بووبێ ئەسەر
بێ کو ھایا مە ژ ڤانا ھەبە، (ئەو تشتێن کو د نڤیسا یەکەم دە ھاتبوون زمان) دژمنان کارێ خوە باش کرن و دکن. لێ وەکە پارتی و رێخستنێن باکورێ کوردستانێ دڤێت ل سەر ڤێ لێکۆلینەکێ بکن. دێ تێگهن کا چ ھاتیە سەرێ وان.
ئەڤ ژی دبە سەدەما نەیەکرێزیا پارتیێن مە. ھەگەر د ڤان شەرتێن زۆر و زەحمەت دە، ئەم نکاربن یەکتی یان بھەڤرە کارکرنا پارتیێن سیاسی پێک بینن، سەدەما بنگەھین یەک ژێ ژی ئەڤە. ئانگۆ پەروەردەکرنا زیندانا دیاربەکرێ یە.
ھێژ ژی د ناڤا پارتی و رێخستنێن باکورێ کوردستانێ دە سیخور گەلەکن. دڤێت ھەر رێخستن ل خوە و ل ناڤا خوە ڤەگەرن. یەک و یەک ژیانا دۆست، ئەندام و کادرۆیێن خوە ل بەر چاڤان دەرباس بکن. رابردۆیێن وان بەرچاڤ بکن. ھەلوەست، گۆتن و کریارێن کەسێن وەھا بشۆپینن، دێ ببینن کو چقاس سیخور و کەسێن وەکە وان د ناڤ مە دە ھەنە. ب باوەریا من کەسێن وەھا ل باکورێ کوردستانێ گەلەک زێدە نە. گەلەک ژ وان ھندەک سەرێ کانیان خستنە دەستێن خوە و ژ بۆنا یەکرێزی و ب ھەڤرە کارکرن یان ژی دامەزراندنا ئەنیەکا نەتەوەیی پێک نەیێ، ل سەر کارن.
بەری ئاڤاکرنا زیندانا ب ناڤێ 5نۆلی یێ. کەسێن گرتی خوەدی ھەلوەستێن ب ھێڤی و ژ ھەڤالبەندێن خوە باوەر، چالاک و زیرەک بوون. یەکرێزیا ناڤا وان و ل ھەڤکرنا وان، باش بوو. ژ بلی یێن پەکەکەیی، گرتیێن دن ھەمیان ب ھەڤرە خوەش ددان و دستەندن. ل ھەڤ بوون. شەر و پەڤچوون د ناڤا وان دە دەرنەدکەت.
ھەر رێخستنێ ھەڤالێن خوەیێن کو مالباتێن وان فەقیر بوون، ب تەنێ نەدھشتن. ھەمی پەرە ل با کەسەکی دجڤاندن و وەکە کۆم ب ھەڤرە دژیان. جخارە و خوارنێن ژ دەرڤە دھاتنە کرین ژ بلی ھندەک ئیستیسنایان ب ئاوایەکی وەک ھەڤ دھاتنە بەلاڤ کرن. ب ڤی ئاوایی کەسێن خوەدی پەرە و یێن کو مالباتێن وان نکاریبوون ژ بۆی وان پەران بشینن، وەکە ھەڤ دژیان.
لێ ب ڤەکرنا وێ زیندانا ب ناڤ و دەنگ، ب دارێ زۆرێ و ب حوکمێ لێدانێ گاڤ ب گاڤ شکلێ ڤێ ژیانێ ژ ناڤا گرتیان ھاتە راکرن. ئێدی ھەرکەس ب سەرێ خوە و ل گۆر ئیمکانێن خوە ژیان. ڤێ ژی وەھا کر کو باوەریا ب رێخستنێ ژ ناڤا گرتیان راکر. ب سالان وەھا دۆماند و ئێدی ھەرکەس ب سەرێ خوە، ژیانا خوەیا گرتیگەھێ ژیان. سەدەم ژ ڤێ ئەو بوو کو ب رێخستنکرنا گرتیان ژ ھۆلێ راکن و ب سەر ژی کەتن.
