بووبێ ئەسەر

چاوا کو دارستان ھاتنە و تێنە تالانکرن کو ژ بۆنا مرۆڤ خوە ل بەر سێبەرا وان ھێنک بکە، دارەک نەهێلا، ئیرۆ د گەلەک رێخستنێن مە دە ژی کەسێن زانا، ژیر، ژێھاتی و کێرھاتی نەهێلانە.

جامێرەک ژ بۆنا کو خوە ھنێک بکە سەیوانا خوە ب سەرێ دارەکا، ژێکری، چلمی و ھشک ڤە گرێدایە و خوە دایە بەر سێبەرا وێ. ھەگەر دار نەھاتبانە ژێکرن و ھشک کرن، پێویستیا وی جامێری ب سەیوانێ نەدما.

ئیرۆ ئەم دزانین گەلەک جانک و جامێرێن کو من ل ژۆر بەحسا وان کریە د ناڤا رێخستنان دە زۆر پەیدا دبن. پرانیا وان ژ بەر تەڤلھەڤیا ناڤا رێخستنا خوە و گەلەک ژی ژ بەر ژیر و ژێھاتیبوونا خوە ژ ئالیێ پارتیێ ڤە ھاتنە دوورخستن.

لۆما ژی رەوشا پارتیێن مە ژی بوونە وەکە وی جامێرێ کو سەیوانا خوە ب سەرێ دارێ ڤە گرێدایی دا کو خوە ل بەر سێبەرێ ھێنک بکە. پارتیان ژی د ناڤا خوە دە زانە نەھشتنە. لۆما ژی ئیرۆ ب سایا کەسێن نەزان، بەرژەوەند پەرەستێن نە کێرھاتی دخوازن پارتیێن خوە ب رێڤە ببن.

لێ ئەم دبینین کو پارتی ب کەسێن وەھا ناهێنە برێڤەبرن، پێش ناکەڤن و ھەر د جھێ خوە دە دمینن. ژ بەر کو وان کەسێن نەزان، نەکێرھاتی و بەرژەوەندی پەرەستێن کو سەرێ کانیا رێخستنان د دەستێ وان دەنە، ناھێلن و ناخوازن کەسێن زیرەک، بیرەور و تێگھشتی ببن ئەندام یان رێڤەبرێن پارتیێن خوە.

ئەز ب ڤێ گۆتنێ ناخوازم نەحەقیێ ل چ کەسان و پارتیان بکم. کەسێن ژ ڤێ گۆتنا من باوەر ناکن، بلا پێنووس و لێنووسەک (دەفتەر و قەلەم) بگرن دەستێن خوە و یەک ب یەک ئەندام و رێڤەبرێ ھەموو پارتیێن باکورێ کوردستانێ بکن مژارا لێکۆلینەکێ.

د لێکۆلینەکا وەھا دە دێ بێ دیتن کو د سەرۆکاتیا پرانیا پارتیێن مەیێن کوردستانی دە کەسێن من ئانین زمان، ھەنە. ژ بەر کو کەسەکی/ێ نەزان و د سەرۆکاتیا پارتیەکێ دە جھ گرتبە، نە مەعقوولە کو ئەو چ جاران بخوازە کەسەکی ژ وی زانەتر ببە رێڤەبر.

من گەلەک جاران گۆتیە و ئانیە زمان کو نەسەرکەتنا پارتیێن باکورێ کوردستانێ ژ بەر ڤێیە. د سەرۆک و سەرۆکاتیا گەلەک پارتیان دە ژی کەسێن مۆدەلا سالێن 1970.1980 ھەنە.

ل ترومبێلەکا مۆدێل 1970-1980 بفکرن کو ئەو دکارە چقاسی ھەرە. د ناڤا ڤێ نووژەنیا ئیرۆ دە، ب ڤێ تەکنیکا پێشکەتی، ھێ ژی رێخستن و پارتیێن مە ل گۆر دەمێن بەرێ، ب ترومبێلا مۆدێل 1970-1980ێ دخوازن خوە بگهینن جھێ کو دخوازن ھەرنێ.

ھا گەلەک جانک و جامێر دکارن بێژن: تو باش دبێژی. لێ کا پێشنیارێن تە چ نە؟

ھوون باوەر بکن من گەلەک جاران پێشنیارێن خوە گۆتینە و نڤیسینە. ھەگەر کەسێن من و نڤیسێن من دشۆپینن یان شۆپاندبن دێ وان گۆتن و نڤیسێن من ل تۆرا مەدیایا ئیرۆ ببینن. لێ ئێدی نڤیس و گۆتن ژی تێرا ناکە. ژ بەر کو کەسێن نەزان و خوە زانە دحسبینن زەحمەتە کو تە، من و مە گوھداری بکن. وەکە گوھداری بکن دکن لێ تم ژی وەکە خوە دکن.

ژ بۆنا پێشکەتنا رێخستنێن مە پێویستە کو سەرۆکاتیا وان ژ جوانێن ھێژا، زیرەک و ھەڤدەمی پێک بێ. ژ بەر کو جوان تم ژی ژ سالمەزنان بێتر دکارن ب ھەڤرە بدن و بستینن. لێ ل با مە سالمەزنان ئەو ژی تونەیە.

ب سالانە کو ئەم ژ ھەڤدو خەیدینە. وەھا خویایە ھەتا مرنێ ژی ئەم دێ ل سەر وێ راوەستن. ھەگەر مە وان سالمەزنێن ژ ھەڤدو خەیدی شییابا بهێینە جەم ھەڤ. ژ نوودە ب ھەڤرە ل سەر رەوشا وەلات ئاخفتیباین. تەجروبەیێن خوەیێن ب سالان دابانە جوانێن خوە. مە رێڤەبری دابانە وان، ھوون باوەر بکن ئەم دا ب رەحەتی ژ ڤێ لاوازبوونێ هێینە ئازاد کرن.

ئەم سال مەزن وەکە رۆژەڤا ئیرۆ تەڤناگەرین، ژ بەر کو ئەڤە ل تەبەتا مە نایێ. لۆما ئەم ژ ڤێ پێشڤەچوونا مۆدەرن فێم ناکن. ئەم ھەر وەکە خوە دکن. پێشنیاران گوھداری دکن لێ دیسا وەکە خوە دکن.

د ڤێ ئاستا مۆدەرن دە کو جوانێن مە ھەر یەک ژ وان ب چەند زمانێن بیانیان دزانن. ھەر یەک ژ وان چەند زانکۆ قەداندنە. لێ گەلۆ ژ وان چەند کەس د رێڤەبریا پارتیێن سیاسی دە جھ گرتنە. من ب خوە نەدیتنە. چما؟

ھەگەر ئەو بکەڤن رێڤەبرتیێ، ترسا ئەز دێ جھێ خوە وەندا بکم، دێ دەستپێ بکە. لۆما ھەتا ژ من تێ ئەزێ نەھێلم جوان بکەڤن سەرۆکاتیا پارتیێن کوردستانی. ھەگەر ھن بخوازن زارۆکێن خوە بکن ئەندام ژی. سالمەزنێن سەرێ کانیان گرتنە دێ نەھێلن و ناخوازن.

دڤێت ئەڤە باش و ب زەلالی بهێت فێم کرن کو ھەتا ئەم و ئەم بن، ئەم ژی دێ تم ب دەھ کەسان بین. دڤێت مرۆڤ بپرسە. چەند زارۆکێن رێڤەبرێن پارتیێن مەیێن باکورێ کوردستانێ ئەندامێن پارتیا بابێ خوە نە؟ من ئەو ژی نەدیتنە. ژ بەر کو ئەم ب خوە ئاستەنگن.

لێ ل تەڤگەرا بارزانیان بنێرن، ژ رۆژا دەست ب شۆرەشا ئازادی و سەرخوەبوونا کوردستانێ کربوون و ھەتا نھا زارۆکێن وان ھەر ل با وان بوونە. لۆما ژی ئەو زارۆکێن کو د ناڤا شۆرەشێ دە مەزن بوونە، ئیرۆ وەلاتێ خوە ب رێڤە دبن.