بووبێ ئەسەر

ژ رۆژا پەکەکە دەرکەتیە و ھەتا نھا ئەم ئەو کەسێن نە ل گەل پەکەکێ، مە بێ وەستان ھەر ئەو رەخنە دکرن. 40-50 سالن کو پەکەکێ کارێ تونەبوونا کوردان دکر و دکە. ئەم ژی تەنھا بوونە تەماشەڤانێن وێ. ژ بلی ڤێ هیچ تشتەکی مە ل ھۆلێ تونەیە.

رێیا داگیرکەران ژ بۆی پەکەکێ دانیبوون دیارە. ئەشکەرەیە کو کارێ  داگیرکەران دابوون پێشیا وێ باش ب رێڤە دبر، بریە و دبە. ھەمی ھەولدانێن وێ ئەو بوو کو کوردان بکن ترک. کەمالیزمێ ب وان شرین بکە. کوردان ژ کوردبوونێ دوور بخن. نرخ و پێڤانێن کوردستانی جەم کوردان نەھێلە.

پەکەکە د ڤێ خەتا خوە دە ب سەرکەت. تشتێن کو داگیرکەران دخوەستن ئەنجامدان، ئیرۆ  نە ھەمی ژی بن، ئەم دبینن کو  وانا یەک ب یەک د ڤێ دەما مە دە، د ژیانا جڤاتا کوردان یا ئیرۆ دە، بێ کو کەس زێدە ل دژی دەرکەڤن، جھێ خوە دبینە و دیتیە.

راوەستاندنا شەرێ کوردکوژیێ ھەر چقاسی نە ب دلێ پەکەکێ و داگیرکەران بوو. لێ ژ بەر زختێن دەرڤە کو ل ترکان دھات کرن، ترک ژی مەجبوور مان کو وێ پەکەکەیا کو وان دامەزراندبوون، ھلوەشینن. لێ ئەو ژی دیسا ل سەر دەڤێ عەڤدللا ئەنجام دا.

ئەم ئەو کەسێن نە لگەل بیر و باوریا پەکەکێ بوون، دیسا رەخنە دکن. گۆتنێن خوە دبێژین. پرانیا مە ژی دزانن کو دێ پشتی ھلوەشاندنا پەکەکێ دەولەت جھێ وان ڤالا نەھێلە. لۆما دپرسم کو گەلۆ ئەم ژ بۆنا پلاناکا نوو ئامادە نە؟

دەولەتێ و عەڤدللا بەری کو پەکەکێ ھلوەشینە پلانا نوویا ب تەمامی تێکبرنا کوردان ب ھەڤرە دەستنیشان کریە. ھەلبەت ئەم پێ نزانین کو ئەو پلان چیە؟ لێ دهێت زانین کو پلان، تونەبوونا کوردان ئانگۆ کەدیکرنا کوردانە کو ژ روحیەتا وان ئانگۆ ژ کوردبوونێ دوور بخن.

ئەم دیسا ئەو کەسێن نە پەکەکەیی نە، ھەر رۆژ ڤێ ھەلوەستا پەکەکێ رەخنە دکن. ھەلبەت ئەڤە حەقێ مەیە. لێ ئەم فێم ناکن کو ھەر رەخنەیەکا مە دبە پرۆپاگاندا پەکەکێ ب خوە. ژ بەر کو پەکەکە پرانیا جڤاتا کوردێن باکورێ کوردستانێ یا پشتی سالا 1980 ب خوە مەزن کرنە و ل گۆر پرۆژەیا ئیرۆ ئەو پەروەردە کرنە.

ھەگەر نە وەھا با، وێ دەنگەک ژ دایکێن زارۆکێن خوە کربوون جانگۆری دەرکەتبا. کوردێ بەدەلێن مەزن دابوون، دا حەساب بپرسیانا. یێن مال و ملکێن خوە ژ بۆنا قاشۆ شۆرەشا کوردستانێ ل سەر کربوون، دا ب وێرەکی دەرکەڤن و حەسابا زارۆک، مال و ملکێن خوە پرسن. ئەم دبینن ئەڤە نە وەھایە و ئەڤە وەھا نەبوو. ل شوونا وێ پرانێ ل چەپکان ددن.

ھەرکەس ژ راوەستاندنا شەرێ تونەبوونا کوردان کێفخوەشن. ژ بۆنا ھێژ بێتر زارۆکێن وان نەبن جانگۆری، خانیێن وان ب سەر وان دە نەھەرفن. دبێژن: “یێن چووین ژ کیستێ دایک و بابێ خوە چوون. قەت نەبە بلا یێن مایی بمینن.”

لێ ئەم یێن نە پەکەکەیی، مە ھێژ ژی ئەڤە فێم نەکرنە. د وارێ رێخستنی دە ئەم قەلس و لاوازین. ئیمکانێن هیچ رێخستنەکێ تونەیە کو کادرۆیێن پرۆفیشنال دەرخن دا کو ئەو د ناڤا ملەتێ خوە دە ڤێ پرۆژەیا نوو یا پەکەکێ ب وان بدە زانین.

ژ بۆنا پێشی ل ڤێ هێرشا داوی یا پەکەکێ و دەولەتێ بێ گرتن، تەنھا رێیەک ھەیە. ئەڤ رێیە ژی ئەڤەیە کو ئەم ھەمی کوردێن ژ خوە رە دبێژن وەلاتپارێز، دەمۆکرات و شۆرەشگێر، ھێز و قاوەتێن خوە د بن سیوانەکا نەتەوەیی دە بکن یەک.

ھەتا کو ئەم ڤێ پێک نەینن هیچ رامانەک ژ بۆی رەخنەیێن مە یێن کو ئەم ل پەکەکێ دگرین نینە. بەرەڤاژی وێ ئەو ژ بۆنا وان دبە پرۆپاگاندا کو ب سالانە ئەڤ ھاتیە تەجرووبە کرن. داگیرکەرێن کو پەکەکە ب دەستێن خوە دامەزراندبوون، چ جاران شوونا وێ ڤالا ناھێلن. فرسەتەکا باش یا کو کوردان تونە بکن ب دەست خستنە. ما دێ چاوا دەست ژ ڤێ بەردن؟

ھەگەر پارتیێن مە یێن کوردستانی ڤێ یەکێ ژ نھا دە نەبینن، دڤێت بزانبن کو ئەڤە داوی ئانینا کوردێن باکورێ کوردستانێ یە. نھا داگیرکەرێن مە و پەکەکێ ب ھەڤرە حەملەیا خوەیا داوی دلیزن.

لۆما دبێژم: پێویستە ئەم کوردێن نە پەکەکەیی ژی حەملەیا خوە یا تالی ژ بۆنا یەکیتیا کوردێن باکورێ کوردستانێ ب کار بینن. سیوانەکا نەتەوەیی ڤەکن دا کو کوردێن نە پەکەکەینە د بن وێ دە ب جھ بکن. بکن دا کو ب یەک ھێز و قاوەتێ ئەم ل دژی ڤێ لیستکا پەکەکێ و دەولەتێ یا نوو دەرکەڤن. یان ئەم دێ ب ھەڤرا ڤێ لیستکا نوو تێک ببن. یان ژی ئەم دێ ب خوە تێک چین. ئێدی ھوون دزانن…