خوە ژ حیزبایەتیێ دوور بگرن، ھەتا رەوشا سووریێ زەلال دبە، سیاسەتا کوردایەتیەکا بەرفرەھ بکن. ھەموو د بن سیوانا کوردستانی دە سیاسەتێ بکن. ژ حیزبایەتیێ و ناکۆکیێن ناڤخوەیی دوور بسەکنن. ھەر تشتی ل ئالیەکی بھێلن و بەر ب پێشەرۆژەکە رۆناک ڤە ھەرن.
سەرۆک بارزانی ئەڤ گۆتنە بەرییا 12 سالان، د 28ێ چلەیا 2012ێ دە گۆتبوون. ئەڤ گۆتن وێ دەمێ و ئیرۆ ژی راستن.
تەڤگەرا سیاسی یا بارزانی و تەکۆشینا رۆژئاڤا ھەر تم مل ب ملێ ھەڤ بوونە و ھەر تم پشتگری دانە ھەڤ. سەرۆک مەسعوود بارزانی ئەڤ کەڤنەشۆپیا تەڤگەرا بارزانی پاراست و بەرژەوەندیا رۆژئاڤا ھەر تم ل بەر چاڤ گرت. ژ بەر ڤێ یەکێ ژی گەلێ رۆژئاڤا تەڤگەرا بارزانی، پارتی و سەرۆک بارزانی ھەر تم ھەمبێز کر. ھەتا سالا 1996، خەلکێ رۆژئاڤا ل قامشلۆ وھا پێشوازی ل سەرۆک بارزانی کر.
دەما پێڤاژۆیا بھارا عەرەبی ل سووریێ ژی دەست پێ کر، سەرۆک بارزانی ھەموو دەرفەتێن خوە یێن سیاسی، دیپلۆماتیک، ئابۆری و لەشکەری ژ بۆ رۆژئاڤا پێشکێش کرن. نە تەنێ ژ بۆ تەڤگەرێن سیاسی یێن کو نێزی پەدەکێ بوون، ژ بۆ وان تەڤگەرێن سیاسی یێن نێزی پەکەکێ ژی ھەموو دەرفەت ئافراندن. ھەولێر ژ بۆ ڤان ھێزان بوو ناڤەندەکا دیپلۆماتیک و سییاسی. سەرۆک ژ وان رە گۆت “ئەڤ دەر مالا وەیە”.
سەرۆک بارزانی سێ شیرەت ل رۆژئاڤا کرن: “یەکیتیێ چێکن، ل سەر ناسنامەیا کوردی تەڤبگەرن، ژ رەژیما ئەسەد دوور بکەڤن.”
و ژ وان رە گۆت: خوە موحتاجی چ حکوومەتان نەکن، وەرن ئەز چ پێدڤی بە دێ بدم وە. تەنێ ژ بۆ کو ئەم راستی پرسگرێکەکە یاسایی نەیێن، ئەم سینۆری چێکن. لێ تشتەک روو بدە ئەڤ دەر یا وەیە. کەنگی ھوون وەرن ھوون نە مێڤانن، خوەدیێ مالێ نە.
سالا 2012 رۆژئاڤا و پەکەکە د گەلەک ئاستەنگیان دە دژیان و ژ بەر ڤێ یەکێ خوە نێزی پەدەکێ کرن، ژ ھەموو دەرفەتان سوودمەند بوون. پەکەکە ژ بۆ کو خوە مەشرووع بکە و سوود وەرگرە، رۆژئاڤا ژ خوە رە کر قوربان. بەرژەوەندیێن خوە ئەساس گرتن. پەکەکە چوو لگەل رەژیما سووریێ و ئیرانێ ھەڤکاری کر. رۆژئاڤا ژ ھەموو موخالفێن سووریێ دوور خست. و ژ رۆژئاڤا دەست ب ئێریشێن دەستکەفتیێن باشوور کرن، د ناڤ خەلکێ دە تۆڤێ نەیارتی چاندن. شوونا کو باشوور و رۆژئاڤا ببن یەک، وان رۆژئاڤا وەک سەنگەرەک بۆ دژیتیا بارزانی و باشوور کوردستانێ ب کار ئانی.
وان چ قاس دژمناتی ژی کرن لێ بەلێ سەرۆک بارزانی دیسا ژی پشتەڤانییا رۆژئاڤا کر. سەرۆکی ژ بۆ رۆژئاڤا گاڤێن مەزن ئاڤێتن:
– 11 تیرمەھا 2012 پەیمانا ھەولێرێ کو ل رۆژئاڤا پێکڤە تەڤگەرێ ئەساس دگرت ھات ئیمزەکرن.
