ئیسال ل هەر دەرێ، نە ب تەنێ ل کوردستانێ بەلکو ل تەڤ جیهانێ نەورۆز ب ئاوایەک جودا ژ ئالیێ کوردان ڤە هات پیرۆزکرن، ل باکور، باشوور، رۆژئاڤا و رۆژهلاتێ کوردستانێ ئاهەنگێن جودا هاتن سازکرن، لێ ئاهەنگا پتر ژ هەموویان بال کشاندی سەر خوە و بوویە جیهێ سەرنجێ د تەڤ مەدیایا جیهانی دە، ئاهەنگا نەورۆزێ یا کۆلنێ بوو، ژ بەر کو هەژمارەک هەری زێدە یا کوردان ژ هەر 4 پەرچەیێن کوردستانێ بێی جوداهیا حیزبی تەڤلی ڤێ ئاهەنگێ بوون، ل دیسا ژی دەستەک تاری هەبوو کو دخوەست پرسگرێکان ژ بۆی ڤێ ئاهەنگێ چێکە، ئەو دەستێ تاری و گەمار ژی پەکەکە بوو.
د رۆژا 22/3/2025 دە ب بەشداریا زیدەتر ژ 60 هەزار کوردستانیان ئاهەنگەکە قەشەنگ یا ب بۆنەیا نەورۆزێ ژ ئالیێ کوردێن دیاسپۆرێ ڤە ل باژارێ کۆلن یێ ئالمانیایێ هات سازکرن، ڤێ ئاهەنگێ بالا مەدیایا جیهانی ب تایبەتی مەدیایا ئالمانیایێ کشاند سەر خوە، د مەدیایا ئالمانیایێ دە هات گۆتن، “نیزی 100 هەزار کەسان د ئاهەنگا ب بۆنەیا نەورۆزێ ل باژارێ کۆلن ئامادە بوون، تشتا بالکش ژی ئەڤ بوو کو ت حالەتەکە دزی، دەستدرێژیا سێکسی، شەر و پەڤچوونان د ناڤا ئامادەبوویان دە روو نەدا و ئاهەنگ پر ب سەرکەفتیانە هات ئەنجامدان”، لێ د ناڤا ڤان جوانیان دە دیسا پەکەکێ خوەست ژەهرا خوە برژینە و پرسگرێکان ژ بۆی ئاهەنگێ ساز بکە.
بریار ئەڤ بوو کو د ئاهەنگا نەورۆزێ یا ل باژارێ کۆلنێ دە ت هێمایەکە حیزباتیێ نەیێ راکرن، ب تەنێ ئالا رەنگین بێ هلدان، ژ بۆی ڤێ یەکێ ژی کۆنفەدراسیۆنا رەڤەندا کوردستانی هەما بێژە ب هەموو پارتیان رە جڤیا بوو و پەیام ژ بۆی ڤێ یەکێ ژ وان رە شاندبوو، هەموو پارتیان ژی ئەڤ یەک ئەرێ کربوو، لێ بەلێ دیسا پەکەکە پابەند نەبوو، ژ بۆی دەرخستنا پرسگرێکان پەکەکە ب ئاوایەکی نهێنی کەت تەڤگەرێ، ل باژارێن جودا یێن ئالمانیایێ لگەل هند رێخستن و گرووپێن گرێدایی خوە جڤیا و بریار ستەند پرسگرێکان دەرخە، ژ بۆی ڤێ یەکێ ژی تەعلیمات ب وان گرووپان دان کو ب هلدانا وێنەیێن ئۆجالان و ئالا پەکەکێ کو ل ئالمانیایێ ل گۆری قانوونێ قەدەغەنە پرسگرێکان دەرخن، پەکەکە هەیانی رادەیەکی ژی د ڤێ پلانا خوە دە بسەرکەت، ژ بەر هلدانا وێنەیێن ئۆجالان و ئالا پەکەکێ پۆلیسان نیزی 2 دەمژمێران ئەڤ ئاهەنگ راگرت و نەهشت بەردەوام بە، لێ رێکخەرێن ئاهەنگێ ب ئاوایەکی حەکیمانە تەڤگەریان و کارین ڤێ پلانا پەکەکێ ژی تێک ببن و ئاهەنگا خوە بەردەوام بکن.
چما پەکەکێ وسا کر؟
وەک تێ زانین پێش نها پەکەکێ ل ئەورۆپایێ پرانیا ئاهەنگێن نەورۆزێ برێڤە دبرن، ئەڤ ئاهەنگ ژی ژ بۆی بەرژەوەندیێن خوە بکار دئانین، ت سیمایەکی کوردستانی بوونێ د ڤان ئاهەنگان دە نەدهات دیتن، ئالا و وێنەیێن ئۆجالان ئەوقاس زێدە بوون کو مرۆڤ نەدکاری وان هەژمار بکە، ستران و سروودێن گرێدایی پەکەکێ دهاتن گۆتن، بەرپرس و کەسێن نێزی پەکەکێ داخویانی ددان و هەر تشت د بەرژەوەندیا خوە دە بکار دئانی، لێ بەلێ ئاهەنگا ئیسال یا کو ل کۆلنێ هاتی لدار خستن جیاواز بوو و هەر تشت بەرەڤاژی کر، سیمایەکە کوردستانی ب ڤێ ئاهەنگا نەتەوی دان و ل شوونا وێنەیێن ئۆجالان و ئالا پەکەکێ، ئالا کوردستانێ هات هلدان، ل شوونا سروود و سترانێن پەکەکێ، ستران و سروودێن نەتەوی یێن کوردان هاتن گۆتن، و ئاهەنگ ب ئاوایەکی باش هات برێڤە برن، ئەڤ ژی ل گۆر خواستەک و بەرژەوەندیا پەکەکێ نەبوو، لۆما خوەست پرسگرێکان دەرخینە.
بەلێ، ژ بەر کو د ئاهەنگا نەورۆزێ یا کۆلنێ دە ئالا رەنگین ئا کوردستانێ بلند هات هلدان و هەژمارا ئالێن رەنگین ئەوقاس بوو کو نەدهاتن هەژمار، ئاهەنگەک دوور ژ بەرژەوەندیێن حیزبی بوو و روویەکی بەدەو یێ کوردان نیشانی تەڤ جیهانێ دا، پەکەکە نەرەحەت کر و دیسان ژەهرا خوە رشت.
مرۆڤ دکارە وسا ببێژە کو ئاهەنگا نەورۆزێ یا ل باژارێ کۆلنێ هاتی لدارخستن، داوی ب هەژمۆنا پەکەکێ یا لسەر ڤان ئاهەنگان ل ئەورۆپایێ ئانی و ژ هەر کەسی رە ئەشکەر کر، گەر رێکخستنەکە باش ورە ئەنجامدان ژ ئیرۆ پێڤە پەکەکە نکارە ب هێسانی کوردان د بن ناڤێن جودا جودا دە بخاپینە و د بەرژەوەندیا خوە دە بکار بینە، تشتا راست یا کو دڤێ وەرە ئەنجامدایین ژی هەر ئەڤە، دڤێ رەڤەندا کوردستانی یا ل ئەورۆپایێ باشتر کار بکە و ب تەمامی باندۆرا پەکەکێ ل سەر کوردێن ل ئەرۆپایێ دژین نەهێلە.
