پاشەرۆژا سووریێ ھێژ نە دییارە!

د سەر رەڤا دیکتاتۆرێ سوورییەیێ رە مەھەک دەرباس بوو. دیکتاتۆرەکی دەست بخوین و زالم بوو. ئەڤ دیکتاتۆر ھات گوھەرتن. مخابن تەنێ گوھەرتنا دیکتاتۆرەکی ب سەرێ خوە نایێ واتەیا “شۆرەشەک”ێ!

شام ب ئۆپەراسیۆنەک ئیستیخباراتی کەت دەستێ هەیئەت تەحریر ئەل-شام. ل سوورییێ تەنێ سەرۆکاتی ھاتییە گوھەرتن. ھەموو بنگەھا ھێزێن دەولەتێ، ئارتێش، ئیستیخبارات و برۆکراسییا دەولەتێ دناڤ دە، تێت پاراستن. تشتێ کو د 8/12/2024 دە ل سوورییێ بوو، تێکچوونا ھێز و دەولەتێن کو پشتگری ددان رەژیما سوورییەیێ بوو. ئەسەد تەسفییە بوو. واتە سەرۆکێ سوورییەیێ ھات گوھەرتن.

کی بوون ئەڤ ھێزە؟

7ێ جۆتمەھێ، بوو پێنگاڤا گوھەرتنا ھەرێمێ ب خوە. شەرێ کو د ناڤبەرا حەماس و ئیسرایلێ دە دەستپێ کر، د ئەسلێ خوە دە شەرەکی د ناڤبەرا رەژیما ئیسلامیستا ئیرانێ و ئیسرایلێ دە بوو. ھەموو پرۆکسیسێن ب سەر ئیرانێ (حەماس، حزبوللاھ، حووسییێن یەمەنێ، ملیسێن ئیرانی یێن ل سوورییەیێ، حەشدی شەعبی) ڤە بەشداری ڤی شەری بوون. ب بەشداربوونا حزبوللاھێ، شەری لبنان ژی گرت ناڤ خوە و د ڤی شەری دە پشتا حەماس و حزبوللاھێ شکەست. رەژیما سوورییەیێ، وەک بنکەیا ڤان ھێزێن وەکالەتێ بوو ئارمانجا ئیسرایلێ. رەوشا ئیران و بەرەیا ئیسلامی ل ھەرێمێ ئالۆز بوو و بەر ب شکەستنێ ڤە چوو. بریارا گوھەرتنا رەژیما سوورییێ ب لەز دەرکەت ھۆلێ!

خوەدی بریاران، ب رێکا هەیئەت تەحریر ئەلشامی، ب ئۆپەراسیۆنەکا ئیستیخباراتی ئەسەد مەجبوور کرن کو ژ شامێ دەرکەڤە و ئەسەد رەڤییا چوو روسیایێ. شام کەت دەستێ ھەتەشێ. ئەڤ ھات واتەیا تێکچوونا ھەموو ھێزێن وەکالەتێ و پشتگرێن رەژیما سوورییەیێ. رووسییا، ئیرانێ، رەژیما سوورییەیێ و ھەموو ھێزێن بەرەیا ئیسلامی، کو د بن ستراتەژییا شۆرەشا ئیسلامی دە بەشداری شەری دبوون ل سوورییەیێ تێک چوون.

د ڤێ گوھەرتنێ دە ترکییێ خوە ئاڤێت ئۆرتێ. وەک کو خوەدییێ ئۆپەراسیۆنا گوھەرتنا دەستھلاتدارێن شامێ ئەو ب خوە نە تەڤدەگەرییان. لێ د ئەسلێ خوە دە نەراستە. دەما کو ئەڤ گرووپێن ھەتەشێ ل دەردۆرێ ئدلبێ د بن دۆرپێچەکێ دە ھاتبوون ئیزۆلە کرن، پیدڤیتیا وان ب ترکییێ ھەبوو. لێ پشتی کو شام گرتن دەستێ خوە ئەو ئیزۆلاسیۆن ل سەر ھەتەشێ نەما. ئیمکانێن تێکلییێن ب دەرڤە رە بەرفرەھ بوو. ئەو مەجبوورییەتا لگەل ترکییەیێ ژی بداوی ھات. ترکییە، مینا کو خوەدییێ سوورییەیێ یە تەڤدگەرە. لێ د ئەسلێ خوە دە نە وھایە! کو ھەتەشە، پرۆسەیاکا ترکییەیێ بایە، نھا ئارتێشا سوورییەیێ و ئیستیخبارات تەسفییە ببوو. دەمەکی نە وەک کو ترک خوە دهاڤێن ئۆرتێ یە.

ھێزا ل سوورییەیێ، کو د دەستێ ترکییەیێ دە مایە ئارتێشا ملی یا سورییەیێ یە. ترکییێ، ڤێ ھێزێ ل ھەنبەر کوردان بکار تینە. ئەڤ ھێز، ھەتا نھا د ناڤ ھەتەشێ دە ب فەرمی جیھ نەگرتییە. ب جارەکێ دە ل گۆر ئەجیندەیا ترکییەیێ تەڤدگەرن.

