سەرۆکوەزیرێ هەرێما کوردستانێ مەسروور بارزانی دێ د رۆژێن پێش دە ب سەردانەکە فەرمی بچە ئامەریکایێ.
حکوومەتا هەرێما کوردستانێ ل سەر سەردانا سەرۆکوەزیر مەسروور بارزانی داخویانیەک بەلاڤ کر.
حکوومەتێ دا زانین کو مەسروور بارزانی دێ ل ئامەریکایێ هەڤدیتنێن گرینگ پێک بینە و هوورگلیێن سەردانێ دێ د رۆژێن پێش دە ژ رایا گشتی رە بێن پارڤەکرن.
مەسروور بارزانی هەری داوی 26ێ سباتا 2024ان چووبوو واشنگتۆنێ و ب بەرپرسێن ئامەریکی رە کو د ناڤ دە وەزیرێ کارێن دەرڤەیێ وێ دەمێ یێ ئامەریکایێ ئانتۆنی بلنکێن ژی هەبوو هەڤدیتن کربوون.
د وێ دەمێ دە، ل گۆری داخویانیا نڤیسکی یا بەردەڤکێ وەزارەتا کارێن دەرڤە یا ئامەریکایێ ماتیۆ میلەر، بلنکێن و بارزانی ل سەر مژارێن «هەڤکاریا دەمدرێژ و ئارامیا هەرێمی» ئاخڤیبوون.
هەر وها مژارێن وەکی رێزگرتنا مافێن مرۆڤان و پاراستنا ئەولەهیا هەڤپار ژی هاتبوون گۆتووبێژکرن.
د داخویانیێ دە هاتبوو گۆتن کو هەر دو ئالیان گرینگیا بەشداریا نوونەرێن کورد د کۆمیتەیا لەشکەری یا پایەبلندا د چارچۆڤەیا هەڤاهەنگیا لەشکەری یا هەڤپارا د ناڤبەرا ئیراق و ئامەریکایێ دە ئانی زمان.
بارزانی د چارچۆڤەیا هەڤدیتنێن خوەیێن ل واشنگتۆنێ دە هەر وها ب بەرپرسێن ئۆدەیا بازرگانیێ یا ئامەریکایێ رە ژی جڤیابوو.
حکوومەتا هەرێما کوردستانێ د داخویانیا خوە یا ل سەر هەڤدیتنا 1ێ ئادارا 2024ان راگهاندبوو کو بارزانی شرکەتێن ئامەریکی ژ بۆ ڤەبەرهێنانێ ڤەخوەندنە هەرێما کوردستانێ.
تێ چاڤەرێکرن کو د سەردانا نوو دە ژی هەڤدیتنێن د هەمان ئاستێ دە یێن دیپلۆماتیک و ئابۆری بێن لدارخستن.
