شەیخمۆس ئۆزەنگین

دیکتاتۆرییا بەعسیان و مالباتا ئەسەد ھلوەشییا. بەری 21 سالان دیکتاتۆرییا بەعس یا کوژەرێ ملەتێ کورد سەدام حسێن ژی ھلوەشییا بوو.

بەعس، ل سەر ئەساسێن نیژادپەرەستییا عەرەبان، ئایدۆلۆژییا وێ ب دەستێ میشێل ئەفلەق ڤە ھاتبوو دامەزراندن. د ھەردوو وەلاتان دە ژی بەعس، وەک حیزب ئاڤاکرنا وێ، ھاتنا وێ یا سەر دەستهەلاتێ، ب سیستەم و مەتۆدێن لەشکەری بوویە. سیفەتێن ڤان ھەردوو شاخێن بەعسی و جەهەپا کەمالیست؛ کو ل ترکییەیێ ژ دامەزراندنا دەولەتا ترکان ھەتا 1950، کو ب تەنا سەرێ خوە ب مەتۆدەک دیکتاتۆری ب رێڤە بر، دشبهن ھەڤ.

سیستەما دیکتاتۆری یا ڤان ھەرسێ پارتییێن دیکتاتۆر، کو کوژەر و داگیرکارێن خاکا کوردستانێ نە؛ ب برۆکراسییەک لەشکەری ھاتنە مەشاندن و ھەر ل پشت وان ھێزا ملیتاری وەک پارێزڤان و گارانتۆر جیھ گرتییە.

موستەفا کەمال سەرلەشکەرەکە، حافز ئەسەد لەشکەرە، سەدام حسێن لەشکەرە. ھەرسێ قاتل و دیکتاتۆر ژی، ب کودەتایێن لەشکەری و ھەلوەستێن ئەمر واقعی دەستهەلات گرتنە دەستێ خوە و ل ئانگۆرا دیکتاتۆرییا گرووپەکا بچووک ل سەر تەڤاھییا وەلاتێن کو د بن دەستێ وان دەیە دیکتاتۆرییا خوە مەشاندنە.

بێ شەنسییا کوردان ئەوە کو د دابەشکرنا خاکا کوردستانێ دە، سێ بەشێن کوردستانێ کەتنە بن دیکتاتۆرییا ڤان ھەرسێ سیستەمێن ملیتاری و دیکتاتۆریان. ڤان ھەرسێ دیکتاتۆرییان ژی ل سەر کوردان مەتۆدێن نەمرۆڤانە و بقرێژ بکار ئانینە. ئینکار کرنا ھەبوونا ملەتێ کورد و خاکا کوردستانێ، کۆمکوژی، کۆچبەری، سورگوون، ئشکەنجە-زیندان، ئاسیمیلاسیۆن و گوھەرتنا دەمۆگرافییا کوردستانێ ئەساس گرتنە. خوەستنە کو بالانسا ناڤ ملەتێ کورد تێکببن و رێ ژ بۆی ژھۆلێ راکرنا ملەتێ کورد ڤەبە، کو کورد وەندا ببن.

ل سەر خاکا د بن دەستێ ڤان ھەرسێ سیستەمێن دیکتاتۆریال، جینۆسایدکار و بەربەر دە چار زیندان ھاتنە ئاڤاکرن، کو د ئاستا جیھانێ دە، ب وەحشەت و بەربەرییا خوە ئەڤ زیندانە د ئاستەک بلند دە نە. د ڤان زیندانان دە ھەر جوورە میتۆدێن نەمرۆڤانە ھاتنە بکار ئانانین.

دییاربەکر، زیندانا نەمرۆ 5!

ب میتۆد و ستراتەژییا کو ل سەر گرتییێن کورد د ڤێ زیندانێ دە ھاتییە مەشاندن، د قادا جیھانی دە دەهەمین زیندانە. ئەڤ زیندان، بژارە، ژ بۆنا میتۆدێن کو دێ ل سەرانسەرێ باکورێ کوردستانێ، ل سەر کوردان بێن مەشاندن، وەک سیستەمەک ھلبژارە ھاتییە مەشاندن. ب میتۆدەک مەترسیدار د ناڤ کوردان دایە! ب سەدان گرتی سەقەت، جانگۆری و ب ھەست و دەروونییا خوە بریندار ژ ڤێ زیندانێ دەرکەتنە.

ئیران، زیندانا ئەڤینێ!

ئەڤ زیندان ژی، زیندانەک ژ رووپەلێن روورەشییێ یا مرۆڤاتییێ یە. ھەتا نھا پر کێم کورد، بەلووچ ژ ڤێ زیندانێ ساخلەم دەرکەتنە. یا داربەستا وان، یان ب دەروونییەک خراب، یان ژی سەقەت. ڤێ زیندانێ ژی وەک زیندانێن دن یێن ل بەشێن دن یێن کوردستانێ، رۆلەک مەترسیدار کو ملەتێ کورد پێ چاڤترساندی بکە، ھاتییە مەشاندن و پرۆپاگاندا زلم و زۆردارییا وێ ل ھەرچار بەشێن کوردستانێ دەنگ دایە!

