پارتیا کارکەرێن کوردستانێ (پەکەکە)، کو د سالا 1978ێ دە ژ ئالیێ عەبدوللاھ ئۆجالان ڤە ھات دامەزراندن، سەرۆکاتیا عەبدوللاھ ئۆجالان بێ نیقاشە. ئەڤ تەڤگەر ژ رۆژا کو داکەتییە ساحا کوردستانێ ب ناڤێ “ئاپۆییان” و ب کرنێن خوە دەنگ دا.
د دەستپێکا دامەزراندنا خوە دە ئیدیعا دکرن کو ئەو ژ بۆ “خوەبەخشکرن و ئازادیا گەلێ کورد” تێدکۆشە.
لێ بەلێ، نەمازە پشتی کو ئۆجالان د سالا 1999 دە ھات گرتن، تێ ئیدیعا کرن کو د نێرینێن ئایدۆلۆژیک و ستراتەژیک یێن رێخستنێ دە گوھەرتنێن کوور چێبوونە. ئەڤ نەرین، ئالیێ تاری یێ ئۆجالان و پارتییا وی ژ چاڤان دووردخە، دپارێزە و کرنێن ڤێ تەڤگەرێ یێن ھەتا 1999 ڤەدشێرە.
راستی ئەوە، دەما کو ئەم ل ھەلوەست، داخویانی، نێزیکاتیا وی یا ل ھەمبەر کادرۆیێن خوە و تێکلیێن وی یێن بەرێ، ریپۆرتاژ و داخویانییێن وی، رەوشا وی یا ل شامێ دنێرن؛ ئەشکەرە خویا دکە کو وی لگەل دەولەتا ترک ھەڤکاری کریە و سیستەما پەکەکێ ب ھەڤ را ئاڤا کریە.
ئۆجالان، ب ئۆپەراسیۆنەکێ نەئانین ترکیەیێ. عەبدوللا ئۆجالان ب داخوازا خوە ڤەگەریا ترکیەیێ و ئەڤ پێڤاژۆیا ھاتنا وی وەک ئۆپەراسیۆنەکێ ھات نیشاندان. گەر ئەم ل چاپەمەنی و وەشانێن تەلەڤیزیۆنا پەکەکێ، ل داخویانییێن ئۆجالان ب خوە یێن وێ دەمێ بنێرین، ئەم دێ ڤێ راستییێ پر ھێسان پەسەند بکن. ئەو ھەڤۆکا ئۆجالان یا کو دەما ل ئیتالیایێ بوو، ھەم ژ پارێزەرێ خوە رە و ھەم ژی ل تەلەڤیزیۆنێ ب دەڤێ خوە گۆتیە، ب تەنا سەرێ خوە د ڤی واری دە بەلگەیە:
“ئەزێ ھەرم ترکیەیێ و ڤێ مەسەلێ ل ئەنقەرەیێ چارەسەر بکم.”
ئۆجالان و پەکەکەیا وی، د ھاتنا وی یا ترکییەیێ دە ب ئیدیعایێن کو “ئۆجالان ب کۆمپلۆیەکێ رادەستی ترکییەیێ کرن” دە ناڤێ ئیستیخباراتێن سێ دەولەتان دەرباس دبوو. ئەمەریکا، ئیسرایل و یەونانیستان!
پشتی 25 سالان دیسا ئۆجالان و پەکەکەیا وی دوبارە دکن کو؛
“د رۆژھلاتا ناڤین دە سینۆر تێن گوھەرتن. ئەمەریکا، ئیسرال، ئینگیلتەرە و ھەموو ھێزێن ئەمپەریال دخوازن کوردان ژی د ناڤ ڤێ گوھەرتنێ دە بجیھ بکن و براتییا کوردان و ترکان یا 1000 سالی خەراب بکن. دخوازن ترکییەیێ پەرچە بکن و بگھێژن مەرامێن خوە. ئەم بریارێ ددن کو ل گەل ترکییەیێ نە و ئەم رێ نادن کو کورد ل گەل ئەمپەریالیستان جیھ بگرن”(!)
ئەز دێ د ڤێ گۆتارێ دە، داخویانی، ئارمانج، ھەلوەستا ئەشکەرە یا تێکلیێن ئۆجالان لگەل دەولەتا ترک و باندۆرێن وان یێن ل سەر پاشەرۆژا گەلێ کورد بنرخینم. پێوەندیێن نیقاشبارێن داخویانییێن ئۆجالان، وەکی ئاسیمیلەکرنا ناسنامەیا کوردی و لھەڤھاتنا وان لگەل ستراتەژیێن ھەرێمی یێن دەولەتا ترک، دێ د چارچۆڤەیەکێ زەلال دە هێن شرۆڤەکرن.
