بووبێ ئەسەر

ھەر ملەتەک ھەر خەلکەک و ھەر جڤاتەک ل سەر کۆکا خوە بلند دبە. تێ ناسین و زانین کو ئەو کینە ژ کو ھاتنە، ھەتا نھا چ کرنە و دێ ب کودە ھەرە. لۆما ژی ملەتەکی بێ دیرۆک تونەیە. دیرۆک رابردوویێ ملەتانە. ژ بەر ڤێ یەکێیە کو ملەتەک خەلکەک دەما دیرۆکا خوە نەناسن، نزانبن، ئەو ملەت ئەو خەلک ژی دێ ب ساناهی تێک چت. وەکە رەوشا باکورێ کوردستانێ یا نھا.

ژ بەر ڤێ یەکێیە کو کورد ھەتا نھا وەکە ھاتبە خوەستن، ب سەر نەکەتیە. ژ بەر کو کورد دیرۆکا خوە نزانن. وێ ناخوینن و ھندەک ناخوازن فێر ببن. لێ ھەلبەت ھندەک ھەنە کو دیرۆکا خوە دزانن وێ دخوینن لێ ئەو ژی کێمن.

دەما مرۆڤ دیرۆکا خوە فێر نە بە، وێ نەخوینە، مرۆڤێ دێ د سبەرۆژا خوە دە ژی شاشیێن وەکە یێن بەرێ دوبارە و سێبارە بکە. ژ بەر ڤێ یەکێیە کو دیرۆک گرینگە و دڤێت ھەرکەس دیرۆکا خوە و یا ملەتێ خوە باش فێر ببن. ب ڤێ فێربوونێ دێ گەلەک تشتان بزانبن و ل گۆر ڤێ زانەبوونێ ژی دێ کێم شاشیان کن.

ب سایا فێربوونا دیرۆکێ مرۆڤ قەھرەمانێن گەلێ خوە، رێبەر و سەرۆکێن ژ بۆنا گەل کار کرنە دناسە. ب ڤێ ناسینێ مرۆڤ ژ رابەردویێ وان دەرسان دەردخە. و ھەر وەھا بەرەڤاژی وێ ژی. واتە خوەفرۆشێن گەل، خاین و سیخورێن گەل ژی دێ بێنە ناسین. لۆما گەلەکی گرینگە کو دڤێت مرۆڤ دیرۆکا خوە باش بزانبە دا کو تەڤنا ئازادیا گەل راست دەینە.

تشتێ پەکەکێ ژی دترسە ئەڤە. لۆما ئەو ناخوازە و ھەتا ژێ بهێت ناھێلت کو کورد دیرۆکا خوە بناسن. ئەو دیرۆکا کوردێن باکورێ کوردستانێ وەکە ژ وان دە دەستپێکربە ددە زانین. ئانگۆ نڤشەک وەھا مەزنکرنە کو ئیرۆ ھایا وی نڤشی ژ دیرۆکا خوە و گەلێ خوە تونەیە.

ئاھا شاشیا مەزن ژ ڤردە دەستپێ دکە و ل گۆر ڤێ شاشیێ ژی ھەر کو دچە پتر شاشی تێنە کرن. ژ بۆنا کو مرۆڤ دیرۆکا خوە، تەکۆشینا گەلێ خوە رابەردوو، سەرپێھاتیێن خوە و یا گەلێ خوە باش فێر ببە ژی دڤێت ھەرکەس ڤێ بنڤیسینە.

لۆما ژی من گەلەک جاران گۆتیە و نھا دیسا ژی دنڤیسینم کو دڤێت نفشێ مە (1960-1980) بنڤیسینن و بدن زانین کا چاوا تەکۆشینا ئازادیا گەلێ خوە دانە. د ناڤا وێ تەکۆشینێ دە راستی چ ئاستەنگان و کەلەمان ھاتنە، بنڤیسینن دا کو نفشێ پێش ژی شاشیێن کو مە کرنە، نەکن.

نھا تشتێ ھەری خەراب کو ب دەستێ پەکەکێ ھاتیە کرن چیە؟ ئەڤ ئەو تشتە کو دو نفش ژ ھەڤدو قەتاندنە، دوور خستنە و نەخوەستیە رابەردوو ئانگۆ سەرپێھاتیێن ھەڤ فێر ببن. دەما ئەڤ فێربوون تونە بە. ئەو نفش بیرئانین ئانگۆ رابەردویێ بەری خوە ژی فێر نابن. ئەڤە دێ چ ئینت؟

ئەڤە دێ مەترسیەکا مەزن ئینت کو جڤات دێ ژ کۆکا خوە ڤەقەتیت، ئانگۆ دێ کۆکا خوە ناس نەکە. وەکی کو نھا ھەر تشت ل سەر دەستێ دەمێ تێ کرنێ کو ل پاش دەریان چ دبە کەس پێ نزانن.

