د جووتمەها سالا 2024ێ هەیانی نها د ناڤبەرا پەکەکێ و دەولەتا ترک دە، ب ناڤێ پێڤاژۆیێ، پێوەندیەک هەیە کو کەس نزانە د ناڤەرۆکا وێ پێوەندیێ دە چ هەیە. نەدیارە کا دێ چارەنڤیسا ڤێ پێوەندییا ڤەشارتی و تەڤلیهەڤ چ بە، هەم دەولەت و هەمژی پەکەکە ژ بۆی کو ڤێ پێڤاژۆیێ ب رایا گشتی بدن قەبوولکرن هەلمەتەکا پرۆپاگاندایێ دەستپێکریە. دەولەت ژ رایا گشتی یا خوە رە دبێژە، “مە تەرۆر خەلاس کر، ئەم نها وان عەفوو دکن.” پەکەکە ژی ژ رایا گشتی یا خوە رە دبێژە، “ئەم گهشتن ئارمانجا خوە و نها ژی ئەم رووپەلەکا نوو یا تەکۆشینێ ڤەدکن.” ئەڤ حەقیقەت گەلەک دیارە، لێ دیسا ژی هەموو ئاکتۆرێن سیاسی پشتگیریا ڤێ پێڤاژۆیێ کرن. هندەک هێزێن نەرازی وەک ئیرانێ هەبن ژی نەدەرکەتن و نەگۆتن بلا پەکەکە چەک نەدەینە.
پەکەکە داخویانیا سەرۆک بارزانی یا پێڤاژۆیێ ئیستیسمار دکە
ئەم دکارین ببێژین تەڤاهیا هێزێن کوردی پشتگیری دان کو پەکەکە چەک دەینە. سەرۆک بارزانی کو 78 سالە تەڤاهی ئالۆزیێن رۆژهلاتا ناڤین و کوردستانێ ژ نێزیک ڤە دشۆپینە، وی ژی پشتگیری دا پێڤاژۆیێ. سەرۆک بارزانی ب رەنگەک ئەشکەرە وەها گۆت، “ژ بۆی پێڤاژۆیا ئاشتی و چارەسەریێ هەلوەستا مە نەهاتیە گوهەرتن، ئەم ژ تەڤاهیا فرسەتان مفا وەردگرین و پشتگیرییا پێڤاژۆیێ دکین، ئاشتی رێیا هەری راستە ژ بۆی چارەسەرییا پرسگرێکان.”
پەکەکە چاوا هەموو مژاران ئیستیسمار و بەرەڤاژی دکە، خوەست پشتگیرییا سەرۆک بارزانی ژ بۆی چارەسەریێ ژی ئیستیسمار بکە. نها گەر کەسەک نامەیا ئۆجالان یان پێڤاژۆیێ رەخنە بکە، پەکەکەیی ژ وان رە دبێژن مەسعوود بارزانی ژی پشتگیرییا نەرینا ئۆجالان دکە. هەلبەت مەسەلە نە وسایە و تشتێ کو سەرۆک بارزانی پشتگیریێ لێ دکە پڕ ئەشکەرە یە. سەرۆک نەگۆتیە کە، “ئەز پشتگیرییا ئایدۆلۆژییا ئۆجالان دکم و پشتگیرییا دیرۆکا وان یا 50 سالان دکم.” هەمان دەمێ سەرۆک بارزانی پشتگیرییا نامەیا ئۆجالان یا د 27ێ شوباتێ دە نەکریە، گەلەک زەلالە سەرۆک بارزانی پشتگیریێ ددە کو ل باکورێ کوردستانێ ب هەڤدیتن و دیالۆگێ رێیا ئاشتیەک سەربلند چێببە.
پەکەکە دخوازە ئایدۆلۆژییا ئۆجالان کو مافێ نەتەویبوونا کوردان ناس ناکە و ب پارادیگمایەکێ کو دخوازە کوردان بکە بەشەک ژ نەتەوا ترکیێ، ب ناڤێ سەرۆک بارزانی پاک بکە. ئەو دخوازن ئایدۆلۆژییا خوە یا بێی کورد ب ناڤێ سەرۆک بارزانی ئێماژەیەکا کوردستانی ژێ رە چێکن.