ئیدیعایا کو ئۆجالان تەعلیماتێن خوەیێن ژ بۆ کۆنگرەیا 12ێ یا پەکەکێ ژ ئاڤاھیا میتێ (تەشکیلاتا ئیستیخباراتا نەتەوەیی یا ترک) ب تەلەفۆنێ دایە، مژارا نیقاشەکا گرینگە. ئەڤ نیقاش، ب گشتی پەکەکێ و دیرۆکا وێ یا 40 سالی ددە بن نەشتەرێ. ئەڤ رەوش، پرسیارا کا ئۆجالان 25 سالن د گرتیگەھێ دە د تەجریدێ دەیە یان نا، خوەسەریا وی یا فیزیکی و سیاسی دکە مژارا لێپرسینێ و پۆزیسیۆنا وی یا “سەرۆکاتیێ” ب ئاوایەکی جدی ڤەدکە نیقاشێ. داخویانییا ئۆجالان یا کو دبێژە؛ “د بن چاڤدێریا دەولەتێ دە ئەم ب ڤێ جڤینا خوە بەرنامەیا خوە ئامادە دکن،” نیشان ددە کو د پێڤاژۆیێن بریارگرتنا ستراتەژیک یێن پەکەکێ دە باندۆرا دەولەتا ترک راستەراست یان نەراستەراست ھەیە. ئەڤ یەک، پرسیارێن ل سەر شیانێن رێخستنێ یا تەڤدەگەرینا وێ یا وەکی ئاکتۆرەکی سەربخوە دەردخە بەر نەشتەرێ.
داخویانییا ئۆجالان کو دبێژە ئەو د ناڤ ھەولدانا ئاڤاکرنا “جڤاکەکا دەمۆکراتیک” دەیە، ھەر چەندی ب ئاوایەکی ئەرێنی خویا بکە ژی، دڤێت ئەڤ گۆتنە د چارچۆڤەیەکا لھەڤھاتی لگەل پۆلیتیکایێن ئاسیمیلاسیۆنیستێن دەولەتا ترک بهێت شیرۆڤەکرن! نەمازە تەکەزکرنا وی یا “ڤەگوھاستنا ژ شەر و پەڤچوونێن جوداخواز بەر ب ئاشیتی و یەکبوونا دەمۆکراتیک” ڤە، ئەشکەرە نیشان ددە کو داخوازێن مللی یێن مللەتێ کورد، نە دەولەتەکا سەربخوە یان خوەسەری، لێ د چارچۆڤەیا یەکبوونا لگەل دەولەتا ترک ژ نوو ڤە تێنە پێناسەکرن. ئەڤ داخویانی، بێ گومان نیشان ددن کو نێزیکاتیا ئۆجالان یا کو وەکی “پارادیگمایا نوو” تێ بناڤکرن، ئارمانجا وێ؛ پێشی ل تێکۆشینا دۆزا کورد و کوردستانێ دگرە و خزمەتا ئارمانجا دەولەتا ترک یا بھێزکرنا ھەگەمۆنیایا وێ یا ھەرێمی دکە ئارمانج.
داخویانییا ئۆجالان یا کو دبێژە، “ب تایبەتی لگەل ترکیەیێ ل ئیراق، ئیران و سووریەیێ ژی پێڤاژۆیێن ب ڤی رەنگی دێ هێن دەستپێکرن،”؛ نیشان ددە کو ئەڤە ستراتەژییا دەولەتا ترکە و نە تەنێ ب کوردێن باکورێ کوردستانێ ڤە سینۆردارە، لێ ئارمانج پرۆژەیەکە کو ب دەستێ ترکییەیێ کوردێن چار پارچەیێن کوردستانێ کۆنترۆل بکە. ئەڤ، تێ واتەیا کو دۆزا کورد و کوردستانێ خوەسەری، فەدەراسیۆن و داخوازێن دەولەتبوونێ، ل گۆری بەرژەوەندیێن ھەرێمی یێن دەولەتا ترک بێن دیزاینکرن.
داخویانییا ئۆجالان یا کو دبێژە، “ئەم دەست ژ زمانێ نەتەوە دەولەتبوونێ بەرددن،” ھەر چەندی وەکی رەخنەیەک ل دژی مۆدەلا نەتەو-دەولەتێ یا مۆدەرن خویا بکە ژی، د پراتیکێ دە داخوازێن مللی یێن مللەتێ کورد مارژینال دکە و خزمەتا پۆلیتیکایێن ئاسیمیلاسیۆنێ یێن دەولەتا ترک دکە ئارمانج. دەستژێبەردانا مۆدەلا نەتەو-دەولەتێ، تێ واتەیا دەستژێبەردانا مافێ کوردان یێ دیارکرنا چارەنووسا خوە یا سیاسی و چاندی. ئەڤ یەک، بێ گومان ئارمانج دکە کو مللەتێ کورد د بن سێبەرا چار دەولەتێن داگیرکار دە بحەلە و تونە ببە. ئەڤ پارادیگما، ب ناڤێ “یەکبوونێ” ناسنامەیا ملەتێ کورد د ناڤ دەولەتا ترک دە، ئاسیمیلەکرنا ملەتێ کورد پێشنیار دکە.
