ل هەولێرا پایتەختا هەرێما کوردستانێ هەڤدیتنەکە گرینگ پێکهات. سەرۆک بارزانی و فەرماندارێ گشتی یێ هەسەدێ مەزلووم عەبدی جڤیان و پەیاما یەکیتیا کوردان دان. ئەڤ هەڤدیتن بۆ خالەک کو مەدیایا هەرێمی و جیهانی فۆکسا خوە بخن سەر ڤێ نووچەیێ، هەمان دەمێ کوردان ژی د مەدیایا جڤاکی دە ئەڤ هەڤدیتن ب کێفخوەشیەکە مەزن پێشوازی کر. مەدیایێن داگیرکەر و نەحەزێن کوردان نەرازیبوونا خوە ل همبەر ڤێ جڤینێ راگهاند، یا بالکێش هەلوەستا مەدیایا پەکەکێ بوو کو ب ئاوایەکی تەڤ گەریا کو چ گرینگی ب ڤێ جڤینێ نەدا.
هەڤدیتنا سەرۆک بارزانی و مەزلووم عەبدی کو ب بالەفرەکە ئامەریکی هاتبوو هەولێرێ، نیشانەیا ڤی تشتی بوو کو کورد د ناڤا ئالۆزیێن رۆژهلاتا ناڤین دە د ناڤا لێگەرینا یەکیتیێ دە نە، ئەڤ لێگەرینا کوردان ژ ئالیێ هنەک نەحەزێن کوردان وەکە چەپێن ترک و نیژادپەرەستێن داگیرکەر ڤە بچووک هات دیت و خوەستن ڤێ هەڤدیتنێ بێ واتە نیشان بدن، لێ گەلەک بالکێش بوو کو پەکەکێ ژی هەمان هەلوەست ل همبەر ڤێ هەڤدیتنێ نیشان دا.
ئاژانسا رۆژ نیوس یا پەکەکێ کو ل سلێمانیێ وەشانێ دکە، وەکە مانشێت نڤیساند کو مەزلووم عەبدی ل هەولێرێ یە و د ناڤەرۆکا نووچەیا خوە دە ژی گۆت، “عەبدی هاتیە کو لگەل هندەک ئالیێن کوردان هەڤدیتنان چێکە” و ناڤێ سەرۆک بارزانی د نووچەیا خوە دە دەرباس نەکر، هەمان دەمێ د نووچەیا خوە دە گۆت پەدەکێ رێکەفتن لگەل ترکان هەیە و ئێریشێن ترکا شەرمەزار ناکە. ب ڤی شێوەی خوەست کو قیمەتا هەڤدینێ بچووک نیشان بدن و هێڤیێن کوردان ژ بۆی یەکیتیێ ژی تونە بکن.
وەشانا پەکەکێ یا ب ناڤێ ئانەفێ کو وەکە وەشانەکە ناڤەندییە ئەڤ هەڤدیتن د بەشا خوە یا ترکی دە ب تەنێ ب چار رستەیان باس کر، هەمان ئاژانسێ د بەشا خوە یا ئینگلیزی دە گۆت، “مەزلووم عەبدی دێ لگەل گەلەک ئالیێن کوردی ل هەولێرێ هەڤدیتنا پێک بینە” وان خوەست ب ڤی ئاوا ڤەشیرن کو مەزلوومم عەبدی ب تەنێ ژ بۆی هەڤدینا لگەل سەرۆک بارزانی هاتیە هەولێرێ. ئانەفێ ژی وەکە رۆژ نیوس خوەست ڤێ هەڤدیتنێ وەکە هەڤدیتنەکە سادە بدە نیشاندان.
پشتی هەڤدیتنێ ب چەند دەمژمێران دیمەنێن ڤێ هەڤدینێ هاتن وەشاندن، ب هەزاران کەسان ل سەر سۆسیال مەدیایێ ڤیدیۆ و وێنەیێن هەڤدیتنێ پارڤە کرن و گۆتن، دیمەنێن هێڤیا کوردان، لێ بەلێ مەدیایا پەکەکێ ئەڤ دیمەن ژی پارڤە نەکرن.
رۆژنامەیا پەکەکێ کو ل ئەورۆپایێ وەشانێ دکە، یەنی ئۆزگۆر پۆلۆتیکا یەک نووچە ژی ل سەر ڤێ هەڤدیتنێ چێنەکر، رۆژنامەیا پەکەکێ یەنی یاشام کو ل ترکیەیێ وەشانێ دکە یەک نووچە ل سەر هەڤدیتنێ پارڤە کر و تێ دە گۆت، “فەرماندارێ هەسەدێ مەزلووم عەبدی کو پڕ جاران بانگەوازیا یەکیتیێ دکە، هات هەولێرێ و لگەل ئالیێن کوردان هەڤدیتن چێکر.”
