دەولەتا ترک ناڤێ پێڤاژۆیێ کرییە “ترکیەیا بێ تەرۆر” و د پرۆژەیا کو ژ گەل ڤەشارتی تێ مەشاندن گھیشتییە قۆناغەکا نوو. ھەڤدیتنێن د ناڤبەرا ئیمرالی و میتێ دە ب ئاوایەکی ژ گەل ڤەشارتی تێن کرن. ژ بەر ڤێ یەکێ ژی گەلەک مژارێن دەربارێ ڤێ بابەتێ دە د ناڤ گەل دە ب گومان تێن پێشوازیکرن. ھەری داوی ژی مژارا چارەنووسا مستەفا قاراسوو گەل پێ مژیل کربوو. لێ د 1ێ تیرمەھێ دە تشتەک بالکێش قەومی و مستەفا قاراسوو کو ئەندامێ کۆما ئەنقەرە یا پەکەکێ یە و ئیبراھیم کالن ھەمان دەمێ ل باشوورێ کوردستانێ خویا بوون.
دارکا مازی چارەنووسا قاراسوو ئەشکەرە کربوو؟
مستەفا قاراسوو کو یەک ژ ئەندامێن کۆما ئەنقەرە یا پەکەکێ یە، ل کۆنگرەیا پەکەکێ یا کو د مەھا گولانێ دە ھاتبوو کرن بەشدار نە بوو و ل سەر ڤێ یەکێ د ناڤ گەل دە نیقاشەکا ب ئاوایێ “مستەفا قاراسوو ل کو دەرێیە؟” دەست پێ کربوو. پەکەکێ ب ئاوایەکی زانەبوون خەبەرەکی وەکی “قاراسوو ھات کوشتن” بەلاڤ کربوو. د گەلەک مەدیایێن کوردی دە ژی دەربارێ ڤێ مژارێ دە نووچە ھاتبوون بەلاڤکرن. چاڤکانیێن دارکا مازی د 3یێ خزیرانێ دە لێکۆلینەکا کو دەربارێ ڤێ مژارێ دە کربوو ب گەل رە پارڤە کربوو و دیار کربوو کو قاراسوو ژ دەمەکێ درێژە ل رۆژئاڤایە و دبە کو چووبە ئیمرالیێ.
قاراسوو و کالن ل کارگەھا میتێ یا ل ئیمرالیێ پێکڤە بوون..؟
دوھی، واتە د 1ێ تیرمەھێ دە دەربارێ ڤێ مژارێ دە گەلەک پێشکەتن چێبوون. دەمژمێرا ڤان بوویەران ژی پر بالکێش بوو.
رۆژنامەڤان “ئەحمەد نەسین” راگھاندنەک دەربارێ وێ یەکێ کو مستەفا قاراسوو ل ئیمرالیێیە وەشاند. “ئەحمەد نەسین” کەسەکە کو تێکلیەکا نێزیک لگەل مەدیایا پەکەکێ یا ل ئەورۆپایێ ھەیە. ئەحمەد نەسین ژی دیار کر کو ئەڤ ئاگاھیە ژ یاڤوز ئۆزجان وەرگرتیە. ئۆزجان یەک ژ ناڤێن کەڤن یێن مەدیایا پەکەکێ یە. واتە پەکەکێ ب ئاوایەکی زانەبوونی خەبەرا کو قاراسوو ل ئیمرالیێ یە، د مەدیایێ دە بەلاڤکربوو.
پەکەکێ ب یەکێ دخوەست دو تشتان بکە: یەکەم، ژ بەر کو پێڤاژۆ پێشڤە ناچە و بێباوەریەک د ناڤبەرا جەماوەری و کادرۆیێن وێ دە ھەبوو، دخوەست ڤێ بێباوەریێ راکە. یا دویەم ژی، ب بەلاڤکرنا ڤێ ئاگاھیێ دخوەست ژ دەولەتێ رە ببێژە د پێڤاژۆیێ دە لەزێ بکە.