داخویانییا ئۆجالان یا کو دبێژە، “پاراستنا د بن ئینیسیاتیفا ترکیەیێ دە، ھەم ھەوجەداریا ئاقلی یە ھەم ژی ئیفادەیا راستیێ یە،”؛ داخوازەکە کو داگیرکارییا دەولەتا ترک مەشرووع دکە. ئەڤە، نیشان ددە کو مللەتێ کورد نە وەکی ئیرادەیەکا سەربخوە، لێ وەکی پەیوەندەک د بن بەرژەوەندیێن ستراتەژیک یێن دەولەتا ترک دە تێ دیتن.
مۆدەلا “کۆنفەدەرالیزما دەمۆکراتیک” کو د سەرۆکاتیا ئۆجالان دە ھاتی پێشخستن، د تەئۆریێ دە ئارمانج دکە کو رێگریێ ل دەولەتبوونا کوردان ل ھەرێمێ بکە. ئەڤ مۆدەل، مافێن چاندی، سیاسی و جڤاکی یێن مللەتەکی زێدەتری 60 میلیۆنی ل ئالیەکی دھێلە و ب لەز ئاسیمیلاسیۆنێ ب ئارمانجا ترکبوونێ ئەساس دگرە. نەمازە راستیێن ھەڤکارییا ئۆجالان لگەل دەولەتا ترک و پەژراندنا بێ شەرت و مەرج یا ڤێ بەرنامەیێ ژ ئالیێ کادرۆیێن رێڤەبەرێن پەکەکێ ڤە، نیشان ددە کو تێگەھا “سەرۆکاتیێ” نە گۆتنەکا ڤالایە، ئۆجالان د رێخستنێ دە ھەر تشتە و ژ بلی وی ئیرادەیا کەسەکی دن تونەیە. د ڤێ چارچۆڤەیێ دە، “پارادیگمایا نوو” یا کو ئۆجالان لگەل دەولەتا ترک ل سەر ملەتێ کورد فەرز دکە، کوردان بەر ب پاشەرۆژەکا نەدیار و کۆلەتیێ ڤە دبە و ترکبوونێ ل سەر وان فەرز دکە. ئەز نە ل دژی “چەکدانینا پەکەکێ و بداوی ئانینا شەرێ وان یێ چەکداری مە”، ژ بەر کو ئەڤ ھێزە، ئەڤ شەرێ چەکداری نە د خزمەتا ملەتێ کورد دە بوو و نە د خزمەتا کوردستانێ دەیە. تەسفییەکرنا ڤێ ھێزێ د مفایێ دۆزا مللەتێ کورد دەیە.
داخویانییێن ئۆجالان یێن د کۆنگرەیا 12ێ یا پەکەکێ دە، نیشان ددن کو رێخستن ژ ئالیێ ئایدۆلۆژیک و ستراتەژیک ڤە ب تەمامی د بن کۆنترۆلا ئۆجالان دەیە. ھەروھا، ئەڤ یەک ئیدیعایا کو “25 سالن د زیندانێ دە، د تەجریدێ دەیە” (!) ژی دەرەو دەردخە. دەما ئەم چارچۆڤەیا تەئۆریک یا پەکەکێ یا 25 سالێن داوی و ھێزێن کوردی یێن کو ئارمانج کرنە بفکرن، راستیا کو ئەڤ ھەموو ژ ئالیێ ئۆجالان ڤە تێن برێڤەبرن دەردکەڤە ھۆلێ. گەلۆ چاوا دکارە وەرە راڤەکرن کو کەسەک “25 سالان د زندانێ دە، د بن تەجریدێ گرتییە، لێ سەروەریا خوە ل سەر گەریلایێن کو دهێت ئیدیعا کرن “تێکۆشینا ئازادیێ” ددن، ددۆمینە، رێ ل بەر وان ڤەدکە و بریاران ل وان فەرز دکە؟
ئۆجالان، دەوەتا ترکە! ئەڤ ژی ھەم مێژیا پەکەکێ، ھەم ناڤەندا بریارگرتنێ، ھەم خەزینەیا وێ و ھەم ژی خوەدیێ وێیە، ب سالانە بھەڤ را لاشێ ملەتێ کورد دشەوتینە. داخویانییا ئۆجالان کو ئینیسیاتیفا دەولەتا ترک وەکی “ھەوجەداریا ئاقل” و “ئیفادەیا راستیێ” بناڤ دکە، تێکۆشینا ملەتێ کورد یا سەرخوەبوون و ھەبوونێ دخە ناڤا پرسیاران! کۆنسەپتا پەکەکێ، ئاڤاھیەکە کو ئاسیمیلاسیۆن و ونداکرنا ناسنامەیا کوردان ئارمانج دکە. داخویانییێن ئۆجالان و پۆزیسیۆنا پەکەکێ، ژ بۆ پاشەرۆژا کوردان نیشانێن ب تەھلووکە و جدی نە.
د ڤێ چارچۆڤەیێ دە، ژ نوو ڤە زندیکرنا ئەرکا دیرۆکی یا تێکۆشینا رزگاریا ملەتێ کورد و کوردستانێ، بھێزکرنا تێگھشتن و تێکۆشینەکا کو ئیرادەیا مللەتبوونێ بکە ناڤەند، د ھەیاما بێ دە گرینگیەکا رەخنەیی دگرە ناڤ خوە.
