ئەندامێ کۆنسەیا رێڤەبەرا کەجەکێ مستەفا کاراسوو بەشداری بەرنایەکە تایبەتا تەلەڤیزیۆنا مەدیا خەبەرێ یا پەکەکێ بوو و دیار کر کو گرێدایی بانگا عەڤدللا ئۆجالان یا 27ێ شوباتێ، پەکەکە دێ کۆنگرەیا خوە لدار بخە و دا زانین کو دڤێت ئۆجالان د پێڤاژۆیا کۆنگرەیێ دە بکەڤە دەورێ.
د بەشەکە ئاخافتنا خوە دە، کاراسوو گۆت کو دڤێت ئارتێشا ترکیەیێ پابەندی ئاگربەستا کو پەکەکێ راگھاندیە ببە و ئێرشێن خوەیێن ل سەر وان ب داوی بینە.
کاراسوو ھەر وھا دیار کر کو ژ بۆ بپێشڤەچوونا پێڤاژۆیا ئاشتیێ دڤێت مافێ ھێڤیێ ژ بۆ رێبەرێ گرتی یێ پەکەکێ عەبدوللاھ ئۆجالان وەرە بجھانین.
ئەندامێ کۆنسەیا برێڤەبرا کەجەکێ دیار کر کو رێبەرێ پەکەکێ ژ بۆ پێڤاژۆیا ئاشتیێ کەدەکە مەزن دایە و ئەو دێ پێویستیێن بانگا وی ب جھ بینن و دا زانین:
“ئەم دێ بەرسڤا ڤێ کەدێ بدن. مە ھەر تم ھەول دا بەرسڤا کەدا سەرۆکاتی بدن و ئەم تەڤگەرەکە وھا نە.”
موستافا کاراسو تەکەز کر کو ئەو دێ پەکەکێ هلوەشینن و تێکۆشینا چەکداری ب داوی بینن و گۆت:
“ئەم تم شۆپینەرێن سەرۆکاتیێ بوون، ئەم ئیرۆ ژی شۆپینەرێن وی نە. ئەم دێ ڤەگوھەرینا کو سەرۆکاتیێ دەرخستیە ھۆلێ، هلوەشاندنا پەکەکێ و داوی ئانینا تێکۆشینا چەکداری پێک بینن.
بلا گومانا کەسی د ڤێ مژارێ دە نەبە.
دەولەت و دەستھلات ژی دڤێت بێی کو چ ھنجەتان بینن د چارچۆڤەیا دەمۆکراتیکبوونێ دە تشتێن پێویست بکن.”
کاراسوو بانگا سەرۆکێ مەھەپێ دەولەت باخچەلی یا ژ بۆ ئۆجالان ژی ب بیر خست و گۆت:”
“دەولەت باخچەلی گۆت بلا بانگاوازیێ بکە ئەم پشترە مافێ ھێڤیێ ب جھ بینن.
بانگاوازی ھات کرن وێ دەمێ دڤێت مافێ ھێڤیێ وەرە بجھانین.
ھەر کەس دزانە مافێ ھێڤیێ پشتی 25 سالان بەردانە.
د بەشەکە گرینگا داخویانیا پەکەکێ دە ژی ھاتیە دیارکرن کو دڤێ مافێ ھێڤیێ وەرە بجھانین و رێ ل بەر خەباتا سەرۆکاتییا د شەرت و مەرجێن ئازاد دە وەرە ڤەکرن.
ئێدی دڤێت شەرت و مەرجێن سیاسی و یاسایی وەرن بجھانین.
ھەتا ئەڤ یەک نەبن ئەو قاس گەریلا دێ چاوا داویێ ل تێکۆشینا چەکداری بینن؟”
ئەندامێ کۆنسەیا برێڤەبرا کەجەکێ د بەردەوامیا ئاخافتنا خوە دە ب بیر خست کو وان ئاگربەست راگھاندیە و دڤێت ئێرشێن ل دژی وان ژی ب داوی ببن و ئانی زمان:
“ئەگەر ل دژی ھێزێن گەریلایان ئێرش چێببن دێ چ بکن؟
ما مافێ خوەیێ پاراستنا رەوا ب کار ناینن؟
ما دێ ببێژە فەرمۆ من دیل بگرە؟
ژ بەر ڤێ دڤێت پێبەندی ئاگربەستێ ببن.
ئەگەر پێبەندی ڤێ نەبن وێ دەمێ ئەڤ تێ وێ واتەیێ کو دبێژن ئەم ڤێ پێڤاژۆیێ قەبوول ناکن.
ب گۆتنێ قەبوول دکن لێ د پراتیکێ دە جودا بە ئەڤ یەک نابە.”
ئۆجالان رێبەرێ پەکەکێ 27 شوباتا 2025 بانگا چەکدانین و هلوەشاندنا پەکەکێ کر.
پشتی کو رۆژا 1ێ ئادارێ پەکەکێ ئاگربەست راگھاند، رۆژا دوشەمبێ ژی وەزیرێ پاراستنێ یێ ترکیەیێ راگھاند کو ئەو رێ نادن پێڤاژۆ وەرە تێکدان و درێژکرن.
نھا ژ بۆ پێڤاژۆیێ چاڤ ل سەر گاڤێن یاسایی یێن دەولەتێ و سازکرنا کۆنگرەیا پەکەکێ نە.
