76 سالیا رۆژبوونا عه‌ڤدللا ئۆجالان، هێسرا كو سه‌د ساله زوها نه‌بووى
مللەتەک کو لاشێ وی ئه‌وقاس کەتبە به‌ر كێر و خه‌نجه‌ران و ئه‌وقاس بریندار ببه و برینا وی جار دن ساخ بە و خوه دیسا ل سه‌ر لنگان گرتبه وەکه مللەتێ کورد تونه.
ژ خەینی پرسگرێکا نەتەوی یا کورد ت پرسگرێکەکە دن یا نەتەوی کو هاتبە خەنقاندن و هلوەشاندن تونه.
ئاخافتنا ل سه‌ر كوردان نه‌ئاخافتنا ده‌ربارێ گه‌له‌كی یه كو ل سه‌ر په‌راویزا نه‌خشه‌یا جیهانێ ژیابه.
لێبەلێ، بیردانكا سەدسالیا نه‌ته‌وه‌یه‌كێ یه کو ل سەر دیواران هاتیە خاچکرن.
دیرۆکا نووژەن یا کوردان ب شەرێ چالدرانێ یێ ب خوین د سالا 1514ان دە دەست پێ دکە، دەما کو کوردستان د ناڤبەرا هەر دو ئیمپراتۆریێن (ئۆسمانی و سەفەوی) دە هات پارڤەکرن.
ئەڤ دابەشکرن نە ل گۆر ڤین و خوەستەکێن کوردان بوو، لێ ب خێزکرنا نەخشەیەکی ب خوین یێ ئەردنیگاریێ بوو كو ژ بۆ خاکا کوردان هات فەرز کرن.
ئەڤ بوو دەستپێکا پارچەبوونا کوردان د دیرۆکا مۆدەرنیتەیێ دە، کو دەستپێکا ئێشا نەتەوا کورد ە، کو پر جاران ژێ رە ب نه‌خوه‌شیا پەنجەشێرێ تێ گۆتن.
دەما کو ئەڤ نەخوەشی د روهێ مللەتێ کورد دە بەلاڤ بوو، مللەتێ کورد قەت نه‌كاریبوو رهەت ببه، وەلاتەکه هه‌به کو تێ دە خەون و خەیالان ژیان بكه، یان ژی نەخشەیەک هه‌به كو بكاره ناڤێ وەلاتێ خوە تێ ده بنڤیسینه.
تشتا کو ژ کوردان رە مابوو ئەو بوو کو چەمێن خوینێ برژینن دا کو ناڤێ وان نەیێ تونەکرن و ژبیرکرن پر وەستایا دناڤا خۆزایە.
دیسان ڤه‌ژین و لۆرینا بیردانكا سترانێن خەمگین یێن باڤ و کالان ب بیر ئانینا وان و به‌لاڤكرنا وان ل ناڤا گه‌ل و وه‌لات، ئه‌ڤ ستران بوونه هارمونێن پر وه‌ستیای د ناڤا خوزایێ ده.
پرسگرێكا كورد نه پرۆژه‌یه‌كی فكری و نه‌ژی پرسه‌ك سیاسی یه، لێبه‌لێ گازیا هه‌بوونێ یه.
كوردان شۆره‌ش ئه‌نجام نه‌دانه ژ بۆ كو دژایه‌تیا جورێ سیسته‌ما ده‌ستهه‌لاتێ بكن، لێ كوردان شۆره‌ش ل دژی وان په‌رگالان كرنه یێن كو ئینكارا وان دكر.
داخوازێن کوردان تەنێ مافێن بنگەهین بوون، یەک ژ مافێن بنگەهین ژی ئەو بوو کو كورد ل سەر خاکا خوه بیانی نەمینن.
ژ شۆرەشێن شێخ سەعیدێ پیران، سمکۆیێ شکاک، ئاگری، قازی محەمەد، بارزانیان، گولان، ئیلۆن، سەرهلدان، بەرخوەدانا کۆبانێ و هود، ئەڤ شۆرەش ل سەر ماسەیا فەیلەسۆفان روونەنشتبوون کو بریارێ بدن کا کورد نەتەوەنە یان نا.
