بووبێ ئەسەر
من بەرێ ژی ل سەر رێباز ئانگۆ فەلسەفەیێ نڤیسی بوو و د ور دە ئانیبوو زمان کو دڤێت ئێدی ئەم فەلسەفەیا خوە وەکە رێباز ب ناڤ بکن دا کو پتر، باشتر و خوەشتر بهێت فێمکرنێ. لەورا ژی ئەزێ ڤێ جارێ دیسا ھندەکی ل سەر رێبازێ بسەکنم. ژ بەر کو رێباز قەدەرا ملەتەکی، ھەبوونا گەلەکی و ئاڤادانا وەلاتەکی ددە دیارکرن. ژ بەر ڤێ ھندێیە کو دڤێت ئەم ژی وەکە کورد و ل سەر ئەردێ خوە یێ ئازاد، ب شێوەکی رەحەت و ڤەکری ڤێ رێبازا خوە فێر ببن. وێ فێری مەزن، بچووک و زارۆکێن خوە، جوان و کەسێن خوە بکن.
سەدەمێ کو دڤێت ئەم ل سەر رێبازێ ئانگۆ فەلسەفەیێ راوەستین ئەڤەیە. ژ بەر کو ملەتەک نکارە بێ رێباز وەکە ملەت بژی. ئەگەر ئەم ژی ملەتەک بن و خوەدی رێبازەکێ بن کو ئەو رێباز ژی ھەیە. رێبازا بارزانیێ نەمرە. لۆما دڤێت ئەم وەکە ملەت ڤێ رێبازێ باش فێر ببن و وێ بدن فێمکرنێ. ھەتا کو رێباز د ناڤا گەل دە زیندی نەبە. ھەتا کو ئەو رێباز ل دبستانان نەیێ خوەندن. ھەتا کو مرۆڤێن کورد نەدن سەر شۆپا ڤێ رێبازێ، مرۆڤ ژ ھێژایی و خوەشیێن ملەتبوونێ پیچەکێ دوور دمینە.
ھەگەر ئەم ل جیھانێ و ل ملەتێن وەکە دەولەت دژین بنێرن، دێ بێ دیتن کو ھەر ملەتەک خوەدیێ خوە و رێبازەکێ نە. لەورا ھەمی دەولەت خوە ل گۆر رێبازا خوە دھوونن. خوە ل گۆر وێ دگوھەرینن و نووژەن دکن. دام و دەزگەھێن خوە ل گۆر وێ ژ نوو دە دادمەزرینن. جێشا خوەیا لەشکەرێ ل گۆر وێ ب رێخستنی دکن. زانکۆیێن خوە ل گۆر وێ ڤەدکن. د دبستانێن خوە دە ل گۆر رێبازێ کارێ خوەیێ پەروەردەیی دکن. ژ بەر کو رێباز روحیەتا نەتەوەیاتیێ ددە مرۆڤ. ژ بەر کو رێباز، مرۆڤێن خوە ل گۆر ھزرا نەتەوەبوونێ پەروەردە دکە. لۆما ژی دەما مرۆڤ ل گۆر ڤان شەرت و شرووتان بێتە پەروەردەکرنێ، مرۆڤ دێ ب رەحەتی و بێ ترس بکاربە وەلاتێ خوە ل ھەمبەر ھەمی مەترسیێن ھەیی بپارێزە. ژ بەر کو رێباز، دەستوورە، بەرنامە و قانوونە.
ژ بەر ڤان سەدەمانە کو دڤێت ئەم کورد ژی ل وەلاتێ خوە یێ ئازاد، رێبازا خوە بەری ھەرتشتی ب پێشڤە ببن. دڤێت کارێ رێڤەبەرن مەیێن باشوورێ کوردستانێ ئەو بە کو گەلێ خوە ب وێ رێبازێ مەزن بکە. مرۆڤێن خوە ل گۆر وێ پەروەردە بکە. دڤێت نەیێ ژ بیر کرن کو رێباز، رێیا پاراستنا گەل، ب پێشڤەخستنا دەمۆکراسیا وەلات و ئاڤادانیا وییە. ملەتەکی بێ رێباز ئانگۆ رێبازا خوە نزانبن وەکە وی ماری یە کو تو ب چیڤان ل سەرێ وی بدی. دێ تم گێژ بە کو دێ نکاربە رێیا خوە ب رەحەتی ببینە. ملەتەکی بێ رێباز وەکە جێشەکا بێ چەکە. ملەتەکی بێ رێباز وەکە دارا بێ فێقییە.
