ل ترکیێ پێڤاژۆیەک بێ ناڤ برێڤە دچە. ئینسییاتیف ب تەمامی د دەستێ دەولەتێ دەیە. دخویە تشتا کو، دەولەت دخوازە دێ ئۆجالان بکە. واتە ئۆجالان وەک باخچەلی دایە کەشفکرن بانگا پێویست دکە. لێ ترکیە دخوازە دەما گونجاو ڤێ داخویانیێ ب ئۆجالان بدە کرن.
دەولەت پشتی بوویەرێن سورییێ و گوھەرتنێن چێبووین ژ بۆ بەرژەوەندیا خوە پیچەکێ پێڤاژۆیێ دەرەنگ تێخە. ژ بەر کو دەولەت ب دو رێیان ڤێ پێڤاژۆیێ برێڤە دبە. یەک ژێ ژ ئالیەکێ ڤە ھەول ددە قەندیلێ ژ تاقەتێ بێخە و گەلەک لاواز بکە دا کو ناچار ببن داخوازیا ئۆجالان بپەژرینن. ژ بۆ ڤێ ل ھمبەر وان ئۆپەراسیۆنا دکە .
دویەم ژی ھەول ددە پێوەندیێن نەرم لگەل کەسێن د ناڤا دەمێ دە کو، سیاسەتا ئۆجالان برێڤە دبن بەردەوام بکە. د سەرێ ڤێ پرۆژەیێ دە پارلەمەنتەرێ دەمێ و جگرێ سەرۆکێ پارلەمەنتۆیا ترکیێ سری سوورەیا ئۆندەر ھەیە. ھەروەھا پەروین بولدان ژی د ھەمان خەتێ دەیە.
وەک دن تایبەتی پارلەمەنتەرێن دەمێ یێن چەپێن ترک و یێن عەلەوی پتر ب قەندیلێ ڤە گرێدایینە و ب دژواری ھەول ددن کو نەھێلن ئەڤ پێڤاژۆیە بگھە ئەنجامەکی.
بوویەرێن ل سووریێ و رۆژئاڤایێ کوردستانێ رووددن د بەرژەوەندیێن ترکیێ دە نە. ترکیە ژی ڤێ یەکێ گەلەک ب زانەبوون ب کارتینە.
پەکەکە ل سەر دوریانەکێ یە، یان ئۆجالان یان قەندیل. ھەر ئالێ گرێدایێ پەکەکێ دێ دەمەک نێزیک دە ناچار ببە ڤێ هەلبژارتنێ بکە.
یا کو ژ بۆ کوردان گرینگە د ڤێ پێڤاژۆیێ دە: پەکەکە دەستێ خوە ب ھەموو ئاوایی ژ رۆژئاڤایێ کوردستانێ بکشینە و ئەڤ یەک بێ ئەشکەرە کرن. دا کو ل رۆژئاڤایێ کوردستانێ کورد بکاربن یەکدەنگیەکێ د ناڤ خوە دە پێکبینن و وەک کوردێن رۆژئاڤایێ کوردستانێ ژ بۆ بەرژەوەندیێن خوەیێن نەتەوی تەڤبگەرن.
رۆژەڤاکورد
