ژ دامەزرێنەرێن پەکەکێ مستەفا قاراسوو بەشداری تەلەڤیزیۆنەکا پەکەکێ یا ل ئەورۆپایێ وەشانی دکە بوو و دەربارێ پێڤاژۆیێ دە داخویانی دا. د ڤێ پێڤاژۆیێ دە وی بەرسڤا رەخنەیێن ل سەر پەکەکێ و داخویانیا ئۆجالان دا و رەخنەگر تەھدیدکرن وگۆت ” دەڤێت ئەم وە بگرن”.
ئەندامێ کۆنسەیا رێڤەبەرا کەجەکێ و بەرپرسێ مەدیایا پەکەکێ مستەفا قاراسوو د داخویانیا خوە دە ھەول دا کو ئیزاح بکە کو ئۆجالان چ داخوازەکێ نەکریە، و ئیدیعا کر کو وان سەرکەفتنەک مەزن ب دەست خستیە و پەکەکە نەمرە. قاراسوو، کو بەرێ گۆتبوو “ئەز ملیتانێ شاشیێن سەرۆک ئاپۆ ژی مە”، دیسا ل گۆری گۆتنێن خوە تەڤگەریا و د ئاخافتنا خوە دە گەلەک جاران پەسنا ئۆجالان دا. قاراسوو گۆت “ئەم پەکەکێ ب تەڤاھی تەمسیل ناکن، پەکەکە تەڤگەرەکە سەرۆکاتییە، ھەموو بریاران سەرۆک ئاپۆ دگرە” خویایە کو دخوازە راستیا تێکچوونا پەکەکێ ژ گەلێ کورد ڤەشێرە.
قاراسوو د دەستپێکا ئاخافتنا خوە دە ژی ژ کەسێن کو ژ ناڤ چەپێن ترک د دەورا بۆری دە ژیانا خوە ژ دەست دانە، سەڤیم بەلی ب بیر ئانی. ھندەک سەرنڤیسێن ئاخافتنا قاراسوو وھا نە:
قاراسوو: سەرۆک ئاپۆ ژ دەمەکە درێژ ڤە ل دژی چارەسەریا دەولەت بوونێیە
د نامەیا کو ئۆجالان ژ ئیمرالیێ شاندیە دە، ئۆجالان گۆت کو ئەو ل دژی چارەسەریێن دەولەتی، فەدەرالی و کولتوورییە و ڤان گۆتنێن ئۆجالان ژ لایێ کوردان ڤە کارڤەدانێن مەزن ل پەی خوە ئانین. دەربارێ رەد کرنا ئۆجالان یا مافێن ھەری بچووک ناسنامەیەکە دەستووری یان کولتووری ژ بۆ کوردان، قاراسوو گۆت کو “ئەو رەد دکن ژ بەر کو” ئەڤ ھەموو پارچەیەکا شێوازێ چارەسەریێن دەولەتی نە” و دەوام کر: “لەورا پشتی وێ داخویانیێ، د ڤێ چارچۆڤەیێ دە کو تێکۆشینا دەمۆکراسیێ تێ مەشاندن، کەسەک ب ھێسانی نکارە ئاستەنگ بکە. ژ ئالیێ پرسگرێکا کورد ڤە، ئەڤ ھەموو نیقاش بێی رامانن. واتە ئەڤە تشتەکی جوودایە. تەڤگەرا مە، رێبەر ئاپۆ ژ دەمەکێ درێژ ڤە ل دژی چارەسەریا دەولەتبوونا کوردە. ئەو چارەسەریا دەولەتی ناخوازە. چارەسەریا دەولەتی ئیفادە ناکە. ئەو نابێژە دەولەت، نا بێژە فەدەراسیۆن. یان ژی وەکە خوەسەریا ئیداری یا کو گرتنا دەستھلاتداریێ ئیفادە دکە. وەک کو رێبەر ئاپۆ دبێژە، ئەو وان ژی باش نابینە. وان وەک چارەسەریا دەولەتی یان ژی مینا شێوازێن چارەسەریا دەولەتی دبینە. ل شوونا وێ، چارەسەری د ناڤ دەمۆکراسیێ دە، چارەسەریا دەمۆکراتیکبوونێ ئەساس دگرە. چارەسەریا دەمۆکراتیکبوونێ چارەسەریا ھەری راستە. چارەسەری د ناڤ دەمۆکراسیێ دایە. گاڤا کو دەمۆکراسی پێش بکەڤە، دەمۆکراتیکبوون پێش بکەڤە، چ دێ ببە؟ چارەسەریان ئەوێ بینە. واتە پرسگرێکا کورد ژی ب چارەسەریێن کو د دەمۆکراتیکبوونێ دەنە دێ بگھیژە ئەنجامێ.”
قاراسوو: یێن کو پەکەکێ رەخنە دکن، سڤکاتیا خوە نیشان ددن
پەکەکێ د درێژاھیا سالێن بۆری دە ھەر کەسێ کو ئەو رەخنە کریە یان ژێ دوور ماییە وەک خاین ئیلان کریە و گەلەک کەس ژ بەر رەخنەیان ھاتنە کوشتن. مستەفا قاراسوو ژی د ڤێ ئاخافتنا خوە دە کەسێن کو پەکەکێ رەخنە دکن تەھدید کرن.
