هەڤدیتنا داوی یا جەمیل بایک لگەل ستێرک تیڤیێ گەلەک ئیشارەتێن سیاسەتا پەکەکێ یا پێشەرۆژی تێ دە هەبوون، جەمیل بایک ل سەر مژارا هەڤدیتنا ئۆجالان و دەولەتا ترک دە گۆت، “نە ژ رێبەر ئاپۆ و نەژی ژ دەولەتێ هەیانی نها ت تشتەک نەگهشتیە مە”. هەلبەت مە دزانی کو هەڤسەرۆکێ دەم پارتیێ تولای حاتیمۆغلەری د 24/12/2024 دە هات سلێمانیێ و نامەیەک ژ ئۆجالان بۆ کەجەکێ ئانیبوو، جەمیل بایک د ناڤا ئاخافتنا خوە دە نەرازیبوونا خوە ژ هەڤدیتنا ئۆجالان و دەولەتا ترک نیشان دا و گۆت، “دەولەت دخوازە ب ڤان هەڤدیتنان رێبەر ئاپۆ بێی ئیعتیبار بکە.” یانی ئەساسەن جەمیل بایک پەیامەکە نەراستەراست ژ بۆی ئۆجالان رێکر و خوەست ژ بۆی ئۆجالان سینۆرەکێ دەینە.
هەڤسەرۆکێ کەجەکێ جەمیل بایک کەسەکە کو وەک ئالیگرێ ئیرانێ تێ ناسکرن. پشتی سالا 2013 ژی ب پێشەنگیا جەمیل بایک پەکەکە د باسکێ ئیرانێ دە جی دگرە. ئەڤ بنکەتنێن کو ڤێ داویێ ئیرانێ تەجرووبە کری وەکە بنکەتنا ستراتژی و رێبەرتیا جەمیل بایک ژی تێن زانین. جەمیل بایک هەمبەر ئۆجالان و قارایلان تەکۆشینەک دابوو و د ئاستەکی مەزن دە ئێدی پەکەکە کەتبوو د بن کۆنترۆلا وی دە، جەمیل بایک نها دخوازە ڤێ کۆنترۆلا خوە بەردەوام بکە، ژ بەر ڤێ یەکی ژی دخوازە زەندێن خوە هلدە و رێیەکا نوو ژ بۆی پەکەکێ چێبکە. ژ بەر ڤێ یەکێ ژی د ڤێ دەما داویێ دە گەلەک جاران ل سەر یەک دەردکەڤە سەر شاشەیێن تەلەفزیۆنان و پەیامان ژ بۆی هێزێن هەرێمێ دشینە. یانژی ب شێوەیەکی هێژان زەلالتر ئەم ببێژن، جەمیل بایک ل پاریزەرەکی نوو ژ بۆی پەکەکێ دگەرە. یانژی هێژان هشکتر ببێژین، جەمیل بایک حەسابا ڤێ یەکێ دکە کو ڤێ جارێ پەکەکێ بفرۆشە کێ.
دبە کو هندەک کەس ڤان گۆتنێن مە زێدە هشک ببینن و ببێژن کو، “پەکەکە دخوازە د ناڤا هەڤسەنگیێن رۆژهلاتا ناڤین دە رێیەکا نوو ژ بۆی خوە ببینە و سیاسەتا رێیا سێیەمین پێک تینە، و ب ڤان گۆتنا بەلکە دخوازن پەکەکێ بپارێزن.” لێ بەلێ ئەڤە راست نینە، راستی ئەڤە: پەکەکە و هێزێن وێ یێن لەشکەری د رۆژهلاتا ناڤین دە ئێدی هێزەکا پارامیلیتەرە. نە ژ بۆی داخوازیێن کوردان، ژ بۆی بەرژەوەندیێن خوە بازارێ ب دەوروبەران دکە. د هەڤدیتنا جەمیل بایک یا داوی دە ژی ئەم دکارن ب چەند گۆتنان ڤێ یەکێ ئیسپات بکن.
