بووبێ ئەسەر
ئەم وەکە سیاسەتمەدار و رەوشەنبیرێن گەلێ کورد دزانین و مە خوەندیە کو لۆزانا یەکێ چاوا پێک ھاتبوو. ئەم باش دزانین کو ژ وێ رۆژێ و ھەتا نھا گەلێ کورد ل ھەمبەر ھەمی زۆر و زەحمەتیان چاوا د بەر خوە دایە، ددە و ژناڤ نەچوویە.
ئارمانجا لۆزانا یەکێ ئەو بوو کو کوردان د سەد سالان دە ل ھەر چار پەرچێن کوردستانێ تونە بکن. وان د ناڤا خوە دە ئاسیملە بکە “بشێڤە” دا کو کورد نەمینن. ژ بەر کو دھات زانین کو ھەگەر ھەتا سەد سالان کورد تونە نەبن، ئێدی دێ دۆرا ماف پێدانا وان هێت.
لۆما ژی داگیرکەرێن مە ھەموو میتۆدێن ھۆڤانە ب کار ئانین دا کو کوردان ب تەمامی تونە بکن. لێ ب سەرنەکەتن. قەتلیعام و کۆمکوژیێن مەزن ئەنجامدان. ئەنفال و بۆمبەیێن ژەھرێ ل ھەمبەر کوردان ب کارئانین، دیسا نەکاریبوون کوردان ژناڤ ببن.
ملەتێ کورد ب ھەموو ھێز و قاوەتا خوە ل بەر خوە دا. کۆچبەری و قرکرن، وێرانی و کوشتنێ ئەو ژناڤ نەبرن. لۆما کورد ھەر ل سەر لنگێن خوە مان و بەر خوە دان.
زیندانا دیاربەکرێ یا ب ناڤێ 5 نۆلییێ ڤەکرن. رێبەر، سەرۆک و کادریێن (کادرۆ) رێخستنان گرتن ھند کوشتن، ھند ژی ب برینداری کرن زیندانێ. د وێ زیندانێ دە تشتێن ئانین و دانین سەرێ گرتیێن کورد یێن سیاسی ل ڤێ جیھانێ نەھاتیە سەرێ چ ملەتان.
لۆما ژی ڤەکرنا وێ زیندانێ بوو سەدەما بێدەنگکرن و تەسلیمبوونا ھند ژ کادرێن پارتیێن سیاسی کو بێ مۆرالی خستە دلێ وان. لۆما ژی ئەو عەگیدێن کو شووری سمبلێن وان نەدبری، پرانیا وان پشتی ژ زیندانێ دەرکەتین، بێ دەنگ بوون یان خوە بێدەنگ کرن.
زمانێ ب زۆرێ ل وێ زیندانێ ب وان دابوو ئەزبەرکرن و ئاخافتنێ، پشتی بەردانا ژ زیندانێ ئەو زمان بوو زمانێ مالێ یێ گەلەک ژ وان قەھرەمانێن وێ زیندانێ.
پرۆژەیا ھەر چار داگیرکەران یا کو کورد ھەما ھەما قەداندبوون، ب گولەیا شۆرەشا ئیلۆنا 1961 کو ب سەرۆکاتیا بارزانیێ نەمر دەستپێ کر، کورد ژ وێ مرنێ ئازاد کرن. بەرخوەدان و سەرھلدان ژ نوو دە ھەما ل ھەر چار پەرچێن کوردستانێ دەستپێ کر.
شۆرەشا ئیلۆنێ کورد ژ مرن و تونەبوونێ ئازاد کرن. ھەتا کو باشوورێ کوردستانێ گەھاند ئازادیا وێ. ژ بەر ڤێ بوو کو داگیرکەران ژی پشتی وێ ئازادیێ رەنگ و دەنگێن خوە، ھەلوەست و نەرینێن خوە گوھەرین و فێم کرن کو دێ نکاربن کوردان ب شەری ژناڤ ببن.
لۆما رێخستنا خوەیا کو ب ناڤێ پەکەکێ دامەزراندبوون، ژ نوو دە ب رێ و رێبازێن دن خستە حەرەکەتێ. ل سەر دەستێ وان قاشۆ شۆرەشەک ل باکورێ کوردستانێ پێک ئانیبوون. لێ وێ شۆرەشێ(!) ئارمانج و داخوازا داگیرکەرێن ترک ئانی جھ. ھەول دان کو ل پەرچێن دن ژی وەکە باکورێ کوردستانێ ل سەر دەستێ پەکەکێ لێ ب ناڤێ جودا کوردان تونە بکن. ب سەرکەتن و نھا ئەو موسیبەت بوویە بەلایا سەرێ کوردێن رۆژئاڤایێ کوردستانێ. لۆما نکارن یەکتیەکا نەتەوەیی پێک بینن. ل سەر داخوازەکا نەتەوەیی لگەل دەستھلاتا نوو روونێن دا کو ھندەک مافێن کوردان بێنە چارەسەرکرن.
نھا گرانی دانە باکورێ کوردستانێ. ل ور لگەل پارتیا پەکەکێ یا لەگال ئانگۆ ئەشکەرا، دخواخزن وەکە لۆزانا یەکێ بکن و نھا ئەو پرۆژە ھێدی ھێدی پێک تێ. لێ مخابن پارتیێن کوردستانێ ل ھەمبەر ڤێ بێدەنگن. خەتەرا ڤان ھەڤدیتنێن تێنە کرن ژ بۆی ملەتی ئەشکەرە ناکن.
