وەزیرێ دەرڤەیێ ئیرانێ، عەباس ئیراقچی د پەیوەندیەکا تەلەفۆنی دە لگەل ھەڤتایێ خوەیێ بریتانی، داڤید لاممی، گۆت: “داخوازا خوەراگرتنێ، بێ واتەیە.”
د پەیوەندیەکا تەلەفۆنی دە، وەزیرێ کارێن دەرڤە یێ ئیرانێ عەباس ئیراقچی و وەزیرێ دەرڤەیێ بریتانیایێ داڤید لاممی، رەوشا داوی و ئێرشێن ئیسرایلێ یێن ل سەر ئاخا ئیرانێ گۆتووبێژ کرن. ئیراقچی ژ ھەڤتایێ خوەیێ بریتانی رە راگھاند کو ئیرانێ دەست ب بەرسڤدانا ئێرشێن ئیسرایلێ یێن ل دژی بنگەهێن ئەتۆمی و سازی و دەزگەھێن خوەیێن لەشکەری کریە.
ئۆپەراسیۆنا “شێرێ راپەری” و ئارمانجێن وێ
د بەربانگا رۆژا ئینێ، 13ێ خزیرانا 2025ێ دە، ئالۆزیا د ناڤبەرا تەھران و تەل ئەبیبێ دە دەرباسی قۆناغەکا نوو و مەترسیدار بوو. د ڤێ چارچۆڤەیێ دە، ئیسرایلێ ب زێدەتری 200 فرۆکەیێن شەری، د ئۆپەراسیۆنەکا ب ناڤێ “شێرێ راپەری” دە، ئێرشی زێدەتری 200 ئارمانجێن ستراتەژیکێن د ناڤ ئاخا ئیرانێ دە کر.
د ئێرشێن خوەیێن ئاسمانی دە، ئیسرایلێ ناڤەندێن ئەتۆمی یێن نەتەنز، فۆردۆ و ئیسفەھانێ کرن ئارمانج. ل گۆری ئاژانسا ناڤنەتەوەیی یا ئەنەرژیا ئەتۆمێ، زیان گھیشتیە ڤان ناڤەندان. مەدیایا ئیرانێ ژی راگھاند کو د ئەنجاما ئێرشان دە شەش زانیاریێن ئەتۆمی یێن ئیرانی ھاتنە کوشتن.
فەرماندارێن پایەبلندێن سوپایێ پاسداران ھاتن کوشتن
ھەر ل گۆری مەدیایا ئیرانێ، د ھەمان ئێرشان دە، ئیسرایلێ ھەژمارەک ژ فەرماندارێن ھەری پایەبلند یێن سوپایێ پاسداران کوشتنە. د ناڤ کوشتیان دە سەرفەرماندارێ ھێزێن چەکدار محەمەد باقری، فەرماندارێ گشتی یێ سوپایێ پاسداران حوسێن سەلامی و ھەروھا فەرماندارێ ھێزا ئەسمانی یا سوپایێ پاسداران ژی ھەنە.
بالیۆزێ ئیرانێ یێ ل نەتەوەیێن یەکگرتی ژی راگھاند، د ئەنجاما ئێرشێن ئیسرایلێ دە ب گشتی 78 کەس ھاتنە کوشتن و 320 کەسێن دن ژی بریندار بوونە.
