سەردانا دەم پارتیێ بۆ ھەولێرێ و بوویەرێن دەما سەردانێ گەلەکی د رۆژەڤا مەدیایێ دە بوون. شاندا وان ژ ئالیێ سەرۆک بارزانی ڤە ب گەرمی ھات پێشوازیکرن، ژ ئالیێ نێچیرڤان بارزانی ڤە ب ڤیانەکە مەزن ھاتە پێشوازی کرن و لگەل پارێزگارێ ھەولێرێ ئومێد خۆشناو ب دۆستانی گەریییان. ئەندامێن دەم پارتیێ ل کەلھا ھەولێرێ چای ڤەخوارن، لگەل خەلکی ئاخڤین، کەنین و سۆحبەت کرن. د راستیێ دە، کورد نە ئەوقاسی ل سەر گۆتووبێژێن د ھەڤدیتنێ دە، لێ زێدەتر ل سەر کو ئالیێن کوردی ب ڤی ئاوایی ب رێز و دۆستانی ھەڤ پێشوازی کرن کێفخوەشن. بەرتەکێن ب ھێڤی، ب هەست و مرۆڤی یێن کوردان ل ھەمبەر ڤان دیمەنان نە تەنێ ھەلوەستەکا عاطفیە، ئەڤ ھەلوەستا ئایدۆلۆژیک و سیاسی یا راستەقینەیە کو دێ کوردان ژ ناڤا ھەرییا کۆلۆنیزما کو تێدە ھاتنە بناخکرن رزگار بکە. ناڤێ ڤێ نەتەوەپەرەستییە. بێیی جوداھیا پارت، ھەرێم، باژار و ھتد، کوردان حەزکرن ھەلوەستەکا سیاسی ھەلوەستا یەکانەیە کو دێ نەتەوەیێن بندەست رزگار بکە. لێ مخابن کورد وەکە پێدڤی ناکن.

شوونا کو کورد د 30 سالێن داوی دە ب ھەستێن نەتەوەیی ھەڤدو ھەمبێز بکن، ھەرێم ل ھەڤ ھاتنە دژمن کرن، پارت و رێبەر ژ دژمنێن ھەری مەترسیدار زێدەتر ب گەلێ کورد ھاتنە نیشاندان، ئەڤە پۆلیتیکایا پەکەکێ یە. پەکەکێ ل ھەر دەرێ دژمنێ ھەموو کوردانە. ئەگەر چەند پارتیێن کو ئەو دکارن ل پەی خوە بھێلن ھەبن، دەما کو ئەو دبن دژمنێ ھندەکێن دن، وان وەکی ھەڤالبەندێن خوە دبینن.

بەدران ئۆزترک و کەسکین بایندر ل ھەولێرێ چ فکرین

رێڤەبەریا ھەولێرێ، نە وەک کو شاندەک ژ دەریێ سینۆرێ خابوورێ ڤە ھاتبە، لێ وەک برایێن کو سالانە ھەڤ نەدیتنە، پێشوازی ل وان کر. ھەتا نھا چ ئەندامەکی دەم پارتیێ ل چ دەران ئەوقاس، حەزکرن و رێزداری نەدیتیە.

و ھەتتا دگەل ھەموو بێرێزیێن کو ھندەک کەسێن د ناڤ شاندێ دە ل دژی بارزانی و پەدەکێ کربوون، دیسا ژی ب رێزداری ھاتن پێشوازیکرن. بەدران ئۆزترک، یەک ژ ئەندامێن شاندێ، ھێژ د ئیلۆنا 2023 دە لگەل ژنان ل دەریێ سینۆری یێ خابوورێ ل دژی بارزانیان مەشەک لدارخستبوو.

کەسکین بایندر د دژمناتیا پەدەکێ دە ئەوقاس پێش ڤە چووبوو کو پەدەکە وەکە “کوردستانا باشوور داگیر کریە” تەوانبار دکر.

