ژ بۆنا بەرژەوەندییێن نەتەوی و نیشتیمانی، پێکڤە کار کرن، یان یەکتییەک سییاسی؟
50 سالن، ل باکورێ کوردستانێ و ب گشتی ژ بۆنا سەرانسەرێ کوردستانێ بەحسا “یەکتییەک سییاسی” تێت کرن! ل سەر یەکتییا ھێز و پارتییان، ئاڤاکرنا “ئەنییا نەتەوی”، وەک یەکتییەک سییاسی ھاتییە پاراستن.
د ڤێ ئارمانجێ دە کۆنگرە و کۆنفەرانس ھاتنە سازکرن!
مخابن یەک ژ ڤانە بەرھەم نەدایە. ژ بەر کو نە ل سەر ئەساسێن نەتەوی و نیشتیمانی، ل سەر ئارمانجا بەرژەوەندییێن پارتییان و رێخستنان دھاتن مەشاندن.
د ئەسلێ خوە دە ئەڤ ئارمانجێن ئایدۆلۆژیک و داخوازێن سییاسی و دۆزا مللەتەکی، کو ژ لایێ چار دەولەتان ڤە؛ خاکا وی ھاتییە پارڤەکرن-پەرچەکرن و داگیرکرن، ھەبوونا وی ھاتییە ئینکارکرن ھەڤدو نەدگرت.
دۆزا مللی-نیشتیمانی، ل سەر داخواز و ئەساسێن مللی-نیشتیمانی تێت ئاڤاکرن. ئەڤە ژی تەقەبوولا داخوازێن مللی یێن ملەتێ کورد و پێکھاتەیێن ل سەر ئاخا کوردستانێ دکە. ژ بۆنا بەرژەوەندییێن مللەتێ کورد، پێکڤە کار کرن، د ئاستەک ژ بۆنا پێکڤە ئاڤاکرنا پێکڤەژییانەک دەمۆکراتیک پێویستە.
مللەتێ بنگەھین ل سەر ئاخا کوردستانێ مللەتێ کوردە. بنگەھا پرۆگراما نەتەوی؛ ل سەر بدەستخستنا مافێن نەتەوی-دەمۆکراتیک و ل سەر خاکا کوردستانێ ژ ئێخستنا نیرێن داگیرکاریێ تێت ئاڤاکرن.
تەڤگەرا مللی یا کورد، چ جاران ل سەر ڤێ نەخشا کوردستانێ، ھەر بەشەک لگەل بەشێن دن د تێکلییێ دە، ل سەر بەشێن خوە سازییێن مللی ئاڤا نەکرنە و ئەڤە ژ بۆی خوە نەکرنە ئارمانج ژی. ( ئەز باشوورێ کوردستانێ ژ دەرڤێ ڤێ تەسبیتێ دھێلم. ژ بەر کو ل باشوورێ کوردستانێ ستاتوویەکا فەرمی یا فەدەرالی، د ئاستا دەستوورا ئیراقێ دە ھەیە و نھا خوەدی دەزگەھێن مللی نە) ل ھەرچار بەشێن کوردستانێ پارتی و رێخستن ھاتنە ئاڤاکرن، ئەڤ ھەموو پارتی و رێخستن، ب ئارمانجا خوەدییێ دەولەتێ و بدەستخستنا ئیقتیدارێ ھاتنە دیزاین کرن. ئەڤە ژی ژ پرۆگراما مللی و نیشتیمانی پێتر، بوویە سەبەبێ هەڤرکیەک پارتیزانی. ڤێ ژی پر زەرەر دایە ھشمەندییا مللی و دۆزا مللی یا کوردستانێ.
ل ھەر بەشێ کوردستانێ، دڤێت مللەتێ کورد، ل گۆری شەرت و مەرجێن بەشێ خوە، خوە وەک مللەتەکی بھۆنە. ئەڤ تێ واتەیا ژ بۆنا بەرژەوەندییێن مللی و نیشتیمانی، دڤێت ھەموو ھێز، گرووپ و پێکھاتەیێن ل کوردستانێ پێکڤە، ژ بۆنا رزگارکرنا بەشێ خوە و دەستکەڤتیێن خوە، کار بکن. پێکڤە کار کرن، د ڤێ ئاستێ دە دڤێت ئەساس بێت گرتن. نە مەجبوورین ببین یەک.
د ناڤبەرا خوە و تەڤگەرێن مللەتێن سەردەست یێن چەپ، ئیسلامیست، دەمۆکرات دا بێ شک، دڤێت ب مەسافەت بین.
