سەرۆکێ ئەنجوومەنا نشتمانییا کورد ل سووریێ (ئەنەکەسێ) سلێمان ئۆسۆ ب باس نیوسێ رە هەڤپەیڤینەک ئەنجامدا، د ڤێ هەڤپەیڤینێ دە زانیاریێن گرنگ دەربارێ رەوشا نھایا رۆژئاڤایێ کوردستانێ و دانووستاندنێن وان لگەل ھێزێن سووریەیا دەمۆکراتیک و رێڤەبەریا رۆژئاڤا دە پێشکێش کرن.
سلێمان ئوسۆ راگهاند، 13 سالن پەیەدە-پەکەکە ژ مە رە دبێژن خایین، ناڤەندێن مە دشەوتینن و ناھێلن یەکیتی چێببە.
سلێمان ئۆسۆ دیار کر: “ئەنەکەسە ژ بۆ یەکگرتن و یەکتی و پێکڤەژیانا گەلێ کوردستانێ ل رۆژئاڤایێ کوردستانێ پشتی سالا 2011 و دەستپێکا شۆرەشا سووریێ دە ھات ئاڤاکرن. ئەم وەک ئەنجوومەن تێکەلی وێ شۆرەشێ بوون و ھەلوێستێ مە دەربارێ چارەنڤیسا پاشەرۆژا سووریێ دە دیار بوویە. مە رەد کریە کو ئەم دەست بخن ناڤ دەستێ رەژیما سووریێ، ژ بەر کو دیکتاتۆرەک نکارە ت تشتەکی بۆ گەلێ خوە بکە و ب تایبەت ژی گەلێ کوردستانێ. ژ بۆ وێ ژی دەما مەترسی ل سەر ناڤچەیێن کوردان چێبوو، رەژیما سووریێ ئەو ناڤچە هەموو رادەستی پەیەدێ کرن، ژ بەر وێ ژی مە وەک ئەنجوومەنێ کار کر، ژ بۆ یەکرێزیێ، ئەم نەراوەستان ژ بۆ یەکگرتنێ. مە پەیوەندی ب پەیەدێ کر کو بێن بەشداری ڤێ ئەنجوومەنێ ببن و بچن بۆ ئوردنێ بۆ گۆتووبێژان. پشترە مە داخوازا یەکگرتنێ ل وان کر و 3 رێکەفتن ب سەرپەرەشتیا سەرۆک بارزانی ل ھەولێر و دوھۆکێ ھاتن کرن. مخابن ھەموو رێکەفتنان دە پەکەکێ فشار ل سەر پەیەدێ پێکانی و پێبەندی رێکەفتنان نەبوون.”
ھەروەھا راگەھاند: پشترە بنکەیێن مە شەوتاندن و مافێن کوردان بنپێ کرن، گرتن، لێدانا ئەندامێن مە و رێگریا ل کار و چالاکیێن مە کرن. مە سێ مەھ بەری نھا ژ بۆ ئازادکرنا ئەندامێن خوە خوەپێشاندان کر، لێ خەلکێ رۆژئاڤایێ کوردستانێ باش دزانن چ ل مە کرن و چاوا ب ئاگر و ئاسنی ل دژی مە راوەستان. ئەزموونێن مە ل گەل وان رێکەفتنان ھەیە. د سالا 2020 دە ب سەرپەرەشتیا ئامەریکایێ مە رێکەفتن کر، پشتی رێکەفتنێ بنکەیێن مە ژ ئالیێ پەکەکێ ڤە ھاتن شەوتاندن.
سەرۆکێ ئەنەکەسێ راگەھاند: “ژ بۆ دەستپێشخەریا ئاشتی و گۆتووبێژێ دڤێت زەمینەسازی ھەبە، رۆژانە گرووبا جوانێن شۆرەشگەر یا سەر ب پەکەکێ بنکەیێن مە دشەوتینن. ھەر خوەپێشاندانەکا مە ھەبە بەردبنە جانێ مە و ب کەڤران سەرێ ئەندامێن مە دشکینن. مە گەلەک کار کریە ژ بۆ یەکرێزیا گەلێ کوردستانێ، کو ئەم نەبن سەدەمێ تێکدانێ. ئیرۆ سووریە د قۆناخەکا نوو دەیە، رەژیم ھلوەشیایە، لێ نھا مەترسیا مەزن ل سەر گەلێ مە ھەیە. ئەنەکەسە ل سەر دو ئاستان کار دکە، یەکەم چاوا ئەم گەلێ خوە بپارێزن؟ ئیرۆ مەترسیەکا مەزن ل سەر گەلێ مەیە و ب تایبەت ژی ل کۆبانێ هەیە. بەهانەیا وان ھەبوونا پەکەکێ یە. کارێ مەیێ سەرەکی ئەوە ئەم وێ مەترسیێ ژ ھۆلێ راکن و بەھانەیێن وان گرووبان ژ دەست وان دەربێخین. یا دویەم ژی ژ بۆ یەکرێزی و یەکدەنگیێ ئەم ئامادە نە. لێ ئەو ژی ب دو رۆژان پێکنایێ، نھا یا گرنگ خالا یەکەم دڤێت ئەم جێبجێ بکن ئانکو بەھانەیا ھەبوونا پەکەکێ دڤێت نەمینە. پشترە دڤێت ئەم وێ مەترسیا ل سەر گەلێ خوە دوور بخن. ئەم وەک ئەنەکەسە نوونەرتیا گەلێ کورد دکن و ناکەڤن بن ت فشار و ترساندنەکی.”