قاراسوو کەسێن کو پەکەکێ رەخنە دکن ب جاھێلیێ تاوانبار کرن و گۆت: “ب تایبەتی د ناڤ ھندەک کۆمێن کورد دە نرخاندنێن وەک “د ڤێ پێڤاژۆیێ دە ستاتویەکە کوردی تونەیە، تێگەھێن مینیمالیست” ھەنە. ئەڤ کەسە ئەو کەسن یێن کورت و تەنگ دفکرن، دینامیکێن تێکۆشینێ فام ناکن، دینامیکا تێکۆشینێ، بنگەھا دیرۆکی فام ناکن و ئەنجامێن تێکۆشینا دەمۆکراسی و دەمۆکراتیکبوونێ نابینن.”
د بەردەواما ئاخافتنا خوە دە قاراسوو ب ئەشکەرە کەسێن رەخنەگەر تەھدید کرن و گۆت: پەکەکە ھەم د دیرۆکا کورد و کوردستانێ دە ھەم ژی د دیرۆکا رۆژھلاتا ناڤین دە نرخێن کو چ ھێزێن سیاسی یێن دن چێنەکرنە، چێ کرنە. نە تەنێ نرخ چێ کرینە، ھەر وەھا گەلەک ھێزێن سیاسی ژی ل سەر پیان ھشتنە. نھا ئەز باش نابینم کو ئیشارەتێ ب ڤان تشتان بکم. لێ ھەر کی ببێژە “پەکەکێ چ قازانج کر، چ ئەنجام ب دەست خست؟” ئەو خوە نیشان ددە کو ھندکە. ئەم دکارن ھەر جورەیێ بەرسڤێ بدن وان. ئەم دەڤێت وان یێن کو وەھا دبێژن بگرن.
قاراسوو: ئەڤ پێڤاژۆیە بەرسڤەکە ژ بۆ لەشکەرێن (ترک) یێن ژییانا خوە ژ دەست دایی
قاراسوو د ئاخافتنا خوە دە گۆت کو ئەڤ پێڤاژۆ بەرسڤەکە ژ بۆ ژیانا لەشکەرێن کو مرنە: “بێگومان ئاشتی پێک وەرە. ئەڤ ئاشتی ھەر وەھا بەرسڤەکە ژ بۆ بیرەوەرێن لەشکەر و پۆلیسێن(ترک) کو ل ترکیەیێ ژیانا خوە ژ دەست دانە. ژیانا وان ژی ب ڤی رەنگی تێ واتەدارکرن.”
قاراسوو: سەرۆک ئاپۆ ب تێگھێن سۆسیالیست ئەڤ خەتە پەژراندییە
قاراسوو ئیدیعا کر کو داخویانیا ئۆجالان “مانیفیستۆیا سەدسالێ”یە و گۆت: “ژ ڤی ئالی ڤە ئەم سەرۆکێ خوە ژی ب رێز و سپاسی پیرۆز دکن ژ بەر کو تێکۆشینێ، ئەڤ پێشکەتنە، ئەڤ گوھەرینە چێ کر و رێ ژ بۆ ڤێ گوھەرینێ ڤەکر.”
قاراسوو ھەر وەھا گۆت کو تێکۆشینا وان یا سۆسیالیستە. سەرۆکی گۆت: “ئەز ڤان گاڤان وەک ئەرکێ سۆسیالیست دهاڤێژم. سۆسیالیست بوونا من وەھا تێگەهشتنەکێ دخوازە.” ژ ڤی ئالی ڤە، گەلۆ “سەرۆک چاوا گھیشت ڤێ پرۆژەیێ؟” بێ پرسین، ھەر کەس بزانە کو سەرۆک ئاپۆ ب شەخسیەتا خوە یا سۆسیالیست گھیشت ڤێ نوقتەیێ. دڤێت ئەڤە ژ بۆ ھەر کەسی زەلال بە.
قاراسوو ھەول دا کو تێکچوونا ئۆجالان و پەکەکێ ڤەشێرە
داخویانیێن مستەفا قاراسوو ژ ئالیێ کۆمێن سیاسی یێن کوردپەروەر ڤە ب بەرتەکان ھات پێشوازیکرن. قاراسوو ژ ئالیەکی ڤە ھەموو رەخنەگر تەھدید کرن، ژ ئالیێ دن ڤە ژی تەئۆریا بێستاتوییا کوردان چێکر. د ھەموو ئاخافتنا خوە دە پەسنا ئۆجالان دا و ئیدیعا کر کو داخویانیا وی یا ژ ئیمرالییێ ھەموو پرسگرێکێن رۆژھلاتا ناڤین چارە دکە. لێ بەلێ پەکەکێ د تێکۆشینەکا 50 سالی یا ب خوین و جان ئەنجام دایی دە پرسگرێکا کورد وەکە ڤەگوھەرینە داخوازەکا دەمۆکراتیکبوونێ پێناسەکر. چ کێشەیێن کوردان یێن نەتەوەیی، چاندی، مێژوویی، فۆلکلۆری و ژییانی چارەسەر نەکرن. پەکەکێ کورد کرن پالێ پووشی. ئەم دکارین ببینین کو قاراسوو، یێ کو د ناڤ پەکەکێ دە وەکە مووریدێ ئۆجالان تێ ناسکرن و بەرپرسێ کۆما خەباتێن ئیدەۆلۆژیکە، د ئاخافتنا خوە دە نیشان دا کو پرۆپاگاندایا بنگەھین یا پەکەکێ دێ پاککرنا ئۆجالان بە. لێ چ شێوازێن پرۆپاگاندەیێ نکارن ڤێ خییانەتا ئاپۆ-پەکەکێ یا ل کوردان کری بنوخمینە.
