دوهـ ل گوندێ گوهەرزێ بوویەرەکا نەخوەش قەومی کو تێ دە 3 گەریلا د بەر چاڤێن گوندیان دە هاتن تەرۆر کرن.
مەدیایا پهكهكێ وەک هەر جار راستیا بوویەرێ ڤەشارت و خوەست ڤەگوهەرینە دژمناتیا پهدهكێ. رۆژنیوز، دەزگەها راگهاندنا پهكهكێ، د رووپەلێن خوە یێن سۆرانی و ترکی دە بوویەر ب ئاوایێن جودا نڤیساند و ئیدیعا کر کو هێزێن گرێدایی هەرێما کوردستانێ تەقە ل 3 گەریلایان کرنە و ترومبێل تهقه ژێ هاتیه كرن تابلۆیا هەرێما کوردستانێ پێڤەبوو. لێ بەلێ راستی ژی یا کو پهكهكە هەول ددە چەوت بکە گەلەک جوداتر و زێدەتر بوو.
ل گوهەرزێ چ قەومی؟
د بوویەرا کو دوهـ ل دەردۆرا گوندێ گوهەرزێ یێ گرێدایی ئامێدیێ قەومی دە، 3 گەریلایێن پهكهكێ ژیانا خوە ژ دەست دان. چەکدارێن پهكهكێ ژ هێلا ئارتێشا ترک یێن هاتن هەدەفگرتن.
گوندێ گوهەرزێ ل سەر رێیا ئامێدیێ و دێرهلۆكێ یە. ئەڤ گوند ل سالێن داوی بوویە یەک ژ ناڤەندێن سەرەکە یێن پەڤچوونا پهكهكێ و ئارتێشا ترک ل دهڤهرا نهێلێ. بوویەرا کو دوهـ قەومی ژی بەردەوامیا ڤێ پێڤاژۆیا سێ سالی یا پەڤچوونا پهكهكێ-ئارتێشا ترکیێ یە.
ل گۆری ئاگاهیێن کو خەلکێ گوهەرزێ دانە، شەڤا 21ێ سباتێ، یانی شەڤا بەریا بوویەرێ، پهكهكێ هن ئێریشێن «تهعجیزی» ل دژی لەشکەرێن ترک کرنە، لهشكهرێن كو ل گوهەرزا کەڤن بنگەهەک ئاڤا کرنە. ل گۆری گوندییان، تیما پهكهكێ یا کو دخوەست ژ جەوێ بارانی سوود وەرگرە و ئێریشێ بکە ب سەر نەکەت. لێ ژ بەر تاریاتیێ یەکینەیێن ئێریشکەر نەگهیشتن خوه ڤەکێشن. وان خوەستن د تۆنێلێن ل دەردۆرا گوندێ گوهەرزێ دە خوە بپارێزن.
لهشكهرێن ترك رۆژا دن سبەهێ دەست ب ئۆپەراسیۆنەک بەرفرەه یا لێگەرین و کۆنترۆلێ دکن. گەریلایێن پهكهكێ ژ تۆنێلێن ل دەڤەرێ دەردکەڤن. دەولەتا ترک ل جهێ کو ژێ رە دبێژن گوندێ کەڤن کو 700 مەتران دووری گوندێ نوویە، قاراقۆلەک ئاڤا کریە. ب ئحتیمالەکە مەزن گەریلا تەخمین دکن کو دێ لەشکەر وەرن و ئهو هەول ددن دەرباسی تۆنێلەکا ئەولەتر ببن. بێچەکبوونا چەکدارێن پهكهكێ ژی ئالیەکی جهێ گومانێ و فکارێ یە.
سێ گەریلایێن کو کەتن بن شۆپاندنا تەکنیکی یا هێزێن ترک، ژ ئالیێ هێزێن ترک یێن ل هەرێمێ ڤە د ناڤ کاڤلان دا هاتن دۆرپێچکرن و هاتن تهرۆر کرن. بوویەر ل دەردۆرا سائەت 3یێ پشتی نیڤرۆ قەومی.
پشتی بوویەرێ خهلكی ئاگاهی دا هێزێن ئەولەکاریێ یێن ئامێدیێ. و ب فەرمانا هەمان هێزێن ئەولەکاریێ، خهلكی تەرمێن هەر سێ گەریلایان راکرن و ل گۆرستانا گوندی دەفن کرن.
یێن تەقە ل چەکدارێن پهكهكێ کری لەشکەرێن ترک بوون
یەکینەیێن ترکیێ یێن کو 3 گەریلا تهرۆر كرین ب جل و بەرگێن لەشکەری بوون و راستەراست ژ هەرێما 700 مەتری یا دووری گوهەرزا نوو کو لەشکەرێ ترک ل بهارا بۆری بنگەهەک لێ ئاڤا کربوو دەرکەتنە، ئەڤ یەک ژ ئالیێ گوندییان ڤە هاتییه پشتراستكرن. هەر وها ژمارا ترومبێلێ نه یا ههرێما كوردستانێ بوو. ل سەر ترومبێلێ هەژمارەکە تایبەت هەیە.
