ئەڤ دەما 6 سالانە رووپەلا دارکا مازی دەست ب وەشانێ کریە، د دەما ڤان شەش سالان دە ب هەزاران ئێریش ل سەر مالپه‌را مە هاتنە کرن، ئەڤ ئێریش هەم ژ ئالیێ دژمنان ڤە و هەم ژی ژ ئالیێ کوردێن کو خوە وەکە ولاتپاریز نیشان ددن ڤە هاتنە کرن، لێبەلێ ئارمانجا هەر دویان یەکە، ئارمانجا وان ژی بێدەنگ کرن و ئاستەنگرکرنا «دارکا مازی» یێ یە، چەندین جاران حەسابێن مە یێن سۆسیال مەدیایێ هاتن گرتن، حەسابێن مە یێن فەیسبۆکێ هاتن پووچکرن، ل ترکیەیێ ب بریارا دادگەهێ مالپەرا مە هات قەدەغەکرن، لێبەلێ ئەم تەسلیم نەبوون، مە ل بەر خوە دا و هەیانی نها ئەم بەردەوامن.
ب ئاوایەکی گشتی ناڤەندا ئێریشێن ئەلکترۆنی یێن ل سەر مالپەرا مە، ئیران ترکیە و بەلژیکا و فرانسا نە. ئەم ئیران و ترکیەیێ فێم دکن، لێ ئێریشێن ل فرانسایێ و بەلژیکایێ چما؟ ژ خوە ئەم ب زمانێ وان نانڤیسن، ئەم دژاتیا وان ناکن، ئەم ب ت ئاوایی بەحسا وان ناکن، لۆما بێ گومان ئێریشێن ل ڤان دو ولاتان ل سەر مە تێن کرن، ژ ئالیێ پەکەکێ ڤە نە.
وەکە مە ل ژۆر باس کری، ب بریارا دادگەها ترکیەیێ رووپەلا مە ل ترکیەیێ هات قەدەغەکرن، قەدەغەکرنا رووپەلا مە ل ترکیەیێ د دەمەکی دە یە کو ب دەهان دەزگەهێن چاپەمەنیا پەکەکێ بێی سانسۆر و ب ئازادانە وەشانێ دکن.
تەڤی کو دارکا مازی ل ترکیەیێ قەدەغەیە، لێ بەلێ ژ رۆژا وەشانا رووپەلا مە هەیانی رۆژا مە یا ئیرۆ پەکەکەیی ژ مە رە دبیژن، “هوون میتن، هوون ئاژانن، میت پەرەیێن وە ددە…!” گەلۆ ما قەی ئەڤ تشتەک لۆژیکی یە؟ ما دبە ژ ئالیەکێ ڤە میت پەرەیێن مە بدە، ژ ئالیەک دن ڤە دادگەها ترکیەیێ بریارا قەدەغەکرنا مە بدە؟ نااا، هەر کەس دزانە سەدەم چییە، لێ ئاپۆچی ناخوازن ڤێ راستیێ قەبوول بکن، ژ بەر کو ئەم ب نووچە و نڤیسێن خوە روویێ راست یێ پەکەکێ کو پارتیەکە ولاتفرۆشە ئەشکەرە دکن، لۆما ب ڤی ئاوایی ئەو و دەولەتا ترک ل دژی رووپەلا مە دسەکنن.
تشتا باش ئەڤە کو ئەم نە ل ترکیەیێ، لێ بەلێ ل ئەورۆپایێ وەشانێ دکن، گەر ئەم ل ترکیەیێ بوونا وێ دەم تەڤ ئیدیتۆرێن مە دا ژ ئالیێ میتێ ڤە وەرن دەستەسەرکن، دەولەتا ترک ئەو ئازادیا ب چاپەمەنیا پەکەکێ ددە ت جاری ب رووپەلا مە و خەباتکارێن مە نادە، ئەڤ ب تەنێ بەسە کو مرۆڤ بزانبە کی ژ بۆی کورد و کوردستانێ دخەبتە و کی ژی ژ بۆی دەولەتا ترک و داگیرکەرێن دن دنڤیسە و خزمەتێ ژ وان رە دکە.
