Skip to contentمالا پێلیستۆكا!!
خانیه‌كێ پر مه‌زن د ناڤا باژاره‌كی ده هه‌بوو، هه‌ژماره‌كه زۆر یا زارویێن كه‌چ د بن چاڤدێرییا كه‌سه‌كی دانعه‌مه‌ر تێ ده دمان، مرۆڤ دكاره ڤی جیهی ب مالا پێلیستۆكا (بیت الدمی) ناڤ بكه و ژ زارۆیان ره ژی ببێژین پێلیستۆك. كه‌سێ كو چاڤدێرییا ڤێ مالێ دكر كۆمه‌ك یاسایان بۆ ڤان كه‌چێن زارۆ دانابوون و پێویست بوو ئه‌و پێبه‌ند بان به‌ره‌ڤاژی وێ ب توندترین ئاوا وه‌رن سزا دایین، واته ئه‌و زارۆ مینا پێلیستۆكان لێ هاتبوون و ئه‌و مال ببوو مالا پێلیستۆكان. گرینگترین یاسایێن فێركرنێ كو پێویست بوو كه‌چێن زارۆ پێبه‌ندی وان بن ئه‌ڤ بوون: «چاوا بئاخڤن، چاوا بكه‌نن، چاوا هه‌ستێن خوه یێن راستین ڤه‌شێرن».
د ناڤا وان زارۆایان ده كه‌چه‌كا پڕ لڤۆك هه‌بوو، رۆژه‌كێ ژ رۆژان وێ مال پاقژ دكر، د كوژیه‌كێ مالێ ده ده‌ریه‌كێ بچووك دبینه، وێ ده‌ری ڤه‌كر و چوو ژوور، د وێ ژوورێ ده وێ هه‌ژماره‌كه زۆر یا پرتووكان دیتن، ئه‌و پرتووك هه‌مى د قه‌ده‌غه‌كری بوون، پرتووك گرێداى فه‌لسفه و ئازادى و شۆره‌‌شێ بوون، ئه‌وێ زارۆیێ زۆر ب رژدى ده‌ست ب خوه‌ندنا وان پرتووكان كر و چه‌ند وێ پرتووكه‌ك خوه‌ندبا د بوو سه‌ده‌م كو كه‌ڤلوژانكه‌ك ژ سه‌روچاڤێن وێ بكه‌ڤه و ب بۆرینا ده‌مێ ئه‌و كه‌ڤلوژانكێن ده‌ستكرد هه‌مى ژ سه‌روچاڤێن كه‌چێ كه‌تنه خار و د ئه‌نجام ده سه‌روچاڤێن راسته‌قینه یێن كه‌چا زارۆ خوه‌یا بوون.
ئه‌ڤێ كه‌چێ بریار دا كو ب سه‌روچاڤێن خوه یێن راسته‌قینه ل همبه‌ری سه‌رپرشتیار و وان زارۆیێن كو ئه‌و كرنه پێلیستۆك ده‌ركه‌ڤه و ب ژیرى و ب هزره‌كا كوور دانوستاندنێ ب سه‌رپرشتێ مالێ ده‌ربارێ بابه‌تێن «ئازادى، راستى، هزر كرنا ب سه‌ربه‌ستى» بكه.
ڤێ نیقاشێ رۆژانه ده‌وام كر و ب قاسی كو نیقاش به‌رفه‌ره‌هـ تر دبوو، زارۆیێن دن خوه ددانه ئالێ كه‌چا ژیر و ل داویێ ئه‌و زارۆ نه‌مان ببنه پێلیستۆك، لێبه‌لێ بوون مرۆڤێن خوه‌دی هزرێن خوه یێن تایبه‌ت و ئه‌و كه‌چا ژیر گهیشته وێ فكرێ كو: چارچووڤه‌یێن ژ بۆ كۆمه‌لگه‌هێ تێن چێكرن نه تشته‌كن و ته‌نێ مالێن پێلیستۆكن و ده‌ركه‌تن ژ وان مالان ته‌نێ پێویستی ب فكرێن ژیرن بۆ خوه.
ل سه‌ر ڤێ بنگه‌هێ بوفوار فیلۆسۆفا ژن یا فرانسى دبێژه: ژ بۆ كو یێ ئازاد بى، پێویسته تو هزرێ بۆ خوه بكى.