دوھی، واتە د 1ێ تیرمەھێ دە ھات دیارکرن کو مستەفا قاراسوو ئیرۆ دێ بەشداری کانالا ب ناڤێ “مەدیا ھابەر” یا پەکەکێ کو ب ترکی وەشانێ دکە ببە. دەمژمێر و ھەڤھاتنا ھندەک بوویەران پر بالکێش بوو. ژ بەر کو مستەفا قاراسوو ژ نێزیکی سێ مەھان ڤە ل جھێ خوە نە بوو، تام د رۆژێن کو خەبەرێن وەکە کو کۆمەکا پەکەکێ دێ چەکان دانە، خویا ببوو. دویەم ژی ھەمان رۆژ خەبەرێ کو سەرۆکێ میتێ ئیبراھیم کالن ژی ل ھەولێرێیە ھات بھیستن.
تێ خویا کرن کو کالن و قاراسوو ب ئاوایەکی ھەڤبەش تەڤدگەرن. و گەلەک چاڤکانیێن نێزیکی پەکەکێ دیار دکن کو ل بریارگەھا میتێ یا ل ئیمرالیێ ھندەک کادرۆیێن پەکەکێ وەکی مستەفا قاراسوو، بەسێ ئەرزنجان و ئەلیف پازارجک ژی جھ دگرن. واتە ئیبراھیم کالن قاراسوو ژ ئیمرالیێ ئانیە و ئەو شاندیە جەم رێڤەبرێن دن یێن پەکەکێ. ھندەک دەردۆرێن پەکەکێ دبێژن “مستەفا قاراسوو بەری دو سالان ژ سلێمانیێ ب گارانتیا ئیرانێ ب فرۆکەیێ چوویە تەھرانێ، نھا ب گارانتیا ترکیێ دگەرە.”
دێ کۆمەکا پەکەکێ خوە چەکێن خوە دەینە؟
ھندەک چاڤکانیێن مەدیایێ خەبەرێن وێ یەکێ کو پەکەکە ئیرۆ دێ خوە بێچەک بکە بەلاڤ کرن. ل گۆری ڤان چاڤکانیان کۆمەکا پەکەکی دێ دەست ژ چەکێن خوە بەردە. و رەیا گشتی ژی د ڤان چەند رۆژێن داوی دا ل سەر ڤێ خەبەرێ نیقاش کر. واتە دانینا چەکان ژ ئالیێ ڤان کۆمان ڤە، پاشی ڤەگەرا وان بەر ب کامپێن خوە ڤە، ئاگاھییەکا سەیرە.
ژ بەر کو د بنگەھ دە ل ئیمرالیێ ھەموو رێکەفتن ھاتنە کرن و ئۆجالان قەبوول کریە کو پەکەکە ل گۆر رەوشا نوو یا ھەرێمێ ل سەر بنگەھا بەرژەوەندیێن ترکیێ خوە بگوھەرینە. د نامەیا ئۆجالان یا 27ێ شباتێ دە “ئەم ژ بۆ کوردان تشتەکی ناخوازین” ھەلوەست و تەسلیمبوونەکا بێ شەرت و مەرجە ب زەلالی دیار بوو. گاڤا تەسلیمبوونەکا وھا ستراتەژیک یا مەزن و رێکەفتنەکا بوونە بەشەک ژ دەولەتا ترک ھەبە، ھەموو مەسەلەیێن دن دبن مەسەلەیێن لاوەکی. گاڤا کو قاراسوو دکارە ب فرۆکێ ھەرە ئیمرالیێ، وێ دەمێ نمایشا کو چەند شەرڤانێن بەلەنگاز و ژ دنیایێ بێ ئاگاھ دێ ل سلێمانیێ چەکێن خوە دەینن ژی بێ واتەیە.
ژ ئالیەکی نووچەیێن کو دەولەت و ژ ئالیێ دن پەکەکە جارنا بەلاڤ دکن ژ بۆ کو نەبزا رایا گشتی بگرن و رۆژەڤێ کۆنترۆل بکن ب زانەبوون بەلاڤ دکن. یا ھەری راست ئەوە کو کورد زێدەتر ل سەر پرسێن وەکی “پەکەکێ چ قەزەنج کر کو خوە هەلدوەشینە، ئۆجالان ل گۆری چ شەرت و مەرجا رێخستن تەسلیم کر” بسەکنن.