ئیراق، زیندانا ئەبوو غورێب!

میتۆد و بەربەرییا کو دیکتاتۆرییا سیستەما بەعس و سەدام ل ڤێ زیندانێ، ل سەر کوردان جەرباندییە و دایە مەشاندن، دشبهە زیندانێن بەشێن دن یێن کوردستانێ. ب ھەر جوورەیی دەستدرێژییا ل سەر گرتییێن کورد (ژن و مێر) ھاتییە مەشاندن، وەحشییەتەک مەزنە کو ھێژایی ئەم ب چاڤەکی پیسپۆری، بالداری ل سەر ڤێ و ڤان زیندانان راوەستن. کرن و میتۆدێن ڤان دیکتاتۆرییان دەرخن ئاستەک زانستی و د ھشمەندییا خوە یا ملی دە بجیھ بکن.

سوورییە، زیندانا سێدنایا!

ب سالانە کوردان، ل سەر گرتییێن باشوورێ رۆژئاڤایێ کوردستانێ و زیندانێن دیکتاتۆرییا بەعس پرتووک، نڤیس و شانۆ نڤیساندنە. چاوا ھاتنە گرتن، چاوا ھاتنە وەندا کرن، یێن کو ساخ مانە، مالباتێن وان چاوا ھێڤییێن خوە ژ ساخییا وان برینە. ب دەھان سالان بێ دادگەھکرن، بێ لێپرسین، د بن ئیشکەنجێ و دەستدرێژییێ دە، د ڤان زیندانێن کۆر و تازی دە مانە.

پشتی ھلوەشاندنا سیستەما بەعس، زیندانێن ل سوورییەیێ ژی ڤەبوون. بەربەرییەک کو مرۆڤاتی ژ بەر خوە شەرم دکە دەرکەت بەر مە. مرۆڤێن کو 30-40 سالان د ڤێ زیندانا کو سێ قاتا دبن ئەردێ دە، تەنێ د ناڤ ئاڤا جۆکێن پیس دە، گرتییێن کو ھش و ھشمەندییا خوە وەنداکرنە، عەیبا مرۆڤاتییێ یە. گرتییێن کو ددان د دەڤێن وان دە نەمانە، ھشێ خوە وەندا کرنە، عەیبا مرۆڤاتییێ نە، یەک ب یەک.

ب ناڤێ ھەتەشێ (ھەیەتا تەحریر ئەل شام)، د 8/12/2024 دە شام گرت دەستێ خوە و دیکتاتۆرییا بەعس ھلوەشییا. ئەڤ تەڤگەر تەڤگەرەک ئیسلامیست و سووننەیە. ھەتا نھا کریارێن وێ ل ھەنبەر پێکھاتەیێن ئۆلی و ملی یێن ل سەر ئاخا سوورییەیێ نەرم دەرباس دبە. دەرییێ زیندانێن بەعس ڤەکرن و گرتی ئازاد بوون.

سەرۆکێ ڤێ ھەیەتێ ئەحمەد ئەل-شەرع کو وەک (ئەل-جۆلانی) ژی دهێت بناڤکرن. د دەرحەقا کوردان و پێکھاتەیێن سوورییێ دە ڤان گۆتنان دبێژە:

کوردان قەست دکە و دبێژە: “وان ژی وەک مە زلم دیتیە. خوەدێ ئزنێ بدە ئەم دێ لگەل کوردان ل گەل ھەڤ ژییانا خوە بدۆمینن. ھەر کەس دێ ل گۆر یاسایان مافێ خوە بدەست بخە. گەلێ کورد وەکی بەشەک ژ نیشتیمان و ھەڤبەشێ سووریەیا پێشەرۆژێیە. ژ ڤرا شووندە ل سەر کوردان زلم بداوی تێ.”

ئەم دێ بشۆپینن و ببینن کا دێ ئەحمەد ئەل-شەرع خوەدییێ گۆتنا خوە بە یان نا!

لێ دییارە ئەحمەد ئەل-شەرع نە تەنێیە و ل پشت ستراتەژییا ھەیەتا تەحریر ئەل شام ئەو ھێزێن کو ھەرێما رۆژھلاتا ناڤەراست ژ نووڤە دیزاین دکن ھەنە. ل سەر ساحێ ژی دەولەتا ترک خوە ل سەر ئاخا سوورییەیێ دەردخە پێش. ژ کوردان رە ئەڤ جیھێ مەترسییێیە.