بابێ جەنگۆ

ل سەر بەختێ ئاژانسا ئانھا بە، دبێژن ئەندامێ ھەڤسەرۆکاتییا پەیەدێ و قەراسەیێ زلامان ئالدار خەلیل، دیار کریە کو پێڤاژۆیا نوو دێ پێشەرۆژا سوورییێ دیار بکە و بانگ ل ھەموو ئالییێن سوورییێ کریە کو داخوازێن دەمۆکراسی، وەکھەڤی و ئازادییێ ل بەر چاڤان بگرن و دەست ب گۆڤەند و دیلانەک دەمۆکراتیک بکن.

ئالدارێ مە بەحسا گەلەک تشتان کریە، شۆرەش و مۆرەش، پێشەرۆژ و پاشەرۆژا سوورییێ و گەلەک تشتێن دن. ێ ھەلبەت رۆلا کو رێڤەبەرییا خوەسەر ئەسەد ل سەر لنگان ھشتیە و نەھشتیە کو سوورییە پارچە ببە ژی ژ بیر نەکریە.

ل گۆر فتنە و فەسادێن باژارێ قامشلۆ دبێژن، ئالدارێ مە ژ بۆ ئاژانسا ئانھا گۆتیە:

ب سەرێ من و وە، ب شەش تەلاقێن ژنبەردانێ، رێڤەبەرییا خوەسەر سووریا ژ پارچەبوونێ پاراستیە و دپارێزە. رێڤەبەرییا خوەسەر میناکا چارەسەرییا ئالۆزییێن ل سوورییێ یە. ژ بەر کو نیەتا وێ یا جودابوونا ژ سوورییێ تونەیە و پرەنسیبێن وێ نەتەوی نە (نەتەوا سوورییێ)، رێڤەبەرییێ د ڤی واری دە خوە ئیسپات کریە. دبە کو د پرۆژەیێن دن دە ترسا پارچەبوونا سوورییێ ھەبە، لێ پرۆژەیا رێڤەبەرییا خوەسەر مە ژ مەترسییێن پارچەبوونێ دوور دخە. ئەڤ یەک ژی بنگەھێن یەکیتییێ ل سوورییێ خورت دکە” و سمبێلێن خوە با دانە.

بەلێ، سەرۆکەک ژ سەرۆکێن سەرئەرد و بن ئەردیێن نەتەوا سوورییێ خالێ وە ئالدار خەلیل، ژ بۆ ئاژانسا ئانھا جارەک دن سەپاندیە کو وان نەھشتیە کو سوورییە پارچە ببە و ئیرۆ ژی ناھێلە و ناخوازە. ئالدارێ مە د سوورییەیا نوو دە بەحسا دەمۆکراسی و ئازادیا شەخسی کریە، بەحسا نەتەوا سوورییێ کریە، لێ ھەبوونا نەتەوا کورد، مافێن نەتەوا کورد ژ بەریکا خوە دەرنەخستیە و ڤەشارتیە.

ئەز سەرێ وە نەێشینم، بەشار ئەسەد بێی سەبەب رۆژئاڤا ب تەڤ چەک و سیلەحان ئەمانەتی وە نەکر براکۆ. ئاھا ژ بۆ ڤان رۆژان ھوون خوەدی کرن ھا. ژ بۆ سوورییەیەکا یەکگرتی، ل دژی خواستەکا مافێن نەتەوی و ژ بۆ مافێن تاکەکەسی و شەخسی.

ێ دە خوەدێ کەریم و رەحیمە براۆ…

ھەر بزنەک ب لنگێ خوە تێ دالقاندن. ھەلبەت دێ رۆژەکێ دەوران بگوھەرە و کورد ژی دۆزا مافێن خوەیێن نەتەوی بکن و خەلاس..

قامشلۆ