ڤێ باندۆرەکا خەراب ل سەر گرتیان کر. ھەر کو چوو ئێدی تێکلی، حەزکرن و باوەریا ناڤا گرتییان ژی ژ ھەڤ قوت دبوون. و ڤێ یەکێ وەکە کولتورەکێ د مەژیێ گرتیان دە جھێ خوە گرت. پشتی دەرکەتاندنا ژ وێ زیندانێ ژی، پرانیا کادرۆیێن بەرێ ئێدی نە دخوەستن کو ب شێوەیەکی رێخستنی کارێ خوە بکن. واتە ئەو چاندا ب دارێ زۆرێ ب گرتیان دابوون قەبوولکرنێ. پشتی بەردانێ ژی ئێدی پرانیا کادرۆیێن زیرەک خوە نێزیکی کارێ رێخستنیێ نەکرن.
ھەگەر ئەم رەوشا ئیرۆ یا باکورێ کوردستانێ و یا وێ زیندانێ بدن بەر ھەڤ، ئەم دێ ببینن کو کادرۆیێن زانا و ژێھاتی یێن کو ئیرۆ ھەنە، بارا پتر ژ وان ب تەنا سەرێ خوە تەڤدگەرن. ژ خوە ئارمانجا وێ زیندانێ ژی ئەو بوو کو باندۆرا رێخستنیێ ژ سەر کەسان راکە و وەھا ژی بوو.
ئیرۆ ل رەوشا باکورێ کوردستانێ بنەرن، ھوونێ ببینن کو پترین کادرۆیێن ژ وێ زیندانێ دەرکەتنە ب تەنا سەرێ خوە تەڤدگەرن. نڤیسکارە، لێکۆلینەرە، کۆلۆمونیستە. دەنگبێژە و ھتد پرانیا وان ژ کارێ رێخستنێ درەڤن. ناکەڤن و ناخوازن بکەڤن ناڤا کارێ رێخستنیێ. لێ یێن ھەری زێدە پارتیان رەخنە دکن ژی ئەو ب خوە نە.
ھەر جارێ تێزەکێ دهاڤێژن ھۆلێ و دبێژن: “ئەڤ رێخستنێن ئیرۆ بەرسڤا پێڤاژۆیا نھا نادن. رێخستنێن مە ئێدی دەم و زەمانێ خوە قەداندنن. ژ مە رە رێخستنەکا نووژەن لازمە”. لێ ژ بۆنا رێخستنەکا نووژەن چ لازمە، نابێژن و نانڤسینن و ژ بۆنا وێ ژی چ کار و خەباتێ ناکن. ھەمی تشتێن وان تەنێ د نڤیساندنێ دە دمینە. ھەلبەت نڤیساندن ژی باشە، رێ نیشاندان کارەک و ئەرکەکی پیرۆزە. لێ یا ئیرۆ ژ بۆی مە کوردان لازمە، کارێ رێخستنی و ب ھێزە. بەرپرسیاری ئەوە کو ھەرکەس ژ بۆنا ئازادیا گەلێ خوە، ریسکێ بکە و دەستێن خوە بێخن بن وی کەڤرێ کو دێ رۆژەکێ وەلات ئازاد بکە.
لێ تو بالا خوە ددێ ژ بۆنا رێخستنەکا نووژەن ژی چ پێشنیارێن وان یێن کۆنکرێتی تونەیە. کێمانی چنە و چاراسەری دڤێت چبە، نابێژن و ب خوە ژی ھەول نادن کو تشتەکی وەھا پێک بێ. ژ بۆنا کارێ رێخستنێ ژی ب سەر نەکەڤە، ھوورک و رندک رەخنەیێن خوە دکن. ژ بیر دکن کو بێ رێخستنی وەلاتێن داگیرکری زەحمەتە کو ئازادیا خوە ب دەست بخن و سەرخوەبوونا خوە راگھینن.
ژ بۆنا ڤان کێماسیێن ھەیی، بێنە چارەسەرکرن دڤێت ئاقلمەندێن مە، سەرۆک و رێبەرێن مە، پارتی و ھێزێن مە، رەوشا وێ زیندانێ ژ نوودە بەرچاڤ بکن. دێ ببینن کو تشتێن د وێ دە دکرن و دئانین سەرێ مە، نھا پرانیا قەھرەمانێن وێ دەمێ، ب دلێ خوە پێک تینن.