چەندین بەرپرسیارێن مەدیایا پەکەکێ ل باکورێ کوردستانێ ب پاسەپۆرت خوە ژ ور دچن سلێمانیێ و قەندیلی و ب ئەندامێن کۆمیتەیا چاپەمەنیا پەکەکێ و کەسێن وەکە مستەفا قاراسوو رە هەڤدیتنان پێک تینن، ت کەس ژی ژ وان رە نابێژە ئەڤ چەوا دبە؟!! بەلێ، راستە جارنان دەولەتا ترک چەند کەسێن لەواز دگرە، لێ د بنگەهێ دە رەوش ژ بۆ کەسێن کو سەرکێشییا کار دکن جودایە. کەسێن کو 20 سالن رێڤەبەرێن مەدیایا په‌كه‌كێ نە و هین ژی د ناڤبەرا دیاربەکر، ستەنبۆل و سلێمانیێ دە ب رحەتی دچن و تێن هەنە. ما ئەڤ نۆرمالە؟
دەولەتا ترک دخوازە کو کورد ببن ئەندام و لایەنگرێن په‌كه‌كێ، دارکا مازی ژی ڤێ یەکێ ب بەلگەیێن دیرۆکی ئیفشا دکە، ئەڤ ئیفشا کرن نە ب دلێ ڤان دو ئالیانە، ئەو هەر دخوازن وەکە بەری نها گەلێ کورد ب گشتی و گەلێ باکور ب تایبەتی ب خاپینن، ئەم ژی دخوازین وان شیار بکن، لۆما ژ ئالیێ هەر دویان ڤە ئەم تێن هەدف گرتن، هەر دو ژی ناخوازن دارکا مازی دەروێن وان ئەشکەرە بکە و روویێ وان یێ راستەقینە ژ گەلێ کورد رە نیشان بدە.
ژ دەما دامەزراندنا پەکەکێ هەیانی ئیرۆ، ترکیێ و پەکەکێ ب هەڤرە کورد نەچاری دیرۆکەک شاش و چەوت کرنە، ترکیێ ب ئاوایەکی سیستەماتیک، ل سەر کوردێن باکور فەرزکر کو ببن ئاپۆچی، ب سیاسەتا خوە کورد مەحکوومی په‌كه‌كێ کرن. هەر ئەڤ ژی چێبوو، ترکیێ وسا کر کو پەکەکە و ئۆجالان ل باکورێ کوردستانێ وەکە پیرۆزی بێن دیتن و ت کەس نکارە پەکەکێ رەخنە بکە، ئەڤ سیاسەتەکە هەڤپار و ستراتەژی بوو، مخابن تەڤگەرێن سیاسی یێن کوردان یێن ل دەرڤەیی په‌كه‌كێ ل باکورێ کوردستانێ نەگهیشتن گرسەیا گەل و ئەڤ لیستک نەشکاندن. نها ژی ل باکورێ کوردستانێ ئەو کەسێن کو دخوازن ژ “حەوزا په‌كه‌كێ” دەرکەڤن، رەوشەنبیر، نڤیسکار، گرووپ، هەم دبن ئارمانجا په‌كه‌كێ و هەم ژی یا دەولەتا ترک.
لێ ئەڤ نابن سەدەم ئەم گاڤ ب پاش ڤە باڤێژن. ئەمێ ل هەرچار پەرچەیێن کوردستانێ پشتگریا سیاسەتێن دژه‌کۆلۆنیالیست و ئازادکەر ژ بۆ کوردان بکن. ئەمێ ل دژی قالبێن فکری یێن شاش کو ل سەر کوردان تێن سەپاندن، سیاسەتێن شەرێ تایبەت، ستراتەژیێن ئافراندنا کوردێن پارالێل (بێ کوردایەتی) یێن کۆلۆنیالیستان راوەستن. ئەمێ لێکۆلینێن خوە یێن ل سەر بوویەرێن دیرۆکی یێن کێم تێن زانین، شیرۆڤەکرنا وان یا ژ نوو ڤە، و ڤەکۆلینا پێوەندییێن ڤەشارتی د ناڤبەرا په‌كه‌كێ و دەولەتا ترک دە بدۆمینن. ئەمێ تشتێن کو نایێن گۆتن ژ گەلێ خوە رە ببێژن، دەولەتا ترک و پەکەکە ژی بلا ب ئاوایەکی هەڤپار ئێریشی مە بکن، ئەوێ بکاربن رووپەلا مە قەدەغە بکن، لێ ب ت ئاوایی ئەو نکارن ئیرادەیا مە تەسلیم بگرن و مە ژ ڤێ رێیا پیرۆز دوور بخن، ئەمێ وەکە پێش نها و پێتر ل دژی داگیرکەرێن کوردستانێ بنڤیسن و روویێ کرێگرتیێن وان ژ گەلێ خوە رە ئەشکەرە بکن، ئەڤ کار وێ هەیانی وێ رۆژا ئەم ساخ بن بەردەوام بە، رووپەل ژی وەرە گرتن ب هەر سەدەمەکی، ئەمێ بەردەوام بن.