ئەڤ ھەر دو کەس ژی کادرۆیێن پەکەکێ ل ترکیێ نە. کەسکین بایندر د تەمەنەکی زارۆکاتیێ دە کەتبوو زیندانێ، چەند سال بەرێ دەرکەتبوو و ئەو کەسەکە کو د راستیێ دە نزانە ل دنیایێ تشتەکی ل دەرڤەیی پەکەکێ ھەیە یان نا. کەسکین بایندر پشتی سەردانا سەرۆک بارزانی ھەم بفکر بوو ھەم ژی کێفخوەش بوو. دەما کو لگەل رۆژنامەڤانان دئاخڤی، چەند جاران ب بالداری گۆت “سەرۆک بارزانی” و د چاڤێن وی دە دەما گۆتنێ رۆناھیەک خوەش ھەبوو. ئەگەر زەختا پەکەکێ ل سەر وان نەبایە، باوەر نەکن کو نە کەسکین بایندر و نە ژی یێن دن ب ڤی رەنگی دژمناتیا پەدەکێ کربا. ھێژ دەما کو شاند ل ھەولێرێ بوو، ھندەک نڤیسکارێن پەکەکێ رەخنە ل کەسکین بایندر کرن ژ بەر کو گۆتبوو “سەرۆک بارزانی” و ئەو ب “بێھشی” تاوانبار کرن.

ئەم نزانین پشرە دێ چ بکن. ئەم دێ ببینن کا دێ وەک دۆستەکی راستین تەڤبگەرن یان دەما سەردانێ وەک دۆست خویا بکن لێ گاڤا چوون مالێن خوە دێ دژمناتیێ بکن.

سەرۆک بارزانی مرۆڤێ گۆتووبێژ، وەفا و عەفووکرنێ یە

ھندەک دبێژن کو پەدەکێ چما ئەو قەبوول کرن، ناڤێن کەسێن وەکی بەردان ئۆزترک و کەسکین بایندر کو راستەراست سڤکاتی کرنە دڤیابوو ژ لیستەیێ دەرکەڤن، پەدەکە نزانە وان چ کریە”. نا، پەدەکە دزانە ئەو کی نە. بەلکی ھەتا ھندەک تشتێن دن یێن کو رایا گشتی نزانە ژی دزانە. لێ چاوا کو د خوەزایا پەکەکێ دە دژمنایەتیا ھەموو کوردان و تێکۆشینا ل دژی وان ژ بۆ بدەستخستنا ھندەک تشتان ھەیە، د ھێڤینێ پەدەکێ دە ژی “ھەڤپەیمانیا کوردان، گۆتووبێژ، وەفا و عەفووکرن” ھەیە.

ژ بۆ پەدەکێ، گۆتنێن پێشەوایێ نەمر مەلا مستەفا بارزانی کو تیرێژێ ددە پەدەکێ بنگەھینن: “دژمنێن مە کوردێن باش دکوژن، ئەگەر ئەم ژی کوردێن خراب بکوژین، کورد ل دنیایێ نامینن.”

سەرۆک بارزانی ژی گەلەک جاران ل سەر ڤێ مژارێ راوەستیا. وی ب گۆتنا “ئەم ئێریشی چ کەسی ناکن، لێ ئەم دێ بەرسڤێ بدن ھەر کەسێ کو ئێریشی مە بکە” ھەلوەستا خوە دیار کر و ھەر دەم گرنگی دا دانوستاندن و ھەڤکاریا د ناڤبەرا کوردان دە. گەلەک کەس، ھەتتا ھندەکا د ناڤ پەدەکێ ژی، دگۆتن کو ئەڤ خەتا سەرۆک بارزانی “ژ ئالیێ ھندەکێن دن ڤە تێ بکارئانین.” لێ راستی ئەڤە کو، ئەگەر ئیرۆ کورد ھەڤ ناکوژن، تەقێ ل ھەڤ ناکن و سەرباری ھەر تشتی، شاندا دەم پارتیێ دکارە ھەرە ھەولێرێ، ئەڤ ژ بەر ڤێ ھەلوەستا ب روومەتا سەرۆک بارزانی یە. ژ بەر کو سەرۆک بارزانی چ جاران پران ژ بۆ دانووستاندن و ھەڤدیتنێن ناڤبەرا کوردان ناشەوتینە، کورد ئیرۆ پتر د ئاشتیێ دە نە. ئەگەر ل گۆری لیستکا پەکەکێ یاری هاتبا کرن، دا خوین رژیت.

پەدەکە نە نها، ژ سالا 1983 ڤە ژ ئالیێ پەکەکێ ڤە ب دەھان جاران ل پشتڤە هاتیە خەنجەر کرن، دیسا ژی چ جاران بنگەھێ ژ بۆ دیالۆگێ زوھا نەکر.

