د 22ێ مژدارا 2024 دە، ل سلێمانیێ تەرمێ مرۆڤەکێ ل سەر ئەردی ھاتە دیتن. ھاتە زانین کو ئەڤ تەرمە یێ فرات چەشمەیە، ئەو بابێ دو زارۆکان بوو. خەلکێ ئامەد لجێ – گوندێ خنجسێ بوو. تەرمێ فرات د 18 چلەیێ دە ل ئامەدێ ھاتە ڤەشارتن.

ئاسایشا سلێمانیێ دەست ب لێکۆلینەکا فەرمی کر، لێ بەلێ بوویەر ھاتە ڤەشارتن و لێکۆلینەکا کوور نەھات کرن. مەدیایا پەکەکێ پشتی 24 رۆژان ب سەر نڤیسا “وەلاتیەکێ باکورێ کوردستانێ ژ ئالییێ میتێ ڤە ھاتە کوشتن” نووچەیەک وەشاند. لێ مالباتا فرات چەشمە و سازیێن پەکەکێ یێن ل سلێمانیێ ژی دبێژن کو فرات چەشمە ژ ئالیێ پەکەکێ ڤە ھاتیە کوشتن. فرات چەشمە بەرێ ئەندامێ ئیستخباراتا لەشکەری یا پەکەکێ بوو.

ژ ئالیێ پەکەکێ ڤە ژ بۆ کو ھندەک سوویقەستان پێک بینە، ھاتبوو ئەرکدار کرن

فرات چەشمە ئانگۆ رامان د سالا 1980 دە ل لجێ ژ دایک بوویە. ئەو د سالا 1997 دە تەڤلی پەکەکێ بوو و پشتی سالا 2001 د کارێن ئیستخباراتا لەشکەری یا پەکەەکێ دە جھ گرت. ب ناڤێ کۆد رامان ئامەد دھات ناسین. د سالا 2004 دە ژ لایێ پەکەکێ ڤە ھاتە شاندن بۆ سلێمانیێ وەک شانەیێن رازایی، لێ پەکەکێ ئەو وەکی کو ژ رێخستنێ قووت بوویە دا پێش.

پەکەکە، فرات چەشمە ب ئارمانجا پەیوەندی و چالاکیان د ناڤ ڤان گرووپان دە بکە، شاند. د وێ دەمێ دە پەکەکێ ب ئالیکاریا کەسێن وەکی وی، رێبەرێن بەرێ یێن پەکەکێ یێن وەکە کانی یلماز و کەمالێ سۆر ژی کوشتبوون.

ھەتا داویا سالا 2006، رامان لگەل پەکەکێ ھەڤکاری کر، لێ پاشێ ژ پەکەکێ قووت بوو و دەست ب بازرگانیێ کر. پشتی کو پەکەکێ و یەنەکێ تێکلیێن خوە باش کرن، دیسا دەست ب پەیوەندیا لگەل رامان  کر. رامان دەست ب ھەڤکاریا نەلەپێ و ئیستخباراتا ھێزێن تایبەت، و کارێن وەکە بازرگانی و پۆستەبەریێ ژی کرن.

وەلاتیەکی ژ کۆمەلەیا کارکەرێن مەزۆپۆتامیا یێ رێخستنا پەکەکێ یا ل سلێمانیێ کو مە ل سەر مژارێ ل نێرینێن وی پرسین، نەخوەست ناڤێ وی وەرە ئەشکەرەکرن وھا گۆت: “فرات گوھ نەدا کۆمەلە و کادرۆیێن ھەرێمی یێن وەکی کارکەرێن مەزۆپۆتامیایێ، کۆمەلە و ھتد. ژ بەر کو پەیوەندیێن وی یێن د ئاستا بلند دە لگەل پەکەکێ ھەبوون. ژ بلی پەکەکێ چ باکوری نکارن ل سلێمانیێ ئیقامەیێ وەربگرن و بازرگانیێ بکن. یەکی باکوری ژی دکانەکێ ڤەکە، پەکەکە نەخوازە دێ ئاساییشا یەنەکێ ئاگاھدار بکە و بدە گرتن. فرات ژ بەر کو پەیوەندیا وی لگەل پەکەکێ ھەبوو ھەر تم بازرگانییەکا باش دکر. ئەگەر خوین ژ دفنا یەکی باکوری برژتا، کۆمەلەیا کارکەرێن مەزۆپۆتامیایێ داخویانی ددا، لێ فرات ھات کوشتن نەگۆتیە مە ژی کو ئەم بچن سەرساخیێ بدن.”

