بووبێ ئەسەر
ئەڤ پرس، پرسەکە خوەش، راست و دەلالە. لێ بەرفرەھە. ژ بەر کو کورد ملەتەکی کۆلۆنییە و ئەڤە سەد سالن کو داگیرکەران وەلاتێ مە پەرچە کرنە. ب پەرچەکرنا وەلات، مەژی و باوەریێن کوردان ژی ل گۆر خوە گوھەرینە.
ژ بەر کو پرۆژەیا لۆزانێ یا 1923ێ ئەو بوو کو دڤێت داگیرکەران د سەد سالان دە ھەمی کوردێن ناڤا خوە قەداندبانا. لێ ب سەر نەکەتن. ئەڤ پرۆژە ب ئازادیا باشوورێ کوردستانێ تێک چوو.
ژ بەر، ل با ملەتێ بێ دەولەت راستی زوو ب زوو پەیدا نەبە. ئەو مەژی بێتر شەخسی و بەرژەوەندیا کەسایەتیێ د ناڤا خوە دە ڤەدحەوینە. ژ بەر ڤێیە کو راستی ل با گەلێ کۆلۆنی زەحمەتە. دەما کەسەکی یان کەسان راستی گۆتین ژی ئەو ژ لایێ جڤاتێ دە وەکە کەسایەتیەکی نە نۆرمال تێ زانین یان قەبوول کرن. لۆما پێشیێن مە گۆتنە: “کەسێ راستیێ دبێژە، ژ حەفت گوندان تێنە قەوراندن.”
ژ بۆنا کو ئەم وەکە کورد راستیێ ببینین و بزانین دڤێت بەری ھەر تشتی ئەم ببن خوەدی دەولەت. ئەساسێ ڤێ ل باشوورێ کوردستانێ ھاتیە ئاڤێتن. لۆما دڤێت ھەر کوردەک پشتگریا ور بکە.
ژ بۆنا مە کوردان راستی ئەوە کو دڤێت ھەرکەس ل گۆر بەرژەوەندیا گەلێ خوە و ژ بۆنا ئازادی و سەرخوەبوونا وی کار بکن. دڤێت کورد ببن نەتەوەیی دا کو بکاربن بەرژەوەندیا گەلێ خوە بپارێزن. دڤێت ھەمی پارتی و کەسایەتیێن کورد بەرژەوەندیا گەلێ خوە د سەر ھەر تشتەکی خوە رە بگرن.
ژ بەر کو کەسێن نەتەوەپەرەست، وێ تم ژ بۆنا ئازادی و رەحەتکرنا مەلەتێ خوە کار بکە. د ناڤا ڤێ دە دڤێت دەرەو تونە بن، ھەڤدو خاپاندن نەبە، وەکە کورد دڤێت ئەم ژ ھەڤدو حەز بکن. شاشیێن ھەڤدو ب زمانەکی مەعقوول رەخنە بکن، باشیێن ھەڤدو پەسەند بکین.
دڤێت بەرێ راستیا خوە و دویڤرا ژی یا گەلێ خوە ببینین دا کو بکاربین کارێن باش بکن. تەڤگەر و پارتیێن ب دەھ کەسان بە و دۆزا کوردستانەکا سەربخوە بکە ئەڤ ل ھەڤ نایێ. دڤێت ئەم ل گۆر راستیا گەل و یا پارتیێن خوە تەڤبگەرین دا کو بکاربین راستیێ ببینین.
لێ مخابن ئیرۆ ل باکورێ کوردستانێ راستی نەمایە. لۆما یەکیتیەکا نەتەوەیی پێک نایێ. ھەتا کو کورد راستیا خوە و وەلاتێ خوە نەبینن نکارن خوە ئازاد بکن.
ھەلبەت ژ بۆنا راستیێ مرۆڤ دکارە گەلەک تشتان بێژە و بنڤیسینە. لێ باوەرم ھاتە ئەم وەکە کورد ڤێ فێم بکن، دڤێت ئەم کورد ل گۆر راستیا خوە و وەلاتێ خوە تەڤبگەرن. سەدەما کو ئەڤ سەد سالن ئەم بندەستن و نکارین خوە ئازاد بکین ئەوە کو ئەم راستیێ نابینین، نابێژین و ل گۆر راستیێ تەڤناگەرین.
لێ دەما ھندەک بنڤیسینن و بێژن ژی ئەو ژ لایێ گەلەک کەسێن بەرژەوەندی پەرەست تێن بنجلکرن. ژ بەر کو گەلەک جاران راستی نایێ حەسابا کەسێ کو نە راست تەڤ دگەرن.
ھەگەر ئیرۆ ئەم بالا خوە بدن ئەندام، رێبەر و دەستھلاتا گەلەک و پارتیێن دبێژن: ئەم کوردستانی نە، پرانیا وان ل سەر ناڤێ وەلات، کارێ شەخسی و مالباتی دکن. ژ بۆنا کارێ خوەێ شەخسی ژی پارتیێن خوە ب کارتینن.
ژ بەر ڤێ پیویستە کو ھەر پارتی ژ نوودە ئەندام و رێڤەبرێن خوە بەرچاڤ بکن، دیرۆک و رابردویێن وان فێربن دا کو بکاربن پێشی ب ھەڤرە تەڤگەر و پارتیێن کوردستانی ڤەکن و د بن کۆنەکێ نەتەوەیی دە یەکتیا خوە پێک بینن.
ھەگەر د پارتیەکێ دە کارێن ھەڤبەش تونە بن. ھەگەر د پارتیەکێ دە ل گۆر زانین و کارینا ئەندامان کار نەیێ پارڤەکرن. ھەگەر د پارتیەکێ دە کەسێن چالاک، ژیر و زانا ژ یێن کمباخ، بەرژەوەندیپەرەست و ترسۆنەک ژ ھەڤدو نەیێن ڤەقاتاندن، ئەو پارتی ب سەرناکەڤە.
لۆما گەلەکی گرینگە کو دڤێت دەستپێکێ ھەر پارتیەک راستیا خوە ببینە. ب ڤێ دیتنێ ژی دێ سەدەمێن کو ب پێشناکەڤن دێ بێ دیتن.
ھەگەر پارتیێن مە یێن کوردستانی، ل گۆر ڤان راستیێن من ئانین زمان تەڤنەگەرن، ب سەر ناکەڤن. پشتی دەربەیا لەشکەری یا 1980 کو ل ترکیێ و ل باکورێ کوردستانێ پێک ھاتبوو کو جڤات، پارتی و تەڤگەرێن کوردستانی تاروومار ئانکو ژ ھەڤ خستبوو کو ژ بۆنا راستیێ نەبینن. نەبن یەک، ھەمی رێ و رێباز ھاتبوو بکارئانین. ئێشا ئیرۆ یا دوهییە. ھەگەر وەھا ھەرە سبە دێ ئەڤ ئێش مەترسیدارتر و زالمتر بە کو ئێدی ملەتێ مە ھەتا سەد سالن دن دێ نەیێ سەر ھێشێ خوە…