ھەگەر ئەم ل رەوشا باکورێ کوردستانێ یا نھا بنێرن، ئەم دێ ببینن کو لۆزانا دویەمین ل سەر داخوازا باخچەلیێ خوەدیێ کۆمارا ترکیێ، ل بەر جێبەجێکرنێ یە. ئەو باخچەلیێ کو بەرێ ژ بەر ب کارئانینا ناڤێ کوردان دین و ھار دبوو کو ئیرۆ ل گۆر ل ھەڤکرنا وی و عەڤدللا لۆزانا دویەمین پێک تێ.
بالا خوە بدنێ قاشۆ دەم پارتییا کوردانە. لێ د ڤێ پێڤاژۆیا ژ باخچەلی دەستپێکرییە پارتیا دەمێ ژی ل گۆر داخوازێن وی تەڤدگەرە. ھەڤدیتنا لگەل عەڤدللا ب رێیا عەرەبەک و ترکەکی کەمالیست پێک ھات. دەم دخوازە ژ بلی کوردان و پارتیێن وان، سەرەدانا ھەمی پارتیێن داگیرکەران بکە. نەرین و دیتنێن وان بگرن دا کو بکاربن ل گۆر داخوازا وان زانەبوون و فەقیێن خوە حازر بکن کو وان ب قەندیل و بەشێ ئەورۆپا رە ژی بدە قەبوولکرن. ژ خوە پشتی قەبوولکرنا عەڤدللا کەسێن کو ل دژی دەرکەڤن دێ تونە بن. ( مخابن کورد نزانن عەڤدللا ساخە یان مرییە. لێ ھەر تشت ل سەر ناڤێ وی تێکرن)
ب ڤی ئاوایی دێ لۆزانا دویەمین پێک بینن کو ھەتا سەد سالێن دن دێ کورد ئێدی ل باکورێ کوردستانێ نەمینن. ژ خوە بنگەھ و ئەساسێ ڤێ، ژ رۆژا پەکەکە دامەزراندبوون، حازر کربوون. ئێدی پرانیا نڤشێ نوو کو لگەل پەکەکێ مەزن بوونە، ب کوردی نزانن و ژ بۆنا فێربوونا زمانی ژی، نەما خوە دوەستینن. دەما ملەتەکێ زمانێ خوە ژ بیر کر ئەو ملەت ئێدی ژناڤ دچیت.
ل ھەمبەر ھەموو پلان و پرۆژەیێن دەولەتێ و پەکەکێ مخابن پارتی و رێخستنێن مەیێن باکورێ کوردستانێ ژی بێدەنگن. تو دبێژە قەی ئەو ل وەلاتەکی دن دژین و ھای و بالا وان ژ ڤان پلان و فەقێن ل ھەمبەر ملەتێ مە تێ ئامادەکرن و ڤەکرنێ تونەیە.
چاوا کو د دەما لۆزانا یەکێ دە پرانیا عەشیر، ئاغا و ئێلێن کوردان بێ دەنگ مان کو ئێشا وێ، ملەتێ کورد ھێ ژی دکشینە. نھا ژی ھەمی پارتی و رێخستنێن مە ل گەل پرانیا رەوشەنبیران ل ھەمبەر ڤێ پرۆژەیا لۆزانا دویەمین بێدەنگن.
ھم بێدەنگن. ھم ژی نکارن ب ھەڤرە ئەنیەکا نەتەوەیی ژ بۆنا چارەسەرکرنا کێشەیا گەلێ خوە دامەزرینن. ل سەر ناڤێ وێ، بکەڤن ناڤ دیپلۆماسیا ناڤنەتەوەیی. دەست ب چالاکیێن بێ توند و تیژیێ بکن. ب ڤێ ژی دەنگێ گەلێ خوە و پرۆژەیا لۆزانا دویەمین بگەهیننە دەولەتێن ئەورۆپا و ئەمەریکایێ کو بێژن ڤایە ئەم ژی ھەنە.
ب دەنگەکی بلند بێژن، کێشەیا گەلێ کورد ل باکورێ کوردستان نەیا پەکەکێ و پارتیێن وێ یێن ئەشکەرەنە. بێژن ڤایە ئەم ژی ھەنە. لێ مخابن بێدەنگین…
دڤێت دەنگ دەرخن و بێژن: ئەم ل سەر ناڤێ گەلێ خوە دخوازن بکەڤن ناڤا کار و دیپلۆماسیێ. فێم ناکن کو ب ڤێ بێدەنگیێ دێ نکاربن ببن دەنگێ گەلێ خوە. وەھا خویا دبە کو دێ ل سەر دەستێ پەکەکێ مەسەلەیا گەلێ کورد ل باکورێ کوردستانێ بێ کو مافەکی بدن، دێ ل گۆر خوە و ل گۆر بەرژەوەندیا ترکیێ چارەسەر بکن.
سیاسەتمەدار و پارتیێن کوردستانی ھەموو دکن گازی و ھاوار کو دڤێت یەکتیا کوردان ل رۆژئاڤایێ کوردستانێ پێک بێ. لێ ھەزار مخابن ئەو ب خوە نە یەکن. ژ بۆنا بکاربن باندۆرەکێ ل سەر رۆژئاڤایێ کوردستانێ بکن، دڤێت بەرێ ئەو ب خوە یەک بن…
شیار بە گەلێ کورد! تەڤگەرێن پارتیێن کوردستانی، ھوون ھەتا سەد سالێن دن ژناڤ دچن. پیچەکێ ل خوە ڤەگەرن و رۆژەکێ بەری رۆژەکێ یەکتیا خوە پێک بینن دا کو دۆست و دژمن ژی ئێدی حەسابێ بۆ وە بکن…