ژ بۆنا کو ئەم بکاربن وەلاتێ خوە ئازاد بکن، ژ بۆی مە رێخستنەکا ھەڤدەم، ب ھێز و قاوەت لازمە. رێخستنەکا خوەدی ئابۆریەک باش و خوەدی دیپلۆماسیەک رند پێویستە. ما گەلۆ ئەم کی-کێ ڤێ نزانین. مادەم ئەم دزانین دڤێت ئەم ب خوە ژی بکەڤن ناڤا کار.
ئەم دزانین لێ ناخوازین فێر ببین کو ئەڤە ب ھەڤکاریا مە ھەمیان دکارە پێک بێ. ھەگەر ئەم ل ھەڤ بن، تەعدا و ئێشکەنجەیێن وێ زیندانێ بینین بیرا خوە، ئەم دێ بکاربن ب ھەڤرە وێ پارتیا کو گەلەک دبێژن و ناکن، پێک بینن. ھەگەر ئەم ھەر یەک ژ ئالییێ خوە ڤە دەستێن خوە بدن ھەڤ، ئەم دێ ببن خوەدی رێخستنەکا ب ھێز. ھەگەر ئەم ھەر یەک ل گۆر ئیمکانێن خوە د وارێ ئابۆری دە ئالیکاریا پارتیێن خوە بکن، دێ ئاستەنگیێن ئابۆرییا رێخستنان رابن.
ھەگەر پرانیا نڤیسکار و رەوشەنبیرێن کورد، خوە ب رێخستنی بکن و د ناڤا پارتیەکا سیاسی دە جھێ خوە بگرن، دێ ئەو پارتی ژی ببە خوەدی ھێزەک ژ نڤیسکار و رەوشەنبیران. د کارێ رێخستنی دە کەسێن ب تەنێ نامینن. ژ بۆنا ئەم ژ تەنێبوونێ خلاس ببن دڤێت ئەم ببن خوەدی رێخستنەکا کو خوەدیتیێ ل مە بکە.
دڤێت ئەم ڤێ یەکێ باش بزانبن کو ئازادیا وەلاتەکی داگیرکری ب سایا رێخسنەکا خورت، خوەدی ئابۆریەک باش و ھەڤگرتی دکارە پێک بێ. بێی ڤێ ئەم دکارن وەکە شەخس خوە خەلاس بکن. لێ دێ برایێن مە د بن دارێ داگیرکەران دە بنالن. ئەم دکارن وەکە شەخس ببن خوەدی پەرە. لێ دێ کەسێن مە یێن فەقیر ژی ژ برسا دا بمرن یان کۆرە ببن.
ھەلبەت هیچ تشتەک وەکە ئازادیێ خوەش نینە. لێ ئازادیا شەخسی دەمکییە. ژ بەر کو داگیرکەرێن تە، چ دەمێ بخوازن مال و ملکێ تە دکارە ب رەحەتی ژ تە وەربگرە. تو گاڤەکێ زێدە باڤێژی تە دخە زیندانێ. یانی فرسەتا کو تو بکاربی ئازادیا خوە ل گۆر خوە بژی نادە تە.
مادەم رەوش ئەڤە دڤێت ئەم خوە ب رێخستنێ بکن. بێ رێخستنەکا نەتەوەیی خورت و خوەدی ئابۆریەک باش و ئیمکانێن ھێژا ئازادی پێک نایێ. ئەو ژی ب رێیا ھەمی پارتی و رێخستنێن کوردستانێ ب ھەڤرە، پێکانینا ئەنیەکا نەتەوەیی یە.
ژ بۆنا زارۆکێن مە سبێ ل وەلاتێ خوە ئازاد بژین و ئەو وەلاتێ خوە ب رێڤە ببن، دڤێت ئەم ئیرۆ ب ھەڤرە بن. یەک دەنگ و یەک ھەلوەست بن. رێیا ئازادی و سەرخوەبوونێ ب رێخستنی ب سەردکەڤە. لەورا ژ بۆنا ئەم نەبن خوەدی رێخستنەکا نەتەوی و ھێزەکا خورت، دژمن و پەکەکە کارێ خوە باش دکن. گەلۆ چما ئەم کارێ خوە ناکن؟؟ (وێ بدۆمە)
