سەرۆکێ گشتییێ پارتیا ئازادی ئایەتولاھ ئاشیتی ژ ئاژانسا ئانفێ یا پەکەکێ رە ئاخڤی و د دەربارا رەوشا رۆژئاڤا ده هن نرخاندن کرن و گۆت: «ئالیێن باس ل براتیا گەلان دکن پڕ شاشن. بەرێ کورد ب براتیا ئومەتێ هاتن خاپاندن و ژ دەولەتەکە سەربخوە بێ پار بوون، ئیرۆ ژی ب ئاخافتنێن وەکە براتیا گەلان تێن خاپاندن».
د هەڤپەیڤینا خوە یا ب ئانفێ رە، سەرۆکێ گشتی یێ پارتیا ئازادی ب ئاوایەکی نەراستەراست پەکەکە رەخنە کر و راگهاند:
«ئالیێن باس ل براتیا گەلان دکن پڕ شاشن، نابە وەکە کو چەوا بەرێ کورد ب براتیا ئوممەتێ هاتن خاپاندن و ژ دەولەتەکە سەربخوە بێ پاربوون، ئیرۆ ژی ب ئاخافتنێن وەکە براتیا گەلان بێن خاپاندن. دەما هنەک دەولەتێن نەتەوی د دنیایێ دە ژ هنەک نەتەوەیان رە هەبن و هنەک ژی مەحرووم بن و مرۆڤ ببێژە براتیا گەلان و براتیا ئینسانی، ئەڤ تشتەکی نەراستە، ئەڤ تشتەکی غەلەتە، تشتەکی شاشە، مرۆڤ پێشی ببە وەکە هەڤ ئێدی مرۆڤ وێ براتیێ ئاڤا بکە».
سەرۆکێ گشتییێ پارتیا ئازادی هه‌روها گۆت: «ل سووریێ سوود وەرگرتنا ژ دەرفەتان ئیرۆ د سەدسالا پێش مه دە کوردستانا سەربخوە یە، گەر کورد بزانبە ژ دەرفەتێن کو ئیرۆ ل رۆژئاڤا هاتنه پێش سوود وەرگرە، د سەدسالا بێ دە ل رۆژئاڤا وێ کوردستانا سەربخوە وەرە ئاڤا کرن».
هەر وەها گۆت: «ستراتەژیا ب باندۆر ئەڤە کو پڕرەنگی و یەکرێزی بێ ئاڤاکرن، ئەگەر ستراتەژیەکە ھەڤپار بێ مەشاندن، گەلێ مەیێ ل سووریەیێ ل گەل ھەموو جھرەنگی، باوەری و ئەتنیکی دکارە ل ھەڤ کۆم ببە و باندۆرێ ل رەوشا سووریەیێ بکە و د ناڤا دەولەتێن نەتەوی دە وێ جهێ وان چێببە، وێ قیمەتێ وان چێببە، پۆزسیۆنا ساخلەم ئەڤە کو ب یەکرێزی پشتگرییا هێزێن لەشکەری بێ کرن، د حالێ حازر دە کورد ل سووریەیێ خوەدی ھێزەکە لەشکەری نە. ئەگەر کوردێن ل سووریەیێ پشتگریێ بدن ڤێ ھێزا لەشکەری ب وێ واتەیێ تێ کو پۆزسیۆنەکە ساخلەم بێ گرتن و ل گۆرێ وێ دێ دیسا قەدر و قیمەتێ وان و جهێ وان د خاکا سووریەیێ دە هەبە».
