سەرۆککۆمارێ ترکیەیێ رەجەپ تاییپ ئەردۆگان دا زانین، د “پێڤاژۆیا ترکیەیا بێ تەرۆر” دە، ت کێشە و پرسگرێک نایێن دیتن و گەشەدان بەر ب باشیێ ڤە دچن.
سەرۆککۆمارێ ترکیەیێ رەجەپ تاییپ ئەردۆگان ئیرۆ 29ێ گولانێ د دەما ڤەگەرا خوە ژ ئازەربایجانێ د بالافرێ دە ژ رۆژنامەڤانان رە ئاخڤی و بەهسا “پێڤاژۆیا نوو یا ئاشتیێ” و گەشەدانێن ل سووریەیێ کر.
دەربارێ پێڤاژۆیا ناڤخوەیی دە:
ئەردۆگان دیار کر، پێشکەتنێن د “پێڤاژۆیا ترکیەیا بێ تەرۆر” دە باشن و ب ئاوایەکی ئەرێنی بەردەوام دکن. هەروها گۆت: “تەڤی هنەک دەنگێن ناکۆک، پەیامێن کو تێن دایین ئەرێنی و ئاڤاکەرن ژ بۆ پێڤاژۆیێ”.
سەرۆککۆمارێ ترکیەیێ هشیاری ژی دا و گۆت: “ئەم وەک دەستهلاتداری هشیارن ل هەمبەر کەسێن کو دخوازن پێڤاژۆیێ ژەهری بکن و ئەمێ دەرفەتێ نەدن وان”.
هەروها تەکەز کر، ئارمانجا وان رزگاربوونا ژ “کێشەیا تەرۆرێ”یە کو زیانەکە مەزن گهاندیە ترکیەیێ. دا زانین ژی، د ڤێ پێڤاژۆیێ دە وان قۆناغەکە وسا دەرباس کریە کو بەرێ نەگهیشتبوونێ و گۆت: “هەر تشتێ کو ئەم دکن، ژ بۆ گەلێ مە و براتیێ یە.”
دەربارێ رەوشا سووریەیێ و پەیمانا هسد-شامێ دە:
سەرۆککۆمارێ ترکیەیێ د بەشەکە دن یا ئاخافتنا خوە دە بەحسا رەوشا سووریەیێ و رێکەفتنا د ناڤبەرا هه‌سه‌دێ و شامێ دە کر و گۆت: “پێویستە یەکپارچەییا ئاخا سووریێ و یەکیتیا نەتەوەیی بێ پاراستن”.
ئەردۆگان ئاماژە ب وێ یەکێ کر کو بەرێ وان راگهاندبوو کو ئەو پێشوازیێ ل وێ رێکەفتنا کو د ناڤبەرا هه‌سه‌دێ و شامێ دە هاتیە کرن، دکن. لێ بەلێ، ئەردۆگان گۆت: “ئەم جیبجیکرنا بریارێن کو هاتن دایین، ژ نێز ڤە دشۆپینن ئەم دبینن کو هه‌سه‌ده بەردەوامە ل سەر بکارئانینا تاکتیکان ژ بۆ پاشخستنا جیبجیکرنا رێکەفتنێ. پێویستە هه‌سه‌ده دەمێ وندا نەکە و سۆزێن خوەیێن ل گۆری رێکەفتنێ بجی بینە”.