دڤێت ب چ مەرجان و ب چ سەبەبان، رێ نەدین تەڤگەرێن مللەتێن سەردەست، کو ب ئیرادەیا مللەتێ کورد بلیزن و بێخن بن باندۆرا خوە.
ھەگەر تەڤگەرێن مللەتێن سەردەست، یێن چەپگر، ئیسلامیست، دەمۆکرات، تەڤگەرێن مافێ ژنێ، مافێ مرۆڤان بخوازن ژ بۆی تێکۆشینا کورد و کوردستانێ ببن ئالیکار، دڤێت ڤێ خەباتا خوە، نە د ناڤ تەڤگەرا کوردستانێ دە، د ناڤ مللەتێن خوە دە بمەشینن.
ئیرۆ دەرفەتەک دەرکەتییە بەر مللەتێ کورد!
دڤێت ئەم دەست ژ یەکتییێ بەردن: دڤێت ئەم بنگەھا پێکڤە کار کرنێ ئاڤا بکن. ژ بۆنا داخوازێن ملەتێ کورد ل سەر خاکا کوردستانێ پێکڤە کار کرن گرینگە. ملەتێ کورد یەکە و کوردستان ژی یەکە. وەختا کو مە گومان ھەبت کو، کورد نە ملەتەک ھەڤگرتی، خوەدی ھشمەندییەک مللی و نیشتیمانییە، وی دەمی ئەم دکارین بەحسا “یەکتییا کوردان” بکین. لێ مللەتێ کورد ب ھەموو زاراڤ، ئۆل و دەولەمەندییا خوە یا دیرۆکی، خوەدی ھشمەندییەک مللییە. د ڤردا یا گرینگ ئەڤە کو، ئەم د ڤێ دەما ئەگەرا بدەسخستنا دەسکەڤتان دە، بکاربن پێکڤە کار بکین و دەرفەتێن کو د ھەرێمێ دە دەردکەڤن، ژ بۆنا مللەتێ خوە، وەلاتێ خوە بکاربین بکار بینین.
ئیرۆ ل باشوورێ رۆژئاڤایێ کوردستانێ دەرفەتەک دیرۆکی دەرکەتییە بەر مە. دیکتاتۆرییا رەژێما بەعس ھلوەشییا و سوورییە د دەستێ ھێزەکا دیفاکتۆ دەیە. ئیقتیدارەک دیفاکتۆ ل شامێ هەیە، لێ پێشەرۆژا وێ نە دییارە.
کورد ل سەر بەشەک ژ ئاخا خوە خوەدی بنگەھەک دیفاکتۆ نە. ھێزەک چەکدار، کو پر ب چەکە د دەستێ وان دە ھەیە. دو ھێلێن ئەرێنی یێن ڤی بەشی ھەنە:
1-بنگەھەک لەشکەری ھەیە کو لگەل ئەمەریکا و ھێزێھ ھەڤپەیمانان د ھەڤکارییەکێ دە نە.
2-ھێزێن سییاسی، مخابن هێژ ژ بۆنا ئارمانجێن مللی و نیشتیمانی بنگەھا پێکڤە کار کرنێ ژ بۆی خوە ئاڤا نەکرنە. لێ ئەڤ خەبات رۆژ ب رۆژ نێزیکی ھەڤ دبن، کو بکاربن ژ بۆنا بکارئانینا دەرفەتان پێکڤە کار بکن.
پەیەدە و یەپەگە ب میتۆدەک ئەمر واقع ئەڤ بەشە گرتیە دەستێ خوە و ھەموو ھێزێن دن ژ ناڤ ئاخا کوردستانێ دەرخستینە. پێشی ل وان گرت و نەھشت کو ئەو ژی ئەرکێن خوە بینن جیھ. ل باشوورێ رۆژئاڤایێ کوردستانێ کو کورد بکاربن کۆنگرەیەکا نەتەوی دەرخن ھۆلێ، دێ بکاربن ڤان دەرفەتان ژ بۆنا بەرژەوەندییێن مللی و نیشتیمانی بکار بینن.
دڤێت ئەم تەکەز بکن؛ یێن کو ل سەر ئاخا کوردستانێ چەک د دەستێ وان دە نە، نایێ رامانا کو مافێ وان ژ یێن دن زێدەترە. کوردستان خاکا مللەتێ کورد و پێکھاتەیێن کو ل سەر ئاخا کوردستانێ، لگەل کوردان دژینە. کوردستان یا ھەر کوردەکێ یە و مافێ ھەر کوردی، کەسایەتییێ کوردستانی ل سەر وێ ئاخێ ھەیە.
دڤێت ژ بۆنا ڤی مافێ مللی و نیشتیمانی ئەم بکاربن پێکڤە کار بکن. ئەم نە مەجبوورین ببن یەک.