نە تەنێ ژ بەر ڤان سەدەمێن کو من ل ژۆر رێز کرن، دڤێت مرۆڤ رێبازا خوە بپارێزە. گەلەک سەدەمێن دن ژی ھەنە. لێ من یێن ئەساسی ئانین زمان دا کو رێڤەبەرێن مەیێن باشوورێ کوردستانێ کو ئیرۆ گەلەک ئیمکان و دەرفەت د دەست وان دە ھەنە ل سەر ڤێ یەکێ راوەستن و زووترین وەختێ دەست ب ڤەژاندنا ڤێ رێبازا پیرۆز یا کو ئەم ژ دەستێ زولمکاران دەرخستنە و کرنە خوەدی وەلاتەکی ئازاد، بکن. بلا ئەڤ رێباز ژ نوو دە، لێ وەکە بارزانییێ نەمر د ژیانێ دە پێک ئانییە، بنڤیسین. بلا ئەڤ رێبازە د دبستانان دە بێ خوەندن. بلا ئەڤ رێبازە ببە خالەک ژ خالێن پەروەردەیا ھێزا پێشمەرگەیان. بلا ئەڤ رێبازە بکەڤە بەرنامەیێن پەدەکێ کو د ھەموو بەش و خەباتێن خوەیێن پەروەردەیی دە بدە خوەندن، بدە فێر کرن و ژ نوودە زیندیکرنا وێ. ئەڤ کارە بەری ھەر کەسی کارێ پەدەکێ و کەسێن ب ڤێ باوەرن، دڤێت دەستپێ ببە. ھەتا کو ئەڤ رێبازە د ناڤا گەل دە و د مەژیێن مرۆڤان دە، د رووحیەتا کەسان دە جھێ خوە نەگرە، دێ ھەر تم مەترسی ل سەر وەلاتێ مە یێ ئازاد ژی ھەبە. دڤێت رێڤەبەرێن مە و ب تایبەتێ پەدەکە ئیرۆ ب ڤی کاری ڤە رابن دا کو ئەڤە ل پارچێن دن ژی بێتە زانین. وان ژی ل گۆر ئیمکانێن کو ئیرۆ ھەنە ئانگۆ ب رێیا تەلەڤزیۆن، رۆژنامە، کۆڤار و رادیۆیان بدە ناسین و زانین. ھەتتا دڤێت ھەفتیێ جارەکێ وەکە دەرسەکێ د تەلەڤزیۆنێن کوردان دە بێ خوەندن و زانین. ھەگەر دەرفەت ھەبە ئەز ب خوە دکارم بەرنامەیەکێ وەھا د تەلەڤزیۆنەکێ دە ئامادە بکم.
لێ دڤێت نەیێ ژ بیر کرن کو ب جھ ئانینا ڤێ رێبازێ، بەلاڤ کرن و ژ نوودە زیندیکرنا وێ، ئێدی ئەم ژی دێ وەکە ملەت بێ کێمانی بژین. هیچ ملەتەکێ بێ رێباز نینە. مادەم کو ئەم ژی ملەتەک ژ ملەتێن جھانێ نە، دڤێت ئەم ژی خوەدیتیێ ل ڤێ رێبازا پیرۆز بکن و خوەدی ل وێ دەرکەڤن و بزانبن خوەدی ل وێ دەرکەتاندن، پاراستنا وەلات و پێشخستنا دەمۆکراسیێ ب خوەیە..
لۆما من ژی ل گۆر زانین و شیانێن خوە ئەڤ رێبازە وەکە بەرھەمەکێ پێشکێشی گەلێ خوە و حەزکریێن ڤێ رێبازێ ب ناڤێ “رێباز” کرییە. ئەڤ بەرھەمە ل باکورێ کوردستانێ ب کورمانجی و ب ئەلفابایا لاتینی ھاتیە وەشاندن و تێ بەلاڤکرن. ھەر وەھا ڤێ بەرھەمێ ناڤەکی باش و باندۆرەکا دەلال ل سەر ھندەک کەسایەتیێن کوردێن باکور و ب تایبەتێ جوانان ھشتیە.
ڤێ بەرھەما دەلال، پتر بالا جوانان کشاندیە و ژ بۆنا وێ ب دەست بخن و بخوینن ھەول ددن. ئەز وەھا باوەرم پشتی خوەندنا وێ، دێ زەلالیەک د ناڤا جڤاتا کورد و د ناڤا پارتیێن سیاسی دە پێک بێ.
ھەلبەت دبە کو د ھندەک واران دە کێماسیێن من ھەبن. لێ ئەڤە دەستپێکەکە. مرۆڤ دکارە ڤێ دەستپێکێ بکە بەرھەمەک بەرفرەھتر و خوەشتر ژی. د جڤینا دانە ناسینا وێ یا ل باژارێ ستۆکھۆلمێ دە من ھندەک رەخنە و تێبنی گرتن کو د چاپا دودان دە وان ژی سەڕاست بکم. لۆما دبێژم: کوردنۆ بێ رێباز نەمینن. رێبازا خوە ناس بکن دا کو ھوون خوە ژی باشتر ناس بکن.