ل سوورییەیێ نھا رەوش چیە؟

لگەل رەڤا ئەسەد، ئیسرایل پاراستنا ئەسمانی، چەکێن بالیستیک و یێن گران یێن سوورییەیێ %86 ژھۆلێ راکرییە. د دەستێ ئارتێشا سوورییەیێ دە %14 چەکێن گران مانە. د ڤێ رەوشێ دە ل شامێ ئیستیقرار تنەیە. رەوشا ھێزێن کو دناڤ ھەتەشێ دە جیھ دگرن پر تەڤلیھەڤە.

ل ھەرێمێ ئیسرایلێ رێبازا خوە گوھەرتییە.

بەرێ ئیسرایل ل گۆر نییەتا دەولەتێن دژمنێن ئیسرایلێ تەڤدگەرییا. نھا ل گۆر شیانێن وان یێن شەری تەڤدگەرە. ئیسرایل، ب شیانێن وان یێن شەری ڤە ئەلاقەدارە. ئەڤ ژی گوھەرتنا رێبازا ئیسرایلێ یا ل ھەنبەر دەولەتێن ھەرێمێ ب خوەیە.

ئیسرایل، ھێزا کو ھەری پر د دەرحەقا شامێ دە خوەدی ئاگاھییە. د ڤردە یا گرینگ ئەوە کو دێ ئیسرایل ڤان ئاگاھییێن ئیستیخباراتی لگەل کیژان دەولەت و ھێزان پارڤەبکە!

ئیسرایل، ل سوورییەیێ ژ ھێلا لەشکەری دە بسەر کەت و نەتیجە ژی گرت. نھا ژی دخوازە کو کورد و دورزی ل شامێ دەستێ وان خورت ببە، ژ بەر کو پشتگرێ کورد و دورزییایە و ھەبوونا دەستخورتبوونا کورد و دورزییان ل شامێ، دەستێ ئیسرایلێ ژی خورت دکە.

ھەتەشە دخوازە تێکلییێن خوە لگەل دەولەتێن کەنداڤێ و رۆژئاڤاییان دەینە و لگەل وان بخەبتە. بەرێ ل ھەرێما ئدلبێ تەجرید و مەحکوومی ترکان بوون. لێ پشتی کو شام گرتن دەستێ خوە، ئەو مەحکوومییا وان یا پەیوەندیێن لگەل ترکییەیێ ژ ھۆلێ رابوو. ئێدی ساحا وان ئا پەیوەندییان، دەرییێ برحرێ ژ بۆی وان چێبوو. ئەز باوەرم ئەڤ ئاڤانتاژە، دێ پەیوەندیێن ھەتەشێ لگەل ترکان ب سینۆر بکە.

ھەرێمێن کو نھا د دەستێ ھەسەدێ دە نە، ب هاندان و پشتگرییا ئەمەریکا چێبوویە. دێ ئەمەریکا ناڤبەرا کوردان و ھەتەشێ چێکە. ئەندازیارێ ڤی کاری ئەمەریکایە. ھەتەشە د پەیوەندیێن لگەل کوردان دە پر دیقەت دکە. ناخوازە لگەل گرووپان شەری بکە، داھاتەک د ڤی شەرێ ناڤ گرووپان دە تنەیە. زوو ب زوو دێ ھەتەشە نێزیکی شەرێ لگەل کوردان نەبە.

دێ ھەتەشە ل گۆر دیتنا ھێزان تەڤبگەرە. لھەڤھاتن و شەر ئیحتیمالا ھەردوویان ژی %50 یە. کو د ناڤبەرا ھەتەشێ و ھەسەدێ دە شەر دەرکەڤە، دێ گەلەک خوین برژە.

ئەمەریکا زوو ب زوو نێزی هەڤپەیمانیەکا لگەل پەکەکێ نابە. ئەز دکارم بێژم د ئەجیندایا ئەمەریکا دە لگەل پەکەکێ ئاڤاکرنا فەدەراسیۆنەکێ ل سوورییەیێ تنەیە. دێ د ڤی واری دە ھەسەدە و ھێزێن دن یێن کورد بکار بینە. د ئەجیندایا ھێزێن سەر ب پەکەکێ دە لگەل کوردان خەباتا ژ بۆنا کورد و کوردستانێ تنەیە. د دیرۆکا پەکەکێ دە تفاقەک لگەل کوردان ژ بۆنا کورد و کوردستانێ ئاڤا نەبوویە. لگەل ھەر جوورە ملەت و گرووپان رێکەفتن مەشاندنە، لێ لگەل ھێزێن کوردان ئەڤە نەبوویە.

نھا باندۆرا ڤێ ئەجیندایێ ل باشوورێ رۆژئاڤایێ کوردستانێ ژی دمەشە. پەکەکە ناھێلە ھێزێن رۆژئاڤایێ کوردستانێ، لگەل کوردان نێزیکی ھەماھەنگییەک بھەڤرە خەباتێ ببن. ناھێلە کو کوردێن رۆژئاڤایێ کوردستانێ لگەل ئیسرایلێ ژی پەیوەندیێن خوە دەینن. ئەڤ ژی دەستێ کوردان ل شامێ لاواز دکە.