جەمیل بایک ژ بۆی ترکیەیێ گۆت: “رێبەر ئاپۆ ناخوازە داویا ترکیەیێ وەکە داوییا عۆسمانیان بە، پەکەکێ گەلەک ئالتەرناتیڤێن دن هەنە و دکارە ڤان ئالتەرناتیڤان ژ بۆی خوە بکار بینە، ئەگەر پەکەکێ وەها کر دێ ترکیە زرارێ ببینە، لێ ئەم ناخوازن ترکیە بکەڤە رەوشەکا زۆریێ دە.” باشە جەمیل بایک و پەکەکە چما ناخوازن ترکیە پارچە ببە، ما کورد ژ ڤێ یەکێ سوودمەند نابن؟! جەمیل بایک ژ بۆی ئیراقێ ژی ڤان گۆتنان دکە، “دخوازن دەولەتا ئیراقێ پارچە بکن. دبە ئیرانێ هنەکی دەربە خواربە لێ د ئیراقێ دە ئەوێ ل بەر خوە بدە، ژ بەر کو ئیراق ژ بۆی ئیرانێ ژ جیهێن دن یێن وەکە لبنانێ و سووریەیێ گرینگترە.” ل ڤێ دەرێ ژی جەمیل بایک ناخوازە ئیراق پارچە ببە، ئەساسەن ئەڤ گۆتنێن جەمیل بایک ژ بەر ڤێ یەکێ یە کو جەمیل بایک دبینە شەرێ ترکیێ و ئیرانێ ل سەر ئیراقێ چێدبە و ژ بەر ڤێ یەکێ دبێژە هەر دو ئالیان، ئەم ل ئیراقێ نە، هێزێن مە یێن چەکداری هەنە و هوون دکارن مە ژ بۆی خوە بکار بینن، ئەساسەن جەمیل بایک هەم ژ بۆی ئیراقێ و هەم ئیرانێ و هەم ژی ترکیەیێ کاغەزا سپی ئیمزا کریە، هەتتا دبیژیتە وان ژی، “ئێدی د رۆژهلاتا ناڤین دە رێکەفتنا ئیبراهیمی هەیە، واتە ئیسرائیل هەیە.” ئانکو جەمیل بایک دبێژە گەر هوون مە ژ بۆی خوە بکار نەئینن دێ ئیسرائیل مە ژ بۆی خوە بکار بینە.
جەمیل بایک: “کی کوردان بکشینە گەل خوە ئەو دێ د رۆژهلاتا ناڤین دە بسەربکەڤە.” بەرامبەر ڤێ راستیێ ژی جەمیل بایک نابێژە کوردان وەرن ئەم ل کێلەکا هەڤدوو بسەکنن و ئەم ببن یەک، واتە ژ هەر کەسێ رە کاغەزەکا سپی ئیمزا دکە، لێ ژ کوردان رە نا. ژ بەر کو هەبوونا پەکەکێ ل سەر ئەساسێ چارەسەریا کوردان نینە، ل سەر ئەساسێ نەچارەسەرکرنا پرسگرێکا کوردانە، پەکەکە د چ پارچەیا کوردستانێ دە چارەسەریێ ناخوازە، ژ بەر کو تشتێ جەمیل بایک ژێ دترسە ئەڤە کو حکوومەتا ئیراقێ و حکوومەتا هەرێما کوردستانێ بکاربن ب راستی لهەڤهاتنەکێ بکن، ترسا پەکەکێ ئەڤە کو یەنەکە و پەدەکە ب هەڤ رە حکوومەتەکا خورت چیبکن، ژ بەر کو ئەڤ ئالۆزی چارەسەر ببن پەکەکە نەما بکاربە خوە ب ئیراقێ رە بازار بکە، رێ نامینە کو پەکەکە ب ئالا حەشدی شەعبی ل شەنگالێ بمینە، هەمان دەمێ پەکەکە ناخوازە ل ئیرانێ ژی پرسگرێکا کوردان وەرە چارەسەرکرن، دەولەتا ئیرانێ سزایێ سێدارەدانێ ددە پەخشان عەزیزی و تریفە موورادی کو ئەڤ ئەندامێن پژاکێ نە، لێ بەلێ کەسێن کو پژاکێ ئیدارە دکن، مستەفا قاراسوو و جەمیل بایک د بن باسکێ ئیرانێ دە ب ئەولەهی دژین، پەکەکە ل رۆژئاڤا ژی یەکیتیا کوردان ناخوازە، تەنێ پەکەکە دخوازە ل رۆژئاڤا سووکەک ژ بۆی وێ ڤەببە کو بکاربە تێدە بازارەکی بکە، ئەم جارەکە دن دوبارە دکن، پەکەکە هێزەکا پارامیلیتەرە، هێزێن پارامیلیتەر نابن ئادرەسێن چارەسەریێ، هێزەکا پارامیلیتەر نکارە یەکیتیا نەتەوی یا کوردان چێکە، کورد دڤێت ڤێ تایبەتمەندیا پەکەکێ ببینن و ئەو رێیێن کو پەکەکێ گرتین ژ بۆی خوە ڤەکن، هەر پارچەیا کوردستانێ ل گۆر تایبەتمەندیا خوە چارەسەریەکێ پەیدا بکە و یەکیتیێ چێکن، ئانجاخ وی وەختی دکارن خوە ژ دەستێ پەکەکێ وەکە ئاموورەکی بکارئانین دە رزگار بکن، ئەڤ نەرینێن کو جەمیل بایک د ڤێ هەڤدیتنێ دە ئانین زمان دەستەسەرکرنا چارەنووسا کوردایە، و نابە ئەم ژ ڤان ئاخافتنێن جەمیل بایک هێڤیەکێ ژ بۆی کوردان پەیدا بکن.