ئەڤەیە یا کو پەکەکێ د ڤان 30-40 سالێن بۆری دە کری و دکە. ژ بەر ڤێ دڤێت هەموو کوردێن نفشێ مە (1960-1980) دەستباڤێژن پێنووسێن خوە یان ژی ل بەر کومپیتۆرێن خوە روونێن و دەست ب نڤیساندنا بیرئانین و سەرپێھاتیێن خوە بکن. بنڤیسینن کا وان د دەما خوە دە چاوا و ب چ ئاوایی تەکۆشینا گەلێ خوە ددان. بنیڤیسینن ژ بەر کو نھا ھندەک ناخوازن ئەو دیرۆک بهێت ناسین. بنڤیسنن دا کو راستیا مە، کەدا مە و خزمەتێن مە ئانگۆ یا نڤشێ مە ژی بێنە زانین.

نڤشێ مە یەک ب یەک ژ ناڤا مە کۆچ دکن و دچن. ھندەک خاترا خوە دخوازن و ھندەک ژی بێ کو خاترا خوە بخوازن ب ئاوایەکی بێ دەنگ ژ ناڤا مە کۆچ دکن. ئەو کەسە، کەسایەتیێن مە، ھەڤال، ھۆگر، ھەڤالرێ و رێبەرێن مە بوون. د ناڤا ژیانەکا ئالۆز دە، راستی گەلەک تشتان ھاتبوون، دیتبوون. کەتبوون و رابووبوون. بەرخوەدان دا کو ژ بۆنا ئازادیا گەلێ خوە کەڤرەکی دانە سەر کەڤرەکی.

ئیجار داخوازا من ھێڤی و رجایا من ژ ھەمی کەس و کەسایەتیێن مە ئەڤە کو بلا ھەرکەس سەرپێھاتیێن خوە رابردوویێ خوە و بیرئانیێن خوە بنڤیسینن. ئەو نڤیس، دێ ببب دیرۆکەک ژ بۆنا گەلێ مە. ئەڤ نڤیسین دێ ببب زانینەک ژ بۆنا نفشێ پێش. ئەڤ نڤیسین دێ ببب موومەک (فند) و ھێدی ھێدی دێ تاریا کو ئەم نھا د ناڤ دە دژین، رۆنی بکە. ب ڤێ نڤیساندنێ ئەم و نفشێ پێش ئەم دێ ب ھەڤرا فێر ببن کو تەکۆشینا ئازادیا گەل چاوا ھاتە داین و ل سەر چ ئەساسی دەستپێ کربوو.

ئەز د وێ باوەریێ دە مە کو نفشێ نوو، مە قەت ناس ناکن. ژ بەر کو پەکەکێ دەما دەست ب شەرێ نە د بەرژەوەندیا گەل دە بوو کری، خوەست بەرێ مە ئانگۆ نفشێ مە وەکە رەڤۆک، ترسۆنەک بدن و دانە ناسین. لێ راستی نە وەھایە.

گەلەک قەھرەمان، وێرەک، رێبەر و سەرۆک د ناڤا نفشێ مە دە ژی دەرکەتنە، ھندەک ب بەرخوەدان و تەکۆشینا خوە بوونە جانگۆری، ھندەک ھێژ ژی بەرخوە ددن. ھندەک بێدەنگ مانە و تەنێ ل مالا خوە روونشتنە. لێ تم دلێ وان ژ بۆنا کوردستانەکا ئازاد و سەربخوە لێ ددە. کارەک، ئەرکەک، وەزفەیەکا بکەڤە سەر ملێن وان تەخسیریێ ناکن و ئەنجام ددن.

ژ بەر کو؛ ب دەستپێکرنا وی شەرێ پەکەکێ یێ نە د بەرژەوەندیا گەل دە بوو. ھەمی ھێژایی، باشی و خوەشیێن هەیی تێک بر. تێک بر کو نفشێ نوو تەنێ وان و دیرۆکا وان بناسە. ئەڤ ژی بوو سەدەما سەرگێژیێ و جڤاتا خوە نەناسیێ. پرانیا جوانێن لگەل پەکەکێ مەزن بوونە، دیرۆکا گەلێ خوە ناس ناکن. ھای ژ تەکۆشین و بەرخوەدانا باب، مام، خال، خالتیک، کاک و مەتن وان تونە نە.

ب ڤێ یەکێ ژی پەکەکێ ل گۆر خوە نڤشەکی نوو خولقاند و ئەڤ نفش ناخوازت مە ناس بکە و نە ژی مەجال ددە کو ئەم خوە ب وان بدن ناسین. ژ دو گۆتنێن وان پێڤە چ ئاخافتنێن وان ژی تونەیە. “تو چما رەڤیای، کا وەرە وەلاتی. تە خەلک ھشت و رەڤیای و نھا ژی ل ئەورۆپا ل کێفا خوە دگەری.”

ئەرێ لێ راستی نە وەھایە. ھەتا کو تو ڤێ راستیێ بینی زمان و بدەی قەبوولکرن دڤێت ئەڤ نفشێ کو پەکەکێ خولقاندیە نەمینە، ئەڤ ژی دێ گەلەک سالان ڤەکێشیت.

ژ بۆنا ڤێ دبێژم گەلەک گرنگە کو ئەو کەس و کەسایەتیێن نفشێ مە دڤێت ھەر یەک ژ ئالیێ خوە دە سەرپێھاتیێن خوە، دیرۆکا تەکۆشینا بەرخوەدان و خەباتێن خوە بنڤیسینن. ب نڤیساندنێ ئەم دێ ھەول بدن کو ھندەک شاشییان راست بکن.