرێن خوە ل گۆری ئارامانجێن پارتییا خوە ل دژی سەروەرییا ھەولێرێ ئاژۆت.
ب کورتی، پەکەکێ رێ ل بەر رۆژئاڤا گرت کو سەکناندنەکە کورد و کوردستانی نیشان بدە و ببە کەلھا یەکیتییا کورد.
نھا ژی رۆژئاڤا نکارە خوە ژ ڤێ رەوشێ دەرخینە. لێ ئەگەر رۆژئاڤا ل سەر بەرژەوەندیێن کوردستانی و یەکتیا کوردان خوە ژ نووڤە ئاڤا بکە، دێ بکارە باندۆرەکی ئەرێنی ل ھەموو کوردان بکە.
گەر رۆژئاڤا دخوازە پشتگریا ھەموو کوردان بستینە، دڤێت پێشی د ناڤ خوە دە ژ بۆ یەکیتیا کوردان تێبکۆشە.
دڤێت لگەل پێشمەرگەیێن رۆژ یێن کو زارۆکێن رەسەنێن رۆژئاڤا نە، بێن جەم ھەڤ. ئەنییەکی بەرگری-نەتەوەیی دامەزرینە. دڤێت پلانێن پەکەکێ یێن وەکە ھەڤکاریا لگەل حەشدا شەعبی و ئێریشێن ل سەر ھەولێرێ رەد بکە و ب زەلالی نیشان بدە کو رۆژئاڤا نە تەنێ بارەگاھێ پەکەکێ یە، بەلکو رۆژئاڤا ناڤەندەکا ھەموو کوردان نە.
