چەند رۆژن ل کۆلانەکا سلێمانیێ لیستکەکا ب ناڤێ گرەڤا برچیبوونێ تێ نمایشکرن، وەکە کو د هەر لیستکەکا شانۆیێ دە هەی، د ڤێ شانۆیێ دە ژی سیناریست هەیە، رێڤەبەر هەیە و کەسێن دبن سپۆنسەرێ لیستکێ ژی هەنە، ئەڤ کەسێن رۆژییا برچیبوونێ دگرن و د دەستێ وان دە سەروم “سێلان” هەی، ئەڤ ب تەنێ لیستکڤانن.

هندەک کەس دخوازن ڤێ لیستکا گرەڤا برچیبوونێ وەکە حەرەکەتا گەل، حەرەکەتەکا شۆرەشگێری و نەرازیبوونا گەل ب مە بدن قەبوولکرن. تشتێ باش ئەڤە کو ئەم نە ئەوقاس بێ ئەقلن ژ وان تشتا باوەر بکن، نە ژی کورەنە کو ئەم حەقیقەتا نەبینن، ئەڤ گرەڤا برچیبوونێ یا ل سلێمانێێ ب تەنێ شانۆیەکە. ئەم بۆ لیستکڤانا ژی زێدە تشتەکی نابێژن. ژ بەر کو دبە هەستێ ڤان کەسان هاتبە بکارئانین یانژی ب پەرە هاتبنە رازیکرن و کەتبن ناڤا ڤی کاری. رەخنەیێن مە ل سەر سپۆنسەر، رێڤەبەر و سیناریستێن ڤێ لیستکی نە، سپۆنسەرێ ڤێ شانۆیێ روحا جەحشاتیا سالا 1966ێ یە. یێن کو ڤێ شانۆیێ ئیدارە دکن ژی، پەکەکە، یەنەکە و هندەک کەسێن جەبهێ ئەنتی کوردن.

یێ کو مووچەیان نادە دەولەتا ئیراقێ یە و هەڤکارێ وێ ژی بافل تالەبانی یە

هەگەر ئەم پیچەکێ ژ نێزیک ڤە ل ڤێ مەسەلەیێ بنێرن، ئەڤ کەس ئیدیعا دکن کو ژ بۆی مووچەیێ خوە ئەڤ چالاکی لدارخستیە. یێ کو مووچەیان نادە دەولەتا ئیراقێ یە. یێ کو هەڤکاریێ لگەل ئیراقێ دکە ژی یەنەکەیە.

وەختێ خوە دە ئەندامێ کۆمیتەیا ناڤەندی یا یەنەکێ عادل مووراد، شیرەت ل دەولەتا ئیراقێ کربوو و گۆتبوو، “مووچەیان نەدن، هوونێ ببینن کا دێ چەوا کوردستان تەسلیمی وە ببە.” بافل تالەبانی کو پشتگیریا خوە ژ بۆی چالاکیێ راگهاند و ژ بۆی کو شۆیەکی بکە هەموو دەزگەهێن یەنەکێ خستبوون حەرەکەتێ د ئەساس دە لگەل ئیراقێ هەڤکارە کو مووچە نەیێ شاندن. بافل تالەبانی چوو جیهێ چالاکیێ و پشتگیریا خوە ژ بۆی وان نیشان دا. دیارە کو بافل تالەبانی پشتی کو شانۆیا خوە یا هلبژارتنێ ل سەر دیکێ پێشکێشکری و وەندا کری، نها ژی شانۆیا گرەڤا برچیبوونێ پێشکێش دکە.

دەولەتا ئیراقێ و رەژێما شیعی عەینی رەژێما سەدام و یێن بەری سەدام ژی نکارن قەبوول بکن کو کورد ل ئیراقێ نە بندەستن و نکارن ڤێ یەکێ حەزم بکن و دخوازن وەکە داگیرکەرەکێ وەرن و لسەر ئەردێ کوردستانێ روونن. ژ بەر ڤێ یەکێ ژی ژ سالا 2017 هەیا نها دخوازن کو دەست دانن سەر هەموو سامانێن سرووشتی یێن کوردستانێ یێن بن ئەرد و سەر ئەرد. ژ بەر ڤێ ژی تەڤاهی دام و دەزگەهێن دەولەتا ئیراقێ و هێزێن وێ یێن لەشکری و حەتتا میلیشیایێن شیعی ل دژی کوردان وەکە چەکەکی بکارتینن. ئیراقێ زەندێ خوە راکریە و دخوازە د هەرێما کوردستانێ دە چ زەنگینبوونەکا بچووک ژی هەیە دەست دەینە سەر.

سەدەما کریزا مووچە ئەنجاما داگیرکەریێ یە

کریزا مووچەیان وەکە دارەکی د دەستێ ئیراقێ دەیە کو دخوازە ل دژی کوردان بکار بینە و مووچە نە ژ هەولێرێ بەلکو ژ بەغدایێ تێن، و بەغدا وەک شەرەکی تایبەت هەر مەهێ ل دژی کوردان بکارتینە و دخوازە ئەڤ یەک هەموو هەیڤێ رۆژەڤا کوردان بە کا گەلۆ مووچە دێ وەرە یان نا و هەموەلاتیێن هەرێما کوردستانێ ب برچیبوونێ تەربیە بکە و حکوومەتا هەولێرێ ژی تەسلیم بگرە، جەوهەرێ مژارا مووچەیی ئەڤە.