سەرۆک بارزانی و بزاڤا وی یا سیاسی پڕ زەلالە، ئەو تەکۆشینا خوە نە ل سەر گۆتنێن ئایدۆلۆژیک بەلکو ل سەر ئازادییا کورد و کوردستانێ دمەشینە. و وەکە داخوازەکا بەربچاڤ خوەسەریێ دخوازە، لێ هەگەر زرووف هەبە سەرخوەبوونێ ژی وەکە ئارمانجا نیهایی دبینە. سەرۆک بارزانی سەرەرایی گەفێن هەرێمی و هەتتا گەفێن ئامەریکایێ، ل هەمبەر گەفێن وان د ریفەراندۆما سەرخوەبوونا کوردستانێ دە گاڤەک پاشدە نەئاڤێت، هەلوەستا سەرۆک بارزانی چ پێویندی ب هەلوەستا ئۆجالان کو چارەسەرییا کلتوری ژی ژ بۆی کوردان ناخوازە، نینە.
سەرۆک بارزانی دخوازە باکورێ کوردستانێ ژ ئاستەنگییا شەری رزگار بکە
سەرۆک بارزانی کەسەکە کو سیاسەتەکا رەئال دمەشینە. ئەو ژ بەر سەدەمێن رەئال پشتگیریێ دکە کو پەکەکە چەک دەینە، وی ژ سالێن 80یێ ڤە شەرێ پەکەکێ و دەولەتا ترک ژ نێزیک ڤە دشۆپاند. یێ یەکەمین چەک دایی پەکەکێ ژی هەر پەدەکە بوو، لێ ب دەرباسبوونا دەمی دیت کو پەکەکە وەکە ئاموورەکێ تێ بکارئانین. سەرۆک بارزانی دیت کو ئارمانجا شەرێ پەکەکێ نە ئەڤە کو ل سەر دەولەتا ترک زەختێ چێکە کو مافێن کوردان ناس بکە. سەرۆک بارزانی دیت کو ئەڤ شەرە ژ دەرڤەی خەرابی و مالوێرانیێ چ دەستکەفتەکی ژ بۆ کوردان ناینە. هەری داویێ سەرۆک بارزانی هەول دا کو رێ ل بەر فەلاکەتا شەرێ خەندەکا بگرە و هەدەپە هشیار کر و ژێ رە گۆت، “خەندەک زرارێ ددە گەل”، واتە سەرۆک بارزانی ب سالانە هەول ددە گەلێ باکورێ کوردستانێ ژ شەرەکی بێ واتە و بێ ئەنجام رزگار بکە، ئەو دبینە کو 50 سالن گەلێ باکورێ کوردستانێ بوویە مەحکوومێ چەرخا شەرەکی بێ ئەنجام و دخوازە ڤێ چەرخێ بشکینە.
سەرۆک بارزانی دخوازە پەکەکێ وەکە هێزەکا تاشارۆن “بەلێندەر” د دەستێ هیزێن هەرێمی دە دەرخە
تێبینیا سەرۆک بارزانی ئەڤە کو هەگەر پەکەکە چەک دەینە، ئێدی د دەستێ هێزێن هەرێمی دە نابە شوورەک. سەرۆک بارزانی دیت کو پەکەکە د سالا 1980ێ دە لگەل سەدام، 1990ێ دە لگەل ئیرانێ و 2012ێ پیڤە ژی لگەل ئیران و هێزێن شیعە یێن د ئیراقێ دە بوو چەکەک و ئێریشی سەر شۆرەشا باشوورێ کوردستانێ کرن، سەرۆک دخوازە داویێ ب ڤێ رۆلا تاشارۆنیێ یا پەکەکێ بینە.
سەرۆک بارزانی دخوازە هەرێما کوردستانی نەما ببە قادا شەر
سەرۆک بارزانی دبینە کو جوگرافییا هەرێما کوردستانێ بوویە قادا شەرێ پەکەکێ و ئارتێشا ترک، ئەو ژی دهێلە کو هەرێما کوردستانێ باجەک مەزن بدە، سەرۆک بارزانی دبینە کو پەکەکە وەکە سەربازەکێ تێ بکارئانین و پەکەکە ژی چەکێ د دەست خوە دە ل هەمبەر هێزێن کوردی بکار تینە و دخوازە ڤێ رەوشێ ژی بەهێلە.
