بووبێ ئەسەر
زەلالی وەکە ژ ناڤێ وێ ژی دیارە کو دڤێت مرۆڤ، ئینسان، رەوشەنبیر، سیاسەتمەدار، نڤیسکار و ھتد د نەرین و دیتنێن خوە دە زەلال بن. لۆما ژی دڤێت بەرێ مرۆڤ خوە زەلال بکە. گۆتن و کریارێن خوە، پەیڤێن خوە ل گۆر وێ بێژە یان بکە.
مرۆڤێن زەلال وەکە زێرینە. لۆما ژی پەیداکرنا وان ھم زەحمەتە ھم ژی ژ بۆنا کەسێن وەھا مرۆڤ دڤێت ھندەک زەحمەتیان بکشینە دا کو وان پەیدا بکە. شیرەت و گۆتنێن وان گوھداری بکە دا کو مرۆڤ د زەلالیا خوە دە شاشی و کێمانیان نەکە.
ژ ھەر تشتەکی رە زەلالی دڤێت. لۆما شەرتێ ھەبوون و ژیانێ یەک ژێ زەلالییە. دەما کو تو زەلال بی، تو دێ بکاری ل ھەمبەر ھەمی نەزەلالیان زەلالیێ پەیدا بکەی. ھەلبەت ئەڤە کارەکی زۆر و زەحمەتە. ژ خوە خوەشی و زەلالی د زەحمەتیان دەیە.
ئیرۆ د ناڤا کوردان و ب تایبەتی د ناڤا کوردێن باکورێ کوردستانێ دە ئەڤە نەمایە یان گەلەکی قەلس بوویە. ژ بەر کو دەم و دەورانا ئیرۆ بوویە شۆلیکرنا ھەر تشتەکی کو زەلالی نەمینە.
ل سیاسەتا باکورێ کوردستانێ یا پشتی 12 ئیلۆنێ 1980 بنێرن کو ئەو سیاسەتا پاقژ و زەلال چقاسی گوھەرییە. ھەلبەت ھەمی جوورە گەھەراندن ژی ب دەستێ مرۆڤان پێک تێن. لۆما دەما سەرۆک و رێڤەبرێن پارتی و رێخستنان نە زەلال بن، ل گۆر نە زەلالیا خوە پارتی یان رێخستنێن خوە شەکل ددن دا کو پرانیا ئەندامان ژی وەکە وان تەڤبگەرن.
ژ بەر کو د سیاسەتا کوردان دە سەرۆک ھەر تشتە، لۆما ژی ئەو سەرۆک ل گۆر زەلالی یان نەزەلالیا خوە شکلی ددە پارتیا خوە ژی. ژ بەر ڤێ یەکێیە کو ئیرۆ پرانیا پارتیێن کوردستانێ ژی د فکر و رامانێن خوە دە، د لڤ و تەڤگەرێن خوە دە نە زەلالن. ژ بەر ڤێیە کو ھندەک سەرۆک و پارتیێن باکورێ کوردستانێ گاڤەکا وان ل با پەکەکێ و گاڤەک ژی ل با کوردستانیانە. ئەڤ نە زەلالی ژی تەڤگەرا سیاسی ل باکورێ کوردستانێ شۆلی ئانکو گەمار دکە.
ژ بۆنا کو مرۆڤ زەلالیێ پەیدا بکە یان د پارتی و رێخستنان دە وێ ببینە، دڤێت مرۆڤ بەری ھەر تشتی خەتا وان یا ل ھەمبەر پەکەکێ و دەولەتێ ب زەلالی ببینە. بێی ڤێ زەحمەتە کو مرۆڤ پیڤانەکێ دەینە.
ئەو خەتا کو خوە نێزیکی پەکەکێ کرییە یان دکە نە خەتا نەتەوەیی و کوردستانییە. پترین کەس و پارتیێن خوە نێزیکی پەکەکێ کرنە یان دکن ژ بەر بەرژەوەندیێن چەند پرتێن نانی یان کورسیانە. کەس یان پارتیێن ب دووڤ نان یان کورسیان ژی بکەڤن، ھوون باوەر بکن ژ وان چ تشت دەرناکەڤە. ژ بەر کو کی نان و کورسی بدە وان دێ ھەر ب وی ئالیدە برەڤن.
ژ بۆنا ئەم ل باکورێ کوردستانێ ببن ھێز و قاوەتەکا نەتەوەیی، دڤێت ئەم تەنھا ل سەر رێیا پاراستنا بەرژەوەندیا گەلێ خوە بن. پێویستە ئەم و پارتیێن مە د ھەر واری دە زەلال بن.
ژ بەر کو زەلالبوون، ئیستیقرارێ ددە مرۆڤان و ھەبوونا مرۆڤان. زەلالبوون باوەریێ ددە وان کەس و پارتیێن ژ بۆنا گەلێ خوە دخوازن کار و خزمەتەکێ بکن.
چ دەما زەلالی تونە بە دێ دەلالی ژی پەیدا نەبە. ژ بەر ڤێیە کو دڤێت ژ بۆنا کار و تەکۆشینا ئازادیا وەلاتێ خوە، بەرێ ئەم زەلال بن و ل گۆر وێ ژی پارتی و رێخستنا خوە ژی ب وێ زەلالیێ بخەملینین دا کو کارێ راست و ئەرکێن پیرۆز واتەیا خوە ببینن.
ب سالانە کو ژ بۆنا زەلالی نەکەڤە ناڤا مە، داگیرکەران کار کرنە کو تم سەرێ مە نە زەلال بە. ھەلوەستێن مە نە دەلال بن. فکر رامانێن مە ژی نە پاقژ بن.
گەلەکی گرینگە کو ھەتا ئەم خوە زەلال نەکن ئەم دێ نکاربن ب زەلالی و دەلالی کار و خزمەتا گەلێ خوە بکن.
