د 11ێ چلەیێ دە پەکەکێ ل پاریسێ مەشەک ژ بۆی بیرئانینا ساکینا جانسز و هەڤالێن وێ یێن هاتین قەتلکرن، لدار خست. د ڤێ مەشێ دە دەرزەک د دیرۆکا پەکەکێ دە هات چێکرن، ل پێشییا مەشێ وێنەیێ مەزلووم عەبدی جی گرت، پەکەکە ت جاری ژ دەرڤەیی ئۆجالان و کەسێن ژیانا خوە ژ دەست دایین وێنەیێ کەسەکی دن بکارنائینە، د مەشێن پەکەکێ دە هەموو سلۆگان و وێنە ب رەنگەکی ناڤەندی تێن دیارکرن، راکرنا وێنەیێ مەزلووم عەبدی ژی بریارا هەڤبەشا رێڤەربرییا پەکەکێ بوو، سەبەبێ ڤێ بریارێ ژی ئەڤ بوو کو پێویستییا پەکەکێ ب مەزلووم عەبدی و رۆژئاڤا هەبوو ژ بۆی کو بنکەفتنا خوە پێ بنوخمینە.
پەکەکێ ل باکورێ کوردستانێ تەڤاهی سەنگەرێن خوە یێن لەشکەری ژ دەست دانە، جیهێن کو پەکەکێ ب هەرێمێن پاراستنا مەدیا ژی بناڤ دکرن ژ دەست دانە، پەکەکەیا د بن ئیدارەیا جەمیل بایک دە پشتی سالا 2013 بووبوو ئاموورەکی ئەجیندایا ئیرانێ، پاشکەتنا سیاسەتا ئیرانێ ژ بۆی پەکەکێ شۆکەک چێکر، د نها دە ژی د دەستێ پەکەکێ دە ب تەنێ شەنگال و دەردۆرێن سلێمانیێ مانە. پەکەکە نها دزانە ئەڤ ژی دێ ب ئاوایەکی دەم درێژ ژێ رە نەمینە، لۆما داکو بکاربە خوە ژ ڤێ بنکەتنێ خلاس بکە، پەکەکە دخوازە کاریزمایا مەزلووم عەبدی ژ بۆی خوە وەکە ماسکەیەکێ بکاربینە، پەکەکێ د تەڤاهییا دیرۆکا خوە دە ژ دەرڤەی ئۆجالان و هن ئەندامێن خوە یێن دامەزرینەر رێ نەدا ت کەسەک دەرکەڤە پێش، هەتا د قادا سیاسی یا لەگال “ل گۆری یاسایێ راست و درست” دە ژی رێگری ل کەسێن وەکە عۆسمان بایدەمیر و سەلاحەتین دەمیرتاش کر و ئەو ژ سیاسەتێ پەراوێز خستن.
پەکەکێ قەبوول نەکر مەزلووم عەبدی ژی دەرکەڤە پێش، هەتتا سالا 2021 پۆستێ فەرماندارییا گشتی یا هەسەدێ ژی ژ وی وەرگرت، لێ بەلێ ئامەریکایێ ئەڤ یەک قەبوول نەکر، مەزلووم عەبدی سەرەرای پەکەکێ ب پشتەڤانییا ئامەریکایێ و وەلاتێن رۆژئاڤا کاریزمایا خوە ب دەست خست، ئەڤ دەرزا کو د ناڤا پەکەکێ دە ب ناڤێ مەزلووم عەبدی چێبووی گاڤەکا دیرۆکی یە، ئەگەر مەزلووم عەبدی نەکەڤە د ناڤا ئەجیندایا ڤەشارتی یا پەکەکێ و د رۆژئاڤا دە بکاربە هەموو کوردان هەمبێز بکە و لگەل رێڤەبەرییا هەرێما کوردستانێ د ناڤا هەڤکاری و یەکیتیێ دە تەڤ بگەرە ئەوێ بکاربە د رووپەلێن دیرۆکێ دە رۆلەکی باش بلیزە، هەگەر وەها نەبە و نەکاربە چەمبەرێ پەکەکێ بشکینە، ئەوێ وەکە ئاگرێ پیشی زوو بڤەمرە، ئێدی بریارا مەزلووم عەبدی ب خوەیە، یان ئەوێ ببە کادرۆیەکی پەکەکێ، یانژی وێ ببە پێشەنگەکی تەکۆشینا رەوایا کوردان.