– 23 جۆتمەھا 2014 پەیمانا دھۆکێ ھات ئیمزەکرن.
– گەر ھەردو پەیمان(دھۆک-ھەولێر) هاتبان جێبەجێکرن، ئیرۆ رەوشا سووریێ و رۆژئاڤا گەلەک جودا دبوو.
سەرۆک بارزانی ژ بۆ پاراستنا کۆبانێ گاڤەکا مێژوویی هاڤێت و پێشمەرگە شاندن رۆژئاڤا. نە تەنێ پێشمەرگە شاندن، ھێزێن ھەڤپەیمان ژی رازی کرن کو پشتگرییا رۆژئاڤا بکن. واتە ھێزێن ئەمەریکی و هەڤپەیمانان ب هاندان و شیرەتا سەرۆک بارزانی چوون رۆژئاڤا. سەرۆک بارزانی ل تەکۆشینا ل کۆبانی خوەدی دەرکەت و ل بەر چاڤێ دنیایێ گۆت “سلاڤان ل شەرڤانێن کۆبانێ دکم.”
سەرۆک ھەر تم ژ بۆ پاراستنا رۆژئاڤا ئامادە بوو: سالا 2015 ژ بۆ پێشمەرگە گۆت: “چاوا کو ھوون گەلێ ھەرێمێ دپارێزن، ھوونێ برایێن مەیێن ل رۆژئاڤا ژی بپارێزن، ئەو ژی ئەرکەک پیرۆزە.”
سەرۆک نە تەنێ کەسێن سیاسی پاراستن، ژ بۆ گەل ژی دەرفەتێن ژیانێ ئاڤاکرن. سالا 2012 مەھا تەباخێ دەریێ سێمالکا ڤەکر و ب سەدان ھەزار خەلک ھاتن باشوور. سەرۆکی ل کامپان ساردانا گەلێ رۆژئاڤا کر و گۆت “ئەڤ دەر مالا وەیە، ھوون نە مێڤانن، ھوون خوەدیێ مالێ نە.”
سەرۆک بارزانی ئۆپەراسیۆنا ل سەر عەفرین و سەرێکانیێ ژی وەک داگیرکەری دیت و ھەلوەست نیشان دا. راستەراست بانگ ل رایەدارێن ئەمەریکی کر و خوەست کو ئەو ژ رۆژئاڤا دەرنەکەڤن.
ئەڤ کورتە مێژوو ژی بەسە کو وەرە دیتن کا سەرۆک بارزانی چقاس پشتگریا رۆژئاڤا کریە. لێ مخابن پەکەکە و باسکێن وێ یێن رۆژئاڤا، دیتنێن سەرۆک بارزانی ھەر تم بەرەڤاژی ڤەدگێرن، دەما کەتن تەنگاسیێ ژی بانگی سەرۆکی کرن. لێ نەھشتن ئەڤ دیتنێن سەرۆک بارزانی ل رۆژئاڤا بکەڤن ژییانێ. ب سیاسەتا کانتۆن، ژنۆلۆژی، خوەسەری، پارادیگما و گۆتنێن وسا رۆژئاڤا بەر ب ئالیەک خەتەرناک ڤە برن و ژ بۆ خوە کرن ئاموورێن رانتێ. لێ ئیرۆ د ئەنجامێن روودانان دیرۆکێ پەسەندکر کا ھەلوەستێن سەرۆک بارزانی چقاس راست بوون. ئەم دکارن بێژن دیتنا سەرۆک بارزانی ل سووریێ و رۆژئاڤا سەرکەت.
سەرۆک بارزانی د تەکۆشینا خوە دە دو داگیرکەرێن کورد بن دەست خستن: سەدام حسێن و بەشار ئەسەد. د ھلوەشاندنا ھەر دو داگیرکەران دە سەرۆک بارزانی خوەدی رۆلەک سەرەکی بوو. ئەگەر سالا 2011 خەتا سەرۆک بارزانی ل رۆژئاڤا بھاتا مەشاندن، سەرکەفتن ئیرۆ مسۆگەر بوو.
ئەڤ کەسێن کو ب راستی وەلاتپەروەرن و دخوازن کورد ل رۆژئاڤا ببن خوەدیێ مافێن خوە، ڤێ دەمێ دڤێت ببینن کو سەرۆک بارزانی 13 سالان پشتگریا رۆژئاڤا کریە و ژ ڤر و پێ ڤە ژی ب تەجرووبە، پێشبینی، نێرین و کەڤنەشۆپیەکا مەزن دیسا ئەو دێ پشتگریا رۆژئاڤا بکە.