وەلاتیەکی دنێ ئامەدێ کو د ھەمان دەمێ دە ئەندامێ ھەمان کۆمەلەیێ یە ژی دەربارێ مژارێ دە ئەڤ تشت گۆت: “پەکەکێ فرات بکار ئانی، کار پێ کر و پشترا ژی کوشت. ئەم ھەموو دزانین کو پەکەکێ ئەڤ بوویەرە کریە. لێ دەستوور نەدا مە کو ئەم ل سلێمانیێ تازییێ دانین. فرات ژی وەکە زەکی چەلەبی بێ سەر و شوون ھاتە کوشتن. پەکەکە ئەشکەرە قەبوول ناکە کو وان ئەڤ جینایەتە کریە ژ بەر کو مالباتا فرات ھەموو ل ئامەدێ دژین، ھەموو دەنگێن خوە ددن پارتیا دەمێ و گەلەک ژ وان ھێژ ژی دخەبتن. پەکەکە ژ بۆ کو مالبات نەرەڤن راستیان نابێژە. لێ وان رامان کوشت.”

خزمێ فرات چەشمە ژی گۆت، “د دەمێن داوی دە د ناڤبەرا کادرۆیێن پەکەکێ و فرات دە ئالۆزی ھەبوون. گەلەک جاران گەف ل وی خواربوون. لێ دەردۆرا مالباتێ یا نێزیک دخوازە بێدەنگ بمینە و نەھێلە پرسگرێک مەزنتر ببە.”

چاپەمەنیا پەکەکێ چ گۆت…

چاپەمەنیا پەکەکێ یا کو ژ بۆ کادرۆیێن پەکەکێ یان ژی لایەنگرێن وان یێن سڤیلێن کو بەرێ ل سلێمانیێ ژ ئالیێ دەولەتا ترک ڤە ھاتبوون قەتلکرن قییامەت رادکرن، د دەما قەتلکرنا فرات چەشمە دە یەک نووچە ژی بەلاڤ نەکرن. ھەر وھا 24 دەمژمێران پشتی بوویەرێ رۆژ نیوزا پەکەکێ کو ل سلێمانیێ وەشانا خوە دکە، ب سەرناڤێ “کەسێ کو وەلاتیەکی باکورێ کوردستانێ ل سلێمانیێ کوشتی، ھات گرتن” نووچەیەک وەشاند. و گۆت وان ل سەر داخوازییا میتێ ئەو کوشتییە” ھەر وھا ئانی زمان کو مەدیایا ب ناڤێ شارپرێس ل شوونا کو لگەل مالباتێ ھەڤدیتنێ بکە نووچە وھا نڤیساند.

شارپرێس مەدیایەکە کو نێزیکی پەکەکێ یە و ب شریکاتیا پەکەکێ تەڤدگەرە و د مالپەرا شارپرێس دە دەربارێ فرات چەشمە چ نووچەیەک تنەیە. ووسا دخویە کو پەکەکە ب رێیا مەدیایێ ھەول ددە تێگھشتنەکێ چێبکە کو چ شک نەچن سەر پەکەکێ. ھەر وھا یەنەکێ ژی ب پێدانا ئاگاھیێن نەراست ب مالباتێ بوویەر ڤەشارت و کەسێن جودا کرن ئارمانج.

رامان-فرات چەشمە کو ژ ئالیێ پەکەکێ ڤە ژ بۆ پێکانینا سوویقەستان ھاتبوو ئەرکدارکرن، بوو قوربانیێ لیستکێن تاری یێن پەکەکێ. لێ مخابن ھەر کەسێ کو لگەل پەکەکێ تێکلیێن ئیستیخباراتی، بازرگانی و ھتد دکە داوییا وی وەکە یا رامان دبە. د بوویەرا زەکی چەلەبی دە ھات دیتن کو پەکەکێ چاوا چەلەبی کریە ئارمانجا میتێ. پەکەکە ژ بەر نێزیکاتیا خوە یا پراگماتیک، ژ ئالیەکی ڤە دەردۆرێن کو لگەل وێ تێکلیێن خوە ھەنە ب کار تینە، ژ ئالیێ دن ڤە ژی وان کەسێن خوە ناپارێزە. وەکی دن، دەما کو د تێکلیێن وان دە پرسگرێک دەردکەڤە، ل شوونا کو وەفاداریێ نیشان بدە، بەرۆڤاژی ئەو ئێرشی ڤان دەردۆرا دکن.