سەرۆک بارزانی باش دبینە کو هەڤدیتنێن د ناڤبەرا ئیمرالی و ئەنقەرەیێ دە نە پێڤاژۆیا چارەسەرییا پرسگرێکا کوردایە، لێ بەلێ دبینە رزاندن و گرێکەک هەیە. ئەو ب فکرا کو هەگەر بکاربە ڤێ رزاندنێ دەرباس بکە دێ ل پێشیا کوردان رێیەکا نوو ڤەبە، لۆما پشتگیریێ ددە پیڤاژۆیا هەڤدیتنان.
هندەک دەردۆر دبێژن کو گەرەک سەرۆک بارزانی پشتگیریێ نەدە ڤێ پیڤاژۆیێ. سەرۆک بارزانی بەرێ گۆت، “کورد ل کۆدەرێ بژین ئازادی و مافێن وان دۆزا مە یا سەرەکی یە.” ژ بەر کو ل باکورێ کوردستانێ ڤەژینەکا نوو چێدبە دڤێت پۆزسیۆنا پەکەکێ وەرە گوهەرتن. جیهێ سەرۆک بارزانی رێ نادە کو ببێژە، “ئەز پەکەکێ باش ناس دکم”، عاجز ببە و خوە پاشدە بکشینە. ل پێشییا وی دە ترک و پەکەکە جی دگرن و وان ئەساس دگرە و سیاسەتێ دمەشینە.
ئەگەرێن پشتگیرییا سەرۆک بارزانی ژ بۆی پێڤاژۆیێ ئەرکا پێشەنگتییا نەتەوی یە
سەرۆک بازرانی نە تەنێ ب شێوەیەکی تاکتیکی و سیاسی پشتگیریێ دە ڤێ پێڤاژۆیێ، میسیۆنەکا وی یا نەتەوی هەیە. ل سەر ڤێ ئەساسێ ئارمانجێن سەرۆک بارزانی ژ گەلەک بەشان پێک تێن کو تێ دە دۆزا نەتەوا کورد، یەکیتییا نەتەوی و لێگەرینا چارەسەرییا ل سەر بنگەها ئاشتیێ ژی د ناڤا خوە دە دگرە.
هەلوەستا پەکەکێ یا ئیستیسمارێ واتەدارە و دهێت فێمکرن. لێ بەلێ، رەوشەنبیرێن باشوورێ کوردستانی و مەدیایا هەرێما کوردستانێ ژی هەلوەستا سەرۆک بازرانی راست فێم نەکریە، خەلەتیەکا پڕ مەزنە کو ئەو وسا تێدگهن سەرۆک بارزانی پشتگیرییا شەخسێ ئۆجالان و دەولەتا ترک دکە. یانژی وەرە گۆتن کو ئەڤ پێڤاژۆیە چارەسەرییا پرسگرێکا کوردە ل باکورێ کوردستانێ. ئەرکێ رەوشەنبیر و مەدیایێ ئەڤە کو راستیێن رۆژانە و دیرۆکی بینن بیرا خەلکی، لێ بەلێ مەدیایا باشوور هەلوەستەک پر شاش هەیە، ئەو راستییا ڤێ پێڤاژۆیێ نکارن ئەشکەر بکن، ئەو ل گۆر مەدیایا پەکەکێ و دەولەتا ترک پێڤاژۆیێ شیرۆڤە دکن. مەدیایا باشوور نکارە هەلوەستا سەرۆک بارزانی ب دروستاهی ب خەلکێ بدن فێمکرن و ژ بەر وێ یەکێ ژی دبن بەشەک ژ پرۆپاگاندایا دەولەتا ترک و پەکەکێ، هەلبەت هەلوەستا سەرۆک بارزانی هەلوەستەکا سەربخو و سەربلند.
سەرۆک بارزانی کەسەکی ستراتەژیزان و سیاسەتڤانە و هەمان دەمێ د مەسەلەیا کوردی یا د رۆژهلاتا ناڤین دە خوەدی ئەزموونەکا پر مەزنە. بەری هەر تشتی ژی د یەکیتییا نەتەوا کورد دە ئەو رێبەرەکی ب موورال و سەمبۆلە. ل هەر چار پەرچەیێن کوردستانێ پشتگیرییا وی یا ژ بۆی چارەسەرییا پرسا کوردی هەم گاڤەک ستراتەژیکە هەم ژی ژێستەکی سەمبۆلە و ئەڤ هەلوەستا وی هەگەر بێ ئیستیسمارکرن و فێم کرن، دکارە رێیا پرسگرێکا کورد یا 100 سالی چارەسەر بکە.