مه ئه‌ڤ سه‌رپێهاتی ڤه‌گێرا، ژ به‌ر كو دبینم ئۆجالان پڕ قالا ئازادییا ژنێ و پاشه‌رۆژا وێ دكه، ل ڤر دخوازم ببێژم كو سه‌ربوورا پارتیا كاركه‌ران د ده‌ربارێ كه‌سێن كو ته‌ڤلی ره‌فێن وان بوویی چ كه‌چ بن و چ مێر، مینا ڤێ مالا پێلیستۆكانه، ته‌یبه‌ت ئه‌و به‌رێزێن بووینه گه‌ریلا، سه‌رپێهاتییا ڤان خۆرتان ب كورتاسی ب ڤی ئاوایی ل ژێر بوو:
پرانیا خۆرتێن بووینه گه‌ریلا ژێر ته‌مه‌نێ 18 سالیێ بوون، پارتیێ ئه‌و دبرنه دۆلا بیقاعێ و پێتری 6 مه‌هان ل دبستانه‌كه ور دهاتن په‌روه‌رده كرن، وێ دبستانێ ئه‌ڤ یاسا دانابوون «نابه هزر د مالباتێ ده بێ كرن، نابه ب ت ئاوایی پێوه‌ندیێ ب مالباتێ بێ كرن، ناڤێن وان یێن راستین دهاتن گوهه‌راندن، ژیانه‌كه دن ل سه‌ر وان دهات فه‌رز كرن كو دووری وێ ژیانا ئه‌و تێ ده ئاڤابووین، جلێن وان گوهه‌ره‌‌ندن، خارن گوهه‌رین، 8 ساعه‌تان ده‌رس ژێ ره دهاتن گۆتن، ده‌رسێن وان ده‌ربارێ سێ بابه‌تان بوون:
ئاپۆ هه‌رتشته و هه‌رتشتی دزانه.
هه‌موو هێزێن دن یێن كوردی خائینن.
هه‌موو شۆره‌شێن كوردان یێن به‌رێ نه‌شۆره‌ش بوون.
ده‌رسێن كو عه‌ڤدللا ئۆجالان ددان جارنا ژ 5 ساعه‌تان بێ نیقاش ده‌رباس دبوون، هه‌موو جورێن سازیێن مه‌دیایێ ئه‌وێن ژ ده‌رڤه‌ى پارتیا كاركه‌ران قه‌ده‌غه‌بوون، ته‌نێ ئه‌و پرتووك دهاتن خوه‌ندن یێن كو ژ وان ره دهاتن دابین كرن، ب شه‌ڤێ نه‌دبوو گه‌ریلا د ناڤبه‌را خوه ده چ نیقاشه‌كێ ل سه‌ر ژیانا به‌رێ بكن، یان هزره‌كا ده‌رڤه‌ى چارچووڤه‌یا هزرا ئاپۆ و ووسا.
واته ئه‌و گه‌نج وه‌كه پێلیستۆكان لێ هاتبوون، به‌لكو بێهتر ئه‌و بوون تووتی، ژ به‌ر ڤێ گه‌ر ته گه‌ریلایه‌ك ل دێرسمێ دیتبا و ده‌ربارێ مژاره‌كێ بئاخڤتبا، ئاخافتنا وی وێ عه‌ینی ئاخافتنا گه‌ریلایه‌كی دن با ل هه‌ر ده‌رێ، ئانگو هه‌مان ئاخافتن، هه‌مان هزر و ئیدیه‌م، واته ئه‌و مینا رۆبۆته‌كی یان پێلیستۆكه‌كێ لێ هاتبوون.
ئیرۆ پشتى راستیا پارتیا كاركه‌ران ده‌ربارێ دۆزا كوردان و مافێن كوردان خوه‌یابوویی كو تام به‌ره‌ڤاژی وان گۆتن و درووشمه‌یان بوون یێن پێ هاتنه په‌روه‌رده كرن، پێویسته ل سه‌ر وان خۆرتان مینا وێ «كه‌چا ژیر» ده‌رباسى قۆناغه‌كه دن ببن و بزانبن جیهانه‌ك دن و هزرێن دن هه‌نه، نه‌ته‌نێ ئه‌و تشتن كو ئه‌و پێ هاتنه خاپاندن، هه‌روه‌كه عه‌ڤدللا كانێ چاوا فه‌لسه‌فا «بوفوار» كریه بنگه‌ها نه‌رینا خوه ژ بۆی ژنێن كورد، ئه‌ز ژى هزرێن هه‌مان فه‌یلسوفا فرانسى «بوفوار»ێ دكه‌مه بنگه‌هـ بۆ گه‌ریلاێن كورد و كادروێن په‌كه‌كێ كو سوودێ ژێ وه‌ربگرن ده‌ما دبێژه: «ژ بۆ كو یێ ئازاد بى، پێویسته تو هزرێ بۆ خوه بكی»!.