ئەڤ سیاسەتا ئیراقێ سیاسەتەکا داگیرکەرە و هندەک ژ کوردان ژی زەندێن خوە راکرنە کو ڤێ سیاسەتا ل دژی کوردان ڤەشێرن.

پشتی هلوەشاندنا رەژێما ئەسەد ئیراق د ترسەکا مەزن دە ژییا، دبە کو ئیراق پارچە ببە، یانژی خوە ل سەر ئەساسێ دەمۆکراسیێ بگوهەرینە، رەژێما ئیراقا شیعی ژ بۆی کو بکاربە خوە ببپارێزە 40 تەقلان ل سەر هەڤ دهاڤێژە، سوودانی رۆژەکی ل ئیرانێ، رۆژەکێ ل ئەمریکایێ و رۆژەکی ل عەرەبستانا سعوودیێ یە ژ بۆی کو پشتگیریێ بدن ئیراقا نها.

ئیراق ژ بۆی کو ل سەر پییان بمینە پەترۆلا کوردان و هەموو سامانێن کوردان پێشکیشی وەلات و شیرکەتان دکە. بەس ژ بەر کو کورد مافێ خوە یێ نەتەوی بکار نەینن پەترۆلا کەرکووکێ فرۆتن شیرکەتا بریتش پەترۆل یا ئینگلیزان. و رێدان کو بریتانیا ل مووسلێ ل مەنتیقەیا گەیارە بارەگەهەکی لەشکەری ڤەکە، پەترۆلا خانەقینێ فرۆتن شیرکەتەکا سینی. واتە ئیراق ئەو نەفتا کو وەک شیرێ دایکێ ژ بۆی کوردان حەلالە دفرۆشە خەلکێ، ب تەنێ ژ بۆی کو بکاربە عەمرێ خوە درێژ بکە. عەینەن وەک 66ێ جەحش ژی دخوازن ناسنامەیا دگیرکەریا ئیراقێ ڤەشێرن.

مەدیایا پەکەکێ هەر رۆژ ژ بۆی رەواکرنا کریارێن دەولەتا ئیراقێ کار دکە، نووچەیان چێدکە کو حکوومەتا هەولێرێ، پێشمەرگەیان و بارزانیان بچووک بخینە، ئیراق مووچەیێ کوردستانێ ناشینە، مەدیایا پەکەکێ مانشەتان دهاڤێژە و دبێژە بارزانی مووچەیان نادن. مووچە تێ، ڤێ جارێ ژی دبێژن حکوومەتا ئیراقێ مووچەیێن کوردستانێ شاندن. ئەڤ وەفاداریەکا مینا وەفاداریا کووچکانە، ئەرکێ ڤێ مەدیایێ ئەڤە کو ل قەیرانا رۆژهلاتا ناڤین دە ژ بۆی ئیراق ل دژی کوردان سەرکەفتنێ ب دەست بخینە، ئالیکاریا وێ بکە.

هەگەر ئەڤ کەسێن د گرەڤا برچیبوونێ دە دەما کو کەرکووک ب ئیخانەتا یەنەکێ تەسلیمی ئیراقێ هاتی کرن دە گرەڤا برچیبوونێ پێک ئانیبایە، دا وان ل سەر سەر و ل سەر چاڤێن خوە دانین.

هەگەر ڤان کەسان دەما پەترۆلا خانەقین و کەرکووکێ بێی کوردان ب ئینگلیزان هاتیە فرۆتن پرۆتەستۆ کربا، دا ئەم دەستێن وان ماچی کن.

هەگەر دەما باژارێن کوردستانێ و قادا کۆرموورێ ژ ئالیێ حەشدا شەعبی ڤە هاتیە ئارمانجکرن، ل دژی ڤێ یەکێ چالاکی پێک ئانیبایە، ئەم دا دەست و لنگێن وان ماچی کن، لێ بەلێ کەسێن کو ب ناڤێ شانۆیا گرەڤا برچیبوونێ دە ببن دووڤکێن داگیرکەریا ئیراقێ، مە چ حوورمەت ژ بۆی وان نینە.

تایبەت ژی ئەڤ یەنەکە و پەکەکە کو ب ئەجیندایا خوە یا قرێژ دەولەتا ئیراقێ رەوا دکن، مە چ حوورمەت ژ بۆی وان نینە.

دیرۆک دێ ووسا بنڤیسینە، پەترۆلا کوردستانێ و سامانێن وێ یێن سرووشتی وەکە شیرێ دایکا وان ل کوردان حەلال بوو، و دەما ئیراقێ خوەست دەست دانە سەر ڤانە هەموویان و ب زەنگینبوونا کوردان ل کوردان ددا، هندەک کوردان جاشاتی ژ بۆی ئیراقێ کر.