د 9ی تیرمەهێ دە پەیاما ڤیدیۆیی یا عەڤدللا ئۆجالان یا دەربارێ پیڤاژۆیا «ترکیەیا بێ تەرۆر» و چەکدانینا چاڤەرێکری یا پەکەکێ هات پارڤەکرن، د ڤێ ڤیدیۆیێ دە ئۆجالان جارەکە دن تەکەزی ل سەر چەکدانین و هلوەشاندنا پەکەکێ کر، تەڤی کو چاڤکانیێن نێزیکی په‌كه‌كێ ژ بۆ ڤیدیۆیا ئۆجالان پەسنێن وەکی «ڤیدیۆیەکا دیرۆکی ژ بۆ سەردەمەکێ دیرۆکی» ب کار ئانینە ژی، لێ بەلێ د ئاخفتنێ دا تشتەکێ نوو نه‌بوو، تاکە تشتێ نوو د ڤێ ڤیدیۆیێ دە هەیی ئەڤ بوو کو گەلەک دەرەوێن پەکەکێ ئەشکەرە بوون و ئەڤ یەک د سۆسیال مەدیایێ دە بوو جیهێ نیقاشێ.
د یەکەم رۆژا ڤەگەرا ئۆجالان بۆ ترکیەیێ د 15 شۆباتا 1999ێ دە، پەکەکێ ب هەموو هێزا خوە یا مەدیایی هەولدا کو ئۆجالان وەکە ماندێلایێ کوردان بدە ناساندن، هەر رۆژ د مەدیایا خوە دە نووچەیێن سەختە پارڤە دکرن و رادگهاند، “ئۆجالان د بن ئیشکەنجە و تەجریدێ دە یە” هەر وەها دگۆت، “ئۆجالان راستی ژەهریکرنێ هاتیە” و هتد… ب ڤێ یەکێ ژی دخوەست راستییا ڤەگەرا ئۆجالان ژ بۆی ترکیەیێ وەکە “شێورمەندەکی دەولەتێ” ڤەشێرە، لێ پشتی دەرباسبوونا 26 سالان و ب یەک ڤیدیۆ هەموو دەرەو و پرۆپاگاندایێن پەکەکێ وەکە بلقێن سەر ئاڤ لێهاتن و هەر تشت ئیفشا بوو.
ڤیدیۆیا ئۆجالان ب زەلالی ئەشکەرە کر کو تەڤ نووچەیێن پەکەکێ یێن کو تێدە دگۆت، ئۆجالان د بن تەجریدێ دەیە تەنێ دەرەوەک بوو کو ژ بۆ جەماوەری دھات گۆتن و ئۆجالان چ جاران د بن تەجریدێ دە نەبوو. ڤێ ڤیدیۆیێ ئەشکەرە کر کو ئۆجالان نە گرتیێ دەولەتێ یە و د زندانێ دە نیە، بەلکو ژ سالا 1999ێ ڤە شێورمەندیا دەولەتا ترک دکە. د ھەموو ھەڤدیتنێن ئۆجالان یێن نڤیسکی و یێن کو ئەم دکارین بگەهینێ دە ژ سالا 1999 ڤر ڤە، ئۆجالان ل سەر گەلەک مژاران وەک “دەولەتێن رۆژئاڤایی دخوازن دەولەتەکە کورد یا ناڤەندی ل ھەولێرێ ئاڤا بکن، ئەورۆپا دخوازە کورد خورت ببن؛ ھوون (ترک) کوردان بگرن و ببن حاکمێ جیھانێ؛ نەتەوەپەروەریا کوردی خەتەرناکە؛ دخوازن ترکیەیێ بچووک بکن و سینۆران بگوھەرینن، دەولەت من ئەرکدار بکە ئەزێ ئاستەنگ بکم” دەولەتا ترک ل سەر مژارێن بۆ وێ مەترسیدار ھشیار کر. مژارا تەجریدا ئۆجالان تەنێ گاڤەک بوو کو ھاتیە ئاڤێتن ژ بۆ شێورمەندیا وی یا ژ بۆ دەولەتا ترک وەرە ڤەشارتن و دەما پێویست بە وەک پێشەنگەکی مەخدوور و سەربلند ل پێشیا کوردان وەرە پێشکێشکرن.
هەر ئەڤ ژی هات کرن، ترکیە و پەکەکە کارین ب پلانەکە هەڤبەش ئۆجالان وەکە کەسەکی مەخدوور و سەربلند ل پێشیا کوردان دەینن و هەر تشتێ کو ترک دخوازن ب رێیا وی جیبجی بکن.
پەکەکە ب رێیا چاپەمەنیا خوە کاریە چاڤێن ئالیگرێن خوە ل همبەر راستیان تاری بکە، رۆژانە ب پارڤەکرنا نووچەیێن دەرەو گەلێ کورد ب گشتی و ئالیگرێن خوە ب تایبەتی چەواشە دکە، پەکەکە د ڤێ مژارێ دا ب ئاوایەکێ شاهرەزایە کو کاریە تەڤ هەلوەست و داخویانی و گۆتنێن رێبەرێ خوە یێن ل دژی کوردستانێ و د بەرژەوەندیا دەولەتا داگیرکەرا ترکیێ دە ژی ژ بیرا وان ببە و ووسا ب وان بدە باوەر کرن کو «ئۆجالان» ب ئاخافتنێن خوە سیاسەتێ دکە و کوردان دپارێزە، لێ راستی بەرەڤاژی ڤێ یەکێ یە، ئۆجالان نە ب تەنێ کوردان ناپاریزە، بەلکو وان دکە قوربانی ژ بۆی پاراستنا سینۆرێن نها یێن ترکیەیێ.
وەکە دخویە ترکیەیێ رۆلا سووارێن حەمیدیێ ب پەکەکێ دایە و دخوازە ب رێیا ئۆجالان و پەکەکێ سینۆرێن ترکیەیێ بەرفرەهتر بکە، وەکە چەوا د میساقا میللی یا ترکیێ دە ئەڤ سینۆر هاتنە خێزکرن.
تشتا ئەم دخوازن ببێژن ئەڤە، وەکە د ڤیدیۆیێ دە ژی ب زەلالی دخویە، ژ ئۆجالان بخوە دیار دبە کو ئەو ت جاری د بن ئیشکەنجە و تەجریدێ دە نەبوویە، بەلکو هەرتم وەکە مێهڤانەکە رێزدار ل ئیمرالیێ ژ بۆی وان خزمەتێن شێورمەندیێ یێن ئەو پێشکێشی دەولەتێ دکە رێز ل وی هاتیە گرتن و ب باشی خزمەتا وی هاتیە کرن، لۆما وسا زکێ وی قەلەو بوویە و روویێن وی گەش بوونە، گەر نە ب ڤی ئاوا بە، گەلۆ چما ئەوقاس قەلەو بوویە؟ چما ت یەک ژ زیندانیێن زیندانا ئامەدێ وەکە ئۆجالان قەلەو نەبوون؟!!
مژارا مەزنبوونا زکێ ئۆجالان د سۆسیال مەدیایێ دە ژی پڕ هات نیقاش کرن و گەلەک کەسان حەنەکێن خوە پێ کرن، لێ بەلێ ئەڤ زک مەزنییا ئۆجالان نە ب تەنێ ژ بەر باش خزمەتکرنا وی ژ ئالیێ دەولەتا ترک ل ئیمرالیێ یێ یە، بەلکو ئۆجالان نها ب ترکیەیەک نوو کو هەموو سینۆرێن میساقا مللی ب خوە ڤە دگرە رە دوجانی یە!
