پشتی کو 3 مەھ د سەر رووخاندنا رەژیما ئەسەد رە دەرباس بوون. ھەتا نھا ھەسەدە، مەسەدە یان ژی رێڤەبەریا خوەسەر چ داخویانیێن فەرمی یان بەلگەیێن ل سەر خوەستەکێن کوردان پێشنییار نەکرنە. د نیقاشێن کو ل سەر رۆژئاڤا دە جھێ کو زارۆکێن کورد ژ ھەر چار پەرچەیێن کوردستانێ جانێ خوە فەداکری و خوینا خوە رشتی، قەت ناڤێ کورد-کوردستانێ دەرباس نابە. ھەسەدە ژ بۆ کوردان چ دخوازە؟ ژ بۆ زمانێ دایکێ یێ کوردی چ دخوازە؟ ژ بۆ پەترۆلا رۆژئاڤا چ دخوازە؟ کەسەک دەربارێ ڤان مژاران دە تشتەکێ نزانە.
رۆژا 18 شوباتێ پێکھاتەیێن پەکەکێ ھەسەدە-مەسەدە و رێڤەبەریا خوەسەر یا رۆژئاڤا ل ھەڤ جڤیان. وان راگھاندن کو ل سەر 8 خالان ل ھەڤ کرنە:
1- ھێزێن ھەسەدێ دێ ببن بەشەک ژ ئارتێشا سووریێ.
2- یەکگرتنا خاکا سووریێ دێ بێ پاراستن.
3- ھەموو دەزگەھێن دەولەتێ ل باکور و رۆژھلاتێ سووریێ دێ چالاک ببن.
4- شەرڤانێن بیانی دێ ڤەکشن.
5- تێکلیێن لگەل رێڤەبەریا سووریێ دێ هێن خورتکرن.
6- سەرۆککۆماریا ئەھمەد ئەل شارا دێ بێ ناسکرن.
7- ھەموو پەنابەر دێ ڤەگەرن مالێن خوە.
8- ژ بۆ جێبەجێکرنا ڤان 7 بریارێن سەری، میکانیزمەکا ھەڤپار دێ هێت ئاڤاکرن.
ئەڤ 8 خالە دێ چارەنووسا کوردستانا رۆژئاڤا دیار بکن و ئەڤەنە ئەو خالێن کو رێڤەبەریا رۆژئاڤا ل شامێ ل سەر دانووستاندنا دکە. لێ یا بالکێش ئەڤە کو د ناڤ ڤان خالان دە قەت بەحسا کورد و کوردستانا رۆژئاڤا نایێ کرن. ھەتا بریارێن ڤێ جڤینا گرینگ نە کەسەکی کورد بەلکو کەسەکی عەرەب ب ناڤێ ئەبوو عۆمەر ئەل-ئدلبی راگھاند.
ھەکە بەری کو رەوشا سووریێ ب تەمامی زەلال ببە، ھوون ژ بۆ ناسنامە و خوەبرێڤەبرنا کوردان تشتەکی نەخوازن، و ھوون ھەر “سووریا دەمۆکراتیک، یەکتیا گەلان و ھتد” د دەڤێ خوە دە بگەڤزینن، پاشێ ھوون نکارن تشتەکی بۆ کوردان بخوازن. بازرگانی ژی وسایە. گاڤا ھوون ئۆتۆمۆبیلەکێ دفرۆشن، ھوون پێشی نرخەکی بلند دبێژن و پاشێ کێم دکن. دڤێت ھوون پێشی نیڤ-سەرخوەبوونێ ژ بۆ کوردان بخوازن، دا کو پاشێ ھوون بکاربن بگھیژن فەدەرالیزم یان ژی خوەسەریێ.
ھندەک کەس دبێژن “ھەسەدە ناڤێ کورد و کوردستانێ ب کار ناینە دا کو د ھەرێمێ دە ھەستیاری چێنەبە”.
ئەڤ گۆتنە ژی نە راستە، ژ بەر کو چەند رۆژان بەرێ، د رۆژا 15ێ شوباتێ دە، ئالدار خەلیل ل مەیدانان سلۆگان ئاڤێتن و گۆت “بێ سەرۆک ژیان نابە، بێ سەرۆک سووریا دەمۆکراتیک نابە”.
یێن کو دبێژن “بێ ئۆجالان ژیان نابە” نابێژن “بێ کوردستانا رۆژئاڤا ژیان نابە”. ئەو کەسێن کو دەست ژ ناڤێ ئۆجالان بەرنادن، مخابن دەست ژ ناڤێ کوردستانێ بەرددن. ب راستی ژی، سەدەمێن ڤێ رەڤا ژ ناسنامەیا کورد و کوردستانی یا رۆژئاڤا، باندۆرا ئایدۆلۆژی و پۆلیتیکایێن ئۆجالانە.
رۆژا 2یێ شباتێ، رێڤەبەریا خوەسەرا رۆژئاڤا گۆت کو ئەو کۆنفەرانسا سەرکەفتنێ – کو تێ دە ئەحمەد ئەل شەرع وەک سەرۆکێ نوویێ سورییێ ھاتە راگهاندن – ناپەژرینە. 15 رۆژان پشتی ڤێ راگھاندنێ، ھەمان رێڤەبەرییا خوەسەر پیرۆزباھی ل ئەحمەد ئەل شارع کر. گەلۆ د ڤان 15 رۆژان دە چ قەومی؟ چ گوھەری؟
تشتێ کو گوھەری ئەڤە: نامەیێن عەڤدللا ئۆجالان گھیشتن رێڤەبەریا رۆژئاڤا و ئۆجالان خوەست کو ئەو ناسنامەیا کوردی یا رۆژئاڤا نەدن پێش. ئۆجالان خوەست کو ھەرێما رۆژئاڤا تەڤلی شامێ ببە.
وەلێ خویایە کو سازیێن گرێدایی پەکەکێ ل رۆژئاڤا ئەڤ خەتە پەژراندنە. ژ بەر ڤێیە کو د رۆژێن یەکەم یێن پشتی رووخاندنا رەژیما ئەسەد دە، رێڤەبەریا رۆژئاڤا – ب ترسۆنەکی – بانگ ل کوردان کر ژ بۆ یەکتیێ وێنەیێن ئۆجالان راکن. نھا، تەڤی کو ئەنەکەسە ژ ئۆپۆزسیۆنا سووریێ ڤەقەتیایە، لێ هەسەدە نیقاشێن یەکتیێ لگەل ئەنەکەسێ پاشدە خستنە و ب تەنا سەرێ خوە دچن شامێ. ھەر وھا، وێنەیێن ئۆجالان دیسا ل کۆلانێن رۆژئاڤا ھاتن دالقاندن.
رێڤەبەریا رۆژئاڤا ئەگەر ل گۆر پەرسپەکتیفێن ئۆجالان تەڤبگەرە، دێ بکەڤە ناڤا شاشیەکێ. ئۆجالان کوردایەتییا باکور د بن ناڤێ دەمۆکراتیزەکرنا ترکیەیێ دە ژ ناڤبر. نھا ژی دخوازە د بن ناڤێ دەمۆکراتیزەکرنا سووریێ دە ناسنامەیا کوردی یا کوردێن رۆژئاڤا بقەدینە.
دڤێت رۆژئاڤا چارەنووسا خوە نەخە دەستێ قەندیل یان ئۆجالان و ئاژاندایێن پەکەکێ یێن ڤەشارتی.
دڤێت رۆژئاڤا نەبە ئاموورەکێ دانووستاندنێ د دەستێ قەندیل و ئۆجالان دا.
دڤێت رۆژئاڤا نە ل سەر دەمۆکراتیزەکرنا سووریێ، لێ ل سەر گارانتیکرنا مافێن کوردان تەڤبگەرە.
دڤێت کەسێن د رێڤەبەریا رۆژئاڤا دە ناسنامەیا پەکەکێ دەینن ئالیەکی و ناسنامەیا کوردستانی و رۆژئاڤاتییێ وەک بنگەھێ خەباتا خوە بپەژرینن.