ھەر کەسێ کو دخوازە ژ بۆ کوردان گاڤەکی باڤێژە، دێ رۆژەکێ ل دەریێ بارزانیان بخە

د دەرڤەیی دژاتییا سالێن بەرێ، ب تایبەت ژ سالا 2014 ڤر ڤە، پەکەکە ل دژی پەدەکێ شەرەکی مەزن و پرئالی دمەشینە. ئەڤ ئێریشا پەکەکێ یا ل دژی پەدەکێ کو د ناڤ دە دەرەو، ڤڕ، کۆمپلۆ، بێرێزیکرن و ئالیێن لەشکەری، سیاسی، دەروونی و دیپلۆماتیک ھەبوون، زرارەکا مەزن دا کوردان. پەکەکێ ب پشتگرییا ھێزێن ھەرێمی و ھندەک لۆبیێن ناڤنەتەوەیی، سیاسەتەکا وسا مەشاند کو پەدەکێ بچووک بکە و دەست داینە سەر دەستکەفتێن پەدەکێ. ئەڤ ھەلوەستا خایین و نەیارتیێ ل شەنگالێ، رۆژئاڤا و ھەرێما کوردستانێ ب ئاوایەکی زەلال تێ دیتن. پەکەکە ب سالانە دبێژیتە جەماوەرێ خوە، “پەدەکە ئیسال دێ ھلوەشە، سالا پێش دە دێ ب داوی هێت” و ب ڤی ئاوایی بەردەوام ھێڤیەکێ ددە وان و وان سەردا دبە. لایەنگرێن وان ژی باوەر دکن کو پەکەکە دکارە پەدەکێ ھلوەشینە.

لێ راستی ئەڤە کو ژ سالێن 1930 ڤر دە، ب سەدان ھێز، ب سەروەریا ئینگلیزان و ھێزێن ھەرێمی یێن وەک ئیراق، ئیران، ترکیە، و پارتیێن وەک یەنەکێ و ئەل-قاعیدە، نەکارین پەدەکێ ھلوەشینن. پەکەکە ژی قەد نکارە ڤێ بکە.

خالا یەکەما بەرنامەیا پەدەکێ و پارادیگمایا وێ، ئاخا کوردستانێ و ئازادیا کوردانە. بارزانیان دەمەکێ درێژە کو ژ سینۆرێن عەشیرەت و کۆنفەدەراسیۆنەکێ دەرباسی بوونە. بارزانەتی بوویە ھەلوەستەک کو لگەل کورد و کوردستانیبوونێ ھاتیە ھەماھەنگکرن. ژ بەر ڤێ، د 100 سالێن بۆری دە، دەما کو کورد تێن بیرا مرۆڤان، بارزانی تێ بیرا مرۆڤان. ئەڤە دەستکەفتەکێ مەزن و گرینگا دیرۆکا کوردە. ژ بەر ڤێ، ھەر کەسێ کو دخوازە گاڤەکێ ژ بۆ پرسگرێکا کورد باڤێژە، د داویێ دە دێ هەرە و ل دەریێ بارزانیان بخە.

ھەتا پارتیەکا کەمالیست وەک جەهەپێ ژی، گاڤا پێدڤی ب ھەبوونا تێکلیەکا نێزیک لگەل کوردان دیت، د سالا 2021 دە ھات ھەولێرێ و لگەل بارزانیان جڤیان. حەتا سڕی سوورەیا ئۆندەر ژی، ژ بەر کو ھای ژ راستیێ ھەبوو، د ھەڤدیتنا ل پیر مام دە، دەستێ سەرۆک بارزانی ب ھەر دو دەستێن خوە گرتبوو.

مەشاندنا سیاسەتا ئەنتی بارزانی یا پەکەکێ، ب تایبەت د دەھ سالێن داوی دە، د بنگەھا خوە دە سیاسەتا ئەنتی کوردستانییە. لێ پەدەکێ ژ بۆ ھەڤکاری و گۆتووبێژێ لگەل کوردان د ھەر مەرجەکی دە، ئەنجاما سیاسەتا وێ یا کوردستانی و د جەوھەردە سییاستا مللی یا نەتەوەیی یە.