کوردان ژ بۆ کو ئاخ و مللەتێ خوە ژ بندەستیێ رزگار بکن و هەبوونا خوە ژ بۆ وەلاتەکی سەربخوە ڤەژینن، مرن هلبژارت.
د هەر مالەکە کورد دە جانگوریەک هەیە کو هەستیێن وی نەهاتنە دیتن. د هەر مالەکە کورد دە دایکەک هەیە کو ل ژ بۆی كه‌زه‌بێن خوه یێن كو ڤه‌نه‌گه‌ریایی دگری هه‌یه. ل هەر گرتیگەهێن هەر چار پارچەیێن کوردستانێ جه‌سه‌ده‌كێ دارڤه‌كری كو ببێژه ئه‌ز كوردم هه‌یه.
ملله‌ته‌كی كو خورت و كه‌چێن خوه بێ ناڤ سپارتین ئاخێ و شینى ژ بۆی پیشمه‌رگه و شه‌رڤانێن خو دگێران ژ به‌ر كو د بێ ده‌وله‌ت بوون و سرۆدێن خوه ب خوینێ د ڤه‌هینن، ئه‌و ملله‌ت نه‌لبه‌ندا فه‌لسه‌فكێ یه ژ بۆ كو وه‌ره ناسكرن.
هەگەر ئەم پرسگرێکا مللەتێ کورد دەینن سەر ماسەیێ ئان ژی تێخن ناڤ موزاکەرەیەکە وه‌رگرتی ئا ئیدەئۆلۆژیک ده، وێ دەمێ وەک کەسی دبه یێ کو ب زمانه‌كی مه‌نتقی بێده‌نگیێ ژ دایكه‌كه جه‌رگ شه‌وتی یا كو ل سه‌ر جه‌سه‌دێ كورێ خوه دگری و دقیره، بخوازه.
پرسگرێکا کورد نەپرسگرێکەکە فەلسەفییە، پرسگرێکا ژهۆلێرابوونا ناسنامەیێ یە، پرسگرێکا وەلاتەکی کو هێژ دیرۆکا ژدایکبوونا وی نەهاتیە نڤیساندن.
جانگورێن ماهابات، هەلەبچە، ئەنفال، کۆبانێ، دێرسم، ئاگریێ نه ژ بۆ جورێ دەستهلاتداریێ خوه فه‌دا كرن، لێ ژ بۆ کو ببێژن کورد نە مێڤانن ل سه‌ر ڤێ خاكێ، به‌لكو خوه‌دیێن ڤێ ئاخێ نه.
ئه‌گه‌ر ملله‌تێن جیهانێ ب هه‌ژمارا ده‌وله‌تێن وان وه‌رن پیڤان، ل وێ ده‌مێ ملله‌تێ كورد تاكه نه‌ته‌وه كو ب هه‌ژمارا گۆرستانێن جانگۆریێن خوه، كۆچێن ملیۆنى و به‌رخودانێن سه‌د سالى وێ وه‌ره پیڤان.
ئه‌ڤه هێسر و برینا یه‌كه‌مینه ل جیهانى كو كه‌تیه د پرتووكا گینسێ ده كو سه‌د ساله زوها نه‌بووى.
ئه‌ڤه چیرۆكا یه‌كه‌مینه ل ته‌ڤ دنیایێ كو سه‌دساله جانگۆریا فه‌دا دكه، ته‌نێ ژ بۆ پاراستنا هه‌بوونا خوه و بوویه سترى د چاڤێن جیهانا ب ناڤ ده‌مۆكراسی و خوه‌دی مافێن مرۆڤان.
گه‌لێ كورد گه‌له‌كی ژ ئاگرى و ڤیانێ چێبوویه، تم بیردانكا جیهانێ له‌كۆلین دكه و ژێ ره دبێژه: ئه‌م نه مرنه، ئه‌م ل ڤرن، ئه‌م دخوازن وه‌كه ته‌ڤ گه‌لێن جیهانێ بژین و ئه‌م دخوازن بژین.