دەرس وەرگرتنا ژ دیرۆکێ
ئایەتولاھ ئاشیتی راگهاند، ژ بۆ کوردان گەلەکی گرینگە کو دەرس ژ دیرۆکێ بێ وەرگرتن. دڤێ گەلێ کورد شاشتیێن د دیرۆکێ دە ھاتنە کرن ب ھەر ئاوایی بنرخینە، دەرسێ ژ ڤان شاشتیان وەربگرن و ھەمان شاشتیان دوبارە نەکن. میناک، د سەدسالا دەرباسبوویی دە کورد ژ بەر کو ئۆلدار بوون ل پەی ھەستا براتیا ئۆلی کەتن و شەنسێ بوویینا دەولەتێ ژ دەست دان. د ڤێ مژارێ دە گەلەک شیرۆڤە دکارن بێنە کرن، لێ بەلێ ب کورتاسی دکارم ڤێ ببێژم: «براتیا ئۆلی کەت پێشیا دەولەتبوونا نەتەوی یا کوردان، ئەڤجا ئیرۆ ژی هنەک جامێر براتیا ئینسانی دبێژن، وەکهەڤییا گەلان دبێژن..هود گەرەک ئەڤ شاشتی ئیرۆ نەیێ کرن، یانی وەکهەڤی.. بلا دەولەتا کوردان چێببە، ئێدی د ناڤا دەولەتێن دنیایێ چ ژ وان رە هەیە و د چ ئاستێ دە نە، کورد ژی ب وێ ئاستێ ب وان رە موخاتەب ببن، یانی دەما هنەک دەولەتێن نەتەوی د دنیایێ دە ژ هنەک نەتەوەیان رە هەبن و هنەک ژی مەحرووم بن و مرۆڤ ببێژە براتیا گەلان و براتیا ئینسانی، ئەڤ تشتەکی نەراستە، ئەڤ تشتەکی غەلەتە، تشتەکی شاشە، مرۆڤ پێشی ببە وەکە هەڤ ئێدی مرۆڤ وێ براتیێ ئاڤا بکە».
پێشخستنا نەرین و دیبلۆماسیا هەڤپار ب خەباتێن هەڤپار و شەفاف مومکینە
سەرۆکێ گشتیێ پارتیا ئازادی تەکەز کر، پێویست دکە گەلێ کورد ل سووریەیێ هەموو ب هەڤ رە د هۆندرێ شەفافیەتێ دە ڤەکری، نە ب دزی و نە ب پیلان ل پشت پەردا، هەموو پلان و ستراتەژیان ب هەڤ رە چێکن، ب ئاوایەکی شەفاف و ڤەکری ژ هەر کەسی رە، ژ بەر کو ب یا من یەک ژ سەدەمێن خیانەتا د ناڤا کوردان دە یەک ژێ ئەڤە کو شەفافیەت تونەیە، دەما کو شەفافیەت هەبە، وەسوەسە ناکەڤە ناڤا دلێ مرۆڤان، خاینتی و بێ بەختی ژی چینابە، خوەدێ مللەتێ کورد ژی وەکە هەر مللەتەکی دن ئێ دنیایێ سەرفیراز بکە.
ئەڤ داخویانیا سەرۆکێ گشتییێ پارتیا ئازادی د دەمەکی دە یە کو پەکەکە ب تەڤ ریخستن و پارتیێن سەر ب وێ ڤە بانگا براتیا گەلان دکە و ب ت ئاوا باس ل دروستکرنا دەولەتەکە سەربخوە ژ بۆی کوردان ناکن، هەر که‌س و ئالیەکی کو باسی دەولەتەکە سەربخوە ژ بۆی کوردان دکە وەکە سیخور و خایین ب گەل ددن ناسکرن.
یا راست کا چاوا ئۆسمانیان ب خاپاندنا «براتیا ئوممەتێ» ل چاناککالەیێ خالا لاوازا کوردان ئانکو باوەرمەندییا ئیمانێ ئیستسمار کرن، مستەفا کەمال ژی ھەمان فێل بکار ئانی و د ناڤبەرا سالێن 1919-1923 دە ب گۆتنا «دەولەتا ھەڤپار یا کورد-ترک» دەولەتا نەتەوەیا ترک یا یەکگرتی ب ئالیكاریا کوردان ئاڤا کر. ڤێ جارێ ژی ترک ب ئالیکاریا پەکەکێ، ب خاپینۆکا «ئنتەر ناسیۆنالیزم، کۆمارا دەمۆکراتیک» ھەمان لیستکێ ل ھەمبەر کوردان دلەیزن. د بنیاتێ خوە دە ئارمانجا «براتیا ئوممەتێ» یا کوردان یا ل چاناککالە و ساکاریایێ و ئارمانجا «کۆمارا دەمۆکراتیک» یا پەکەکێ خزمەتا ھەمان تشتێ دکە، ئانکو ئارمانجا ترکبوونێ. دەما ئەم ل ئارمانج و ئامرازێن سیاسی یێن پەکەکێ دنێرن، مرۆڤ دکارە ڤێ راستیێ پر ب زەلال ببینە.