لۆما دبێژم: ھەر دەستپێکەکێ داویا وێ ھەیە و داوی ئانینێ ژی دەستپێکەکا وێ ھەیە. پەکەکێ ب شەرێ کوردان و کوشتنا کوردان دەستپێکر. ژ بۆنا کوردان ژ وێرانی و مالوێرانیێ پێڤە چ فەیدا وێ ل کوردان نەبوو. ژ بەر کو پەکەکە ل سەر دەستێ دەولەتا کوور یا ترکان، ژ بۆنا تێکبرنا بەرژەوەندیێن کوردان ھاتبوو دامەزراندن.
د تەکۆشینا خوەیا ل دژی بەرژەوەندیا کوردان یا چل سالان دە گەلەک ئارمانج و داخوازێن داگیرکەران پێک ئانی. ئارمانجا دامەزراندنا پەکەکێ ئەو بوو کو ل سەر روویێ ڤێ جیھانێ چ ھێژاییێن کوردان نەھێلن. لێ پرانیا کوردان د ڤی واری دە نە زەلال بوون.
ژ بەر ڤێ بوو کو د شەرێ خوەێ وێرانیا ژ بۆنا کوردان دە، ھندەک قۆناغێن ھێژا ژ بۆنا داگیرکەران ب دەست خست. لێ ئێدی دەم و دەوران گوھەری و د سەد سالان دە داگیرکەران ملەتێ کورد وەکە گەلەک نەتەو و کێمنەتەوەیان نکاریبوون بقەداندنا.
ئارمانج ژ دامەزراندنا پەکەکێ ئەو بوو کو بەری پەیمانا لۆزانێ یا سەد سالان ب داوی وەرە، کوردێن کو داگیرکەران نەکاریبوون وان ژناڤ ببن ئانگۆ د ناڤا خوە دە تونە بکن. خوەستن کو ل سەر دەستێ پەکەکێ وێ بکن. لێ ئەڤ پلان ب ئازادیا باشوورێ کوردستانێ تێک چوو.
ب ڤێ تێکچوونێ داگیرکەرێن مە و ب تایبەتی داگیرکەرێن ترک مەجبوور مان کو خوە بگوھەرن. نھا دخوازن ب گوھەراندنەکا ب فەن و فووتان دیسا کوردان بخاپینن. ب رێیا پەکەکی کو چ داخوازا وێ یا ژ بۆنا بەرژەوەندیا کوردان تونەیە، پەیمانەکە نوو ب وان بدە ئیمزەکرن کو ترک و کورد برانە.
لێ ڤێ پێڤاژۆیێ چاوا دەستپێکر و چاوا ب رێڤە دبن ھێ ژی نە زەلالە. لۆما د تشتێن نە زەلال دە چ جاران زەلالی چێ نابە. ھەگەر کورد زەلال بن دێ ببینن کو نەزەلالیا ڤێ پێڤاژۆیێ بەر ب کو دە دچە. ئاھا ژ بۆنا ڤێ دڤێت کورد بەرێ ئەو ب خوە زەلال بن.
ئێدی دەم نە ئەو دەمە و کورد ژی نە کوردێن بەرێ نە. ئیرۆ ھندەک دەولەتێن مەزن ژ بەر بەرژەوەندیێن خوە بوونە دۆستێن کوردان کو ئەڤ ژ بۆنا مە پر باشە. ژ بەر کو د ناڤا دەولەتان دە براتی و دۆستانی تونەیە. تەنھا بەرژەوەندی ھەنە کو ئەو ژی ھەرکەس وێ ل گۆر خوە ب کارتینن.
ھەگەر ئیرۆ ژ نشکاڤە باخچەلی بوویە دەمۆکرات(!) ھوون بزانبن کەشتیا کو ترکیێ تێدەیە، ئاڤێ دکشینە. رۆژ ب رۆژ ئەو کەشتی بن ئاڤ دبە. خەلاسیا وێ د دەستێ کوردان دەیە. باخچەلیێ کو ئەڤ باش فێم کرییە دخوازە دیسا ژ نوو دە کوردان ب شیعارا ترک و کورد برانە بخاپینە.
ئێدی دز و خوەدیێ مالێ ب ھەڤ حەسیانە. لۆما ژی ئێدی خاپاندنا کوردان زەحمەتە. پەرچەبوون و تێکچوویانا داگیرکەران ل بەر دەرییە. لێ ھەزار مخابن کو ئیرۆ یەکرێزیا کوردان تونەیە. ئەنیەکا نەتەوەیی کو بکاربە تەماما کوردێن باکورێ کوردستانێ تەمسیل بکە ھێ ژی پێک نەھاتیە. ئەو ژی ژ بەر کو کورد د نەرین و دیتنێن خوە دە نە زەلالن.
ئەڤ تونەبوون ژی تەمەنێ داگیرکەران درێژ دکە. لێ تالیا تالی کورد دێ ب سەرکەڤن. ژ بەر کو ئەو خوەدی نیڤدەولەتەکێ نە. خوەدیێ خوە رێ و رێبازەکێ نە. خوەدیێ خوە و سەرۆکەکێ وەکە رێزدار مەسعوود بارزانی ل پشتا تەماما کوردانە.
ژ بلی ڤێ ئیسرایل، فرانسا و ئەمەریکا ژی ئیرۆ دۆستێن کوردانە. لۆما ئازادی و سەرخوەبوونا کوردان نە زێدە دوورە. ھەگەر ئەم کورد ژی ئەرکێن خوە بینن جھ ئەڤ دەم و زەمان دێ ب دلێ مە بە. ژ بۆنا وێ ژی دڤێت ھەرکەس خوە زەلال بکن.