د مەدیایا جڤاکی دە کورد ب ئاوایەکی گشتی، هەتتا لایەنگرێن پەکەکێ ژی ب هەڤدیتنا سەرۆک بارزانی و مەزلووم عەبدی پڕ کێفخوەش بوون، لێ بەلێ مەدیایا پەکەکێ کو کاکلکا پەکەکێ یە وەکە لایەنگرێن خوە نەدفکری، ڤێ راگهاندنا پەکەکێ کو دچە جەم قەبیلەیەکا ئەفریقا و وێنەیێ ئۆجالان ددە دەست وان و نووچەیەکێ ل سەر چێدکە، هەڤدیتنا دیرۆکی یا هەولێرێ ب تەنێ ب 4 رستەیان پارڤەکر، ئەڤ ژی ژ بۆی تێگهشتنا هەلوەستا پەکەکێ پڕ گرینگە.
مەدیایا پەکەکێ، پەکەکە ب خوە یە، ئەم دکارین ڤێ ئەنجامێ دەرینین کو کەسێن پەکەکێ برێڤە دبن، هەڤدیتنا سەرۆک بارزانی و مەزلووم عەبدی سادە دیتیە و هەلوەستا خوە یا ل دژی پەدەکێ و بارزانی دێ بەردەوام بکن. بەلێ، ئەم یەکیتیا نەتەوی یا کوردان دخوازن و ژ بەر ڤێ یەکێ ژ دەستپێکا پێڤاژۆیا سووریێ و ئەسەد ڤە هەموو نووچەیێن ل سەر پەکەکێ و رۆژئاڤا ئەم دەهان جاران ژ فیلتەران رە دەرباس دکن پشترە ئەم پارڤە دکن، و ئەم ناخوازن د چ جیهەکێ دە چ تشتەکی ل دژی کوردەکی بنڤیسینن. تەڤاهی کوردێن وەلاتپەروەر ڤێ هەستیاریێ نیشان ددن، هەتتا کوردێن کو باوەر دکن و دزانن کو ئۆجالان سیخۆرە ژی مافێ خوە یێ بێدەنگیێ بکارئانین و رەخنەیێن خوە ژ بۆی دەمەکی دن هلگرتن.
لێ بەلێ پەکەکە بەرەڤاژی ڤێ یەکێ تەڤگەریا، راگەهاندنا پەکەکێ نها ژی هەر رۆژ ل دژی پەدەکێ، پێشمەرگە و بارزانی نووچەیێن نەفرەتێ پارڤە دکە، حکوومەتا ئیراقێ دخوازە دەست دەینە سەر پەترۆلا کوردان یا کەرکووکێ کو مافەکی کوردان یێ دیرۆکی یە، لێ مەدیایا پەکەکێ دەهۆلێ بۆ حکوومەتا ئیراقێ لێ ددە و بەرگریێ ل وان دکە، مووچەیێ فەرمانبەرێن هەرێما کوردستانێ نایێ رێکرن، و ئیراق دخوازە کوردان ب ئابۆریێ تەهدید بکە، پەکەکە ژ ڤی تشتی ژی حکوومەتا هەرێما کوردستانێ بەرپرسیار دبینە، واتە ئەم ژ هەڤدیتنا سەرۆک بارزانی ومەزلووم عەبدی هێڤیەکا مەزن وەردگرین و ئەم دبێژین ژ بۆی یەکیتیا کوردان پێشکەتنەکا مەزنە، لێ بەلێ پەکەکە هەمان هەست و هەمان هەولەستێ ب مە رە ناژی.
ژ وان کەسێن کو پەکەکێ باش ناس دکن رە ئەڤ هەلوەست نە سۆپرایزەکە، ژ بەر کو د تەڤاهیا دیرۆکا پەکەکێ دە هەلوەستا وان ژ بۆی یەکیتیا کوردان دیارە، وەکە ئەنجام ئەم دکارین ببێژین کو هەلوەستا مەدیایا پەکەکێ نیشان ددە کو پەکەکە ژ سالا 2012 هەیانی نها سیاسەتا خوە یا کو ل رۆژئاڤا یەکیتیا کوردان ناخوازە بەردەوام دکە، پەکەکە دێ دیسا دژبەرییا خوە یا ل همبەر بارزانی بەردەوام بکە، ناهێلە کو د ناڤا کوردان دە پرەکە هەڤدیتنێ چێببە و ئەڤ کوردێن ب راستی یەکیتیێ دخوازن دڤێت ڤێ هەلوەستا پەکەکێ ببینن و ل دژی پەکەکێ هەلوەستا خوە دیار بکن، ئەگەر ئەڤ هەلوەستا پەکەکێ نەیێ راوەستاندن، یەکیتیا کوردان دێ تەنێ ببە گۆتنەکا خوەش و چ بنگەهەکێ بهێز ژێ رە چێنابە.