تەڤی کو بوویەر راستەراست ژ ئالیێ ئارتێشا ترک ڤە هاتیە کرن، پهكهكێ و دەردۆرێن نێزیکی وێ نووچەیا کو «میتێ ب هاریکارییا پێشمەرگەی کرییە» بەلاڤ دکن، ئەڤ ژی نیشانا وێ یەکێ یە کو پهكهكە دخوازە هەرێما کوردستانێ و خەلکێ گوهەرزێ تاوانبار بکە.
بەرپرسێ بوویەرا ل گوندێ گوهەرزێ سیاسەتا پهكهكێیە: قوربانی ژی گوندی و شەرڤانێن رەبەنن
مەدیایا پهكهكێ هەول ددن رهوشهكه وهسا بئافرینه کو قەی ل هەرێمێ قەد لەشکەرێ ترک تونەیە، ئەندامێن میتێ ژ باژاران ب ترومبێلان هاتنە و گەریلا کوشتنە. لێ بەلێ هەموو چیایێن درێژ و لووتکەیێن بریارگەها پهكهكێ یا قەدیم ل زاپێ ژ ئامێدیێ هەتا شێلادزێ، ژ بلی تۆنێلێن کو ژێ رە دبێژن گرێ بهارێ، د دەستێ ئەسکەرێ ترک دایە. سەدەما کو لەشکەرێن ترک ئەوقاس کەتیە ناڤ ئاخا هەرێما کوردستانێ ژی پهكهكە ب خوە یە.
پهكهكە ژ سالا 2018ێ ڤە هەرێمێن حهفتهنین، مەتینا، ئاڤاشین، بەهدینان و خاکورکێ پەرچە پەرچە ژ دەولەتا ترک رە هشت. پشتی دیرۆکا دەستپێکا ئۆپەراسیۆنان، حکوومەتا هەرێما کوردستانێ داخواز کر کو پهكهكە خەتا سینۆر بەردە و هێزێن پێشمەرگە ل وان دەڤەران ب جهـ ببە. پهكهكێ ئەڤ داخواز رەد کر و گۆت هەکە پێشمەرگە وەرە ئەمێ بکن سەدەما شەر. حکوومەتا هەرێما کوردستانێ ڤێ جارێ پاسەوانێن سینۆر یێن ئیراقێ ئینانه هەرێمێ. پهكهكێ ئێریشی وان ژی کر و قەبوول نەکر کو ئەو ژی ل هەرێمێ ب جهـ ببن. خەلکێ دەڤەرێ گەلەک جاران ژ ههپهگێ رە گۆت «بهێلن بلا هێزێن پێشمەرگە بێن دەردۆرا گوندێ مە». ژ بۆ كو ترک نەهێن لێ پهكهكێ داخوازا خهلكی قەبوول نەکر. پهكهكێ دهڤهر رادەستی ئارتێشا ترک یا داگیرکەر کر.
ئەگەر پهكهكێ د سالا 2018ێ دە قەبوول کربا کو هێزێن پێشمەرگە بێن هەرێمێن مەترسی ل سەر، وێ دەمێ نها لەشکەرێن ترک ل ڤێ دەڤەرێ نەدبوون.
گوندێ گوهەرزێ د ناڤ پەڤچوونێ دە ما
پهكهكێ د سالا 2021ێ دە ئێریش بره سەر هێزێن پێشمەرگەیێن کو دخوەستن دەردۆرا ئامێدیێ بگرن و 5 پێشمەرگە شەهید کرن. هەمان سالێ ل نێزی گوهەرزێ دیسا ئێریشی خالا کۆنترۆلا پێشمەرگە کر و پێشمەرگەیەکی دن شەهید کر. د سالا 2023ێ دە دیسا ل هەمان هەرێمێ ئێریشی هێزێن پێشمەرگە کر. پهكهكێ کو دەستوور نەدا پێشمەرگە بکەڤن هەرێمێ، پشترە د ناڤ سالەکێ دە هەرێم ب تەمامی رادەستی ئارتێشا ترك کر. خەلکێ ل دهڤهرا ژ ئامێدیێ هەتا دێرهلۆكێ دژین ڤێ دپرسن؟ ئەگەر پهكهكێ د وەختێ خوە دە ئەڤ دهڤهر رادەستی پێشمەرگە كربا ئەڤ پرسگرێک نەدهاتن قەوماندن. گەلۆ چما پهكهكێ نە هشت پێشمەرگە گوند و وارێن خوە بپارێزە و پاشێ هەمی دەڤەر رادەستی ئارتێشا ترک کر؟ پهكهكێ ب پلانگەری شەر کێشا ناڤا ئاخا باشوورێ کوردستانێ و خەلکێ دەڤەرێ یێ بێگونەهـ باجا ڤی شەری ددن.