سمکۆ عەبدولعەزیزی

د شەش مەهێن دەرباسبوویی دە گوهەرینێن مەزن چێبوون، دەم ب دەم گوهەرین پێتر خویا دبن، گوهەرینا هەری گرینگ بنکەتنا ئەنیا ئیرانێ بوو کو راستی شکەستنەکە دیرۆکی و دژوار هات، ئەز دکارم شکەستنا ئەنیا ئیرانێ د ڤان خالان دە رێز بکم:

1. بنکەتنا لەشکەری یا حەماسێ ل فەلستینێ و کوشتنا پرانیا بەرپرسێن وێ یێن پایەبلند ب دەستێ لەشکەرێ ئیسرائیلێ.

2. لاوازکرنا هێزا لەشکەری یا حزبوللاها لبنانێ و کوشتنا سەرکردەیێن ڤێ پارتیێ یەک ل پەی یەک.

3. هەلوەشینا رەژێما بەعسا سووریەیێ و هاتنە سەر دەستهلاتێ یا هەتەشێ کو سووننی مەزهەبن و ترکیە و سعوودیە و قەتەر و ئیسرائیل پشتگریێ ددنێ، ئانکو هیلالا شیعە یا ب سەرکێشیا ئیرانێ بنکەت و هیلالا سوونی بسەرکەت.

4. بەرتەنگکرنا هزرا سیاسی یا ل رۆژئاڤایێ کوردستانێ سەردەست کو تێ دە ئاپۆچیتی زالە.

5. بەرتەنگکرنا لڤینێن حەشدا شەعبی یا د بن باندۆرا ئیرانێ دە، ب ئاستەکی کو بەرپرسێن حەشدا شەعبی ژ ترسان دە نەما بکاربن ب ئاوایەکی نۆرمال دەرکەڤن ناڤا گەل، ئەڤ ژی بوویە سەدەم ئیراق بکەڤە د مەترسیەکە مەزن دە.

6. لاوازبوونا حووسیێن یەمەنێ کو ئەو ژی راستەراست د بن باندۆرا ئیران دە نە.

7. لاوازکرنا پرۆژەیا ئەتۆمی یا ئیرانێ ژ ئالیێ ئیسرائیلێ ڤە ب رێیا ئێریشێن هەوایی.

 ل کوردستانێ ژی پارتیێن د بن باندۆرا ئیرانێ دە هەنە، ب تایبەتی د سالێن داوی دە پارتیێن وەکە “یەنەکێ و پەکەکێ” ب تەمامی تەڤلی پرۆژەیا هیلالا شیعی یا ئیرانێ بووبوون، ب ئاوایەکی کو وەکە دو پارتیێن ئیرانی و مینا حیزبولاهێ د بن باندۆرا ئیرانێ دە تەڤ دگەریان. پشتی ڤان گوهەرینێن مەزن ل رۆژهلاتا ناڤین، باندۆرەکە راستەراست ل ڤان دو پارتیێن کوردی بوویە و راستی رەوشەکە خەراب هاتنە، ژ بۆی خوە دەرباسکرن ژ ڤێ رەوشێ ژی هەر یەک ژ ڤان پارتیان ب دو ئاراستەیێن جودا هەول ددن خوە ژ ڤێ شکەستنێ بپارێزن.

یەنەکە ب ئاوایەکی پراکتیک هەول ددە د بن سەیوانا بارزانی دە خوە بپارێزە و ب کێمترین زرار خوە قورتال بکە.

پەکەکە ژی ژ ئالیەکی ڤە هەول ددە ب هەر ئاوایەکی بە خوە نێزیکی ترکیەیێ بکە و پرۆسەیەک نوو یا چارەسەریێ ب رێیا ئۆجالان و میتێ بێخە رۆژەڤێ، ژ ئالیەکی دن ڤە هەول ددە پێڤاژۆیا رزگارکرنا کوردان ل رۆژئاڤایێ کوردستانێ یا کو رێبەرێ گەلێ کورد، سەرۆک “مەسعوود بارزانی” هەول ژ بۆی ددە، راستی پرسگرێکێن مەزن بکە.

 د ڤێ رەوشێ دە، بارەگەها سەرۆک بارزانی هەموو کارینا خوە خستیە رۆژەڤێ ژ بۆی کو بکاربە مافێن کوردان ل هەر چار پارچەیێن کوردستانێ بپارێزە، ڤێ یەکی ژی دکارم ب ڤان خالان زەلال بکم:

1. یەکیتیا تەڤ پارتیێن سیاسی یێن ل رۆژئاڤایێ کوردستانێ د بن یەک سەیوان دە ب ئاوایەکی کو ب هەڤ رە بکاربن دەستکەفتیێن گەلێ رۆژئاڤا بپارێزن.

2. تەڤ هیزا خوە یا دیبلۆماسی خستیە کار ژ بۆی کو بکاربە دەولەتێن مەزن یێن د سووریەیێ دە باندۆرا وان هەیی رازی بکە پشتەڤانیا رۆژئاڤایێ کوردستانێ بکن.

3. تەڤ هەولان ددە ژ بۆی کو ترکیە ب ئاوایەکی ئاشتیانە و ب رێیا دیالۆگێ دانوستاندنا لگەل رێبەرێ پەکەکێ بکە هەیا کو هن مافێن گەلێ کورد ل باکورێ کوردستانێ ب دەست بێن و شەرێ چەکداری دەرباسی شەرێ سیاسی ببە.

4. بزاڤەکە خورت تێ کرن کو ب هەر ئاوایەکی بە لگەل یەنەکێ کابینەیا دەهەمین ل باشوورێ کوردستانێ وەرە پێک ئانین، ژ بەر کو رەوشا هەیی ڤێ یەکێ دخوازە کو کورد یەکیتیا خوە پێک بینن و د قۆناغا داهاتی دە دیسا هەولا رێکخستنا زێدەتر یا هێزێن پێشمەرگە بدن و ببن یەک هێز و د بن سەیوانا حکوومەتا هەرێما کوردستانێ دە چالاکیێن خوە لدار بخن.