تێکلیێن د ناڤبەرا پەکەکێ و پێکھاتەیێن گرێدایی وێ دە، کو ھەتا چەند سال بەرێ ژی نەیارتی و دژمناتیا ئاکەپێ و مەھەپێ دکر، ب لەز رەنگی دگوھەرینە. ب دانینا چەکان ژ ئالیێ پەکەکێ ڤە، یان ژی وەکی کو ترکیە ژێ رە دبێژە، پێڤاژۆیا “ترکیەیا بێ تەرۆر”، ھەر دو ئالی ژی داخویانیێن کو تێ دا هەڤدو خەراب دکن راوەستاندنە و داخویانیێن کو تێدا ھەڤوودو تەمام دکن، ددن. دوبارە گۆتارا باخچەلی ژ بۆ ئۆجالان وەکی “رێبەرێ دامەزرینەر” و گۆتنێن ئۆجالان ژ بۆ باخچەلی و ئەردۆگان بەرێز-رێزدار ھەر کو دچە د ئاستا ھەموو رێخستنێ دە خویا دبن. د داویێ دە، پێشنیارا رێز و سلاڤێن باخچەلی یێن ئیرۆ ژ بۆ دەمیرتاش نیشانەکا دن یا ڤێ یەکێیە.
سپاسنامەیا تایبەتی یا باخچەلی ژ بۆ دەمیرتاش ژی نیشان ددە کو نامەیا دەمیرتاش یا د دیرۆکا 17ێ خزیرانێ دە، کو رەخنەدانا خوە ل ھەمبەر دەولەتێ و ئەردۆگان کربوو، ژ ئالیێ دەولەتێ ڤە ھاتیە قەبوولکرن و پەیاما دەمیرتاش گەھەشتییە جھێ پێوەندیدار.
رێز و سلاڤێن گەرم پێشکێشی ھەڤ دکن
ل گۆری نووچەیێن مەدیایێ، سەرۆکێ مەھەپێ دەولەت باخچەلی پشتی مەراسیما دەست ژ چەکان بەردانا پەکەکێ لگەل پارێزەرێ دەمیرتاش ل ئەدرنەیێ تەلەفۆن کریە. باخچەلی پەیامەک ژ بۆی دەمیرتاش شاند: “بەشداریا وە د گھیشتنا ڤێ ئەنجامێ دە پر ھێژا و ب باندۆر بوو. ئەز دێ سپاسدار بم گەر ھوون ڤێ پەیاما من بگەھینن بەرێز دەمیرتاش” پارێزەرێ دەمیرتاش پشترە پەیاما باخچەلی ژ بۆی دەمیرتاش شاند.
دەمیرتاش ھەر وھا پەیامەک ب دەستنڤیسا خوە نڤیساند و تێ دە سپاسییا باخچەلی کر و سلاڤ و رێزگرتنا خوە پێشکەشکر.
ھەر چەند ئەو یەک وەکە کارەکی سادە یێ رێز و سپاسداریێ خویا بکە ژی، ئەڤ مووحببەت ژ ڤێ پر مەزنترە.
نامەیا خوەرەخنەکرنێ یا دەمیرتاش یا د دیرۆکا 17ێ خزیرانێ دە
داخویانیا دەمیرتاش یا د 17ێ خزیرانێ دە، ب سەرناڤێ “دەما وێرەکتیێ یە، نە دەما حەماسەتێ یە”، بوو سەدەما نەرازیبوونەکا مەزن یا رایا گشتی یا کورد. د وێ داخویانیێ دە، دەمیرتاش ھەڤۆکێن وەکی “پاشناڤێ مە ترکیەیە” ب کار ئانی و گۆت، “ژ بەر کو پاشناڤێ مە ترکییەیە، ئەز ھەر کەسی ڤەدخوینم کو ل دۆرا پاشناڤێ مە ببن یەک و بەرپرسیاریێ بگرن سەر خوە.”
ناڤەرۆکا نامەیا دەمیرتاش، ب ئاوایەکی، “خوەرەخنەکرنەک بوو ل ھەمبەری دەولەتا ترکیەیێ و ھەتا عەڤدللا ئۆجالان.” پشتی 2012ێ، دەمیرتاش – ب هاندانا ھندەک ھێزان – خوە وەکی رێبەرەک دامەزراند. دکارە وەرە گۆتن کو دەمیرتاش سیاسەتەک پەژراند کو ژ بۆ ھەر کەسی بالکێش بوو، کو ژ ئارمانجەکا سیاسی یا تایبەتی بێتر ژ بەر خوەستەکا کۆمکرنا لایەنگرا دھات مەشاندن. کەسایەتا وی یا کاریزماتیک و رەوانبێژییا وی یا خوەش د رایا گشتی دە دەنگ ڤەدا. گەلەک دەردۆر، ب تایبەت یێن کو ل دژی دەستھلاتداریا تاکەکەسی یا ئۆجالان، پشتگری دان خەتا دەمیرتاش. دەمیرتاش وەکی ستێرکەکێ ژ نووڤە دبرقی.
بلندبوونا دەمیرتاش گەلەک کەس عاجز کرن. ھەر چقاس خویا بوو کو وی ب گۆتنا “ئەم تە ناکن سەرۆک” ھەری زێدە ئەردۆگان عاجز کریە ژی، لێ د راستیێ دە یێن کو بێتر عاجز بوویی: قەندیل و ئۆجالان بوون.
ئۆجالان ب ئەشکەرەیی گەف ل دەمیرتاش کرن. ھەتا ھەول دا کو دەمیرتاش ژ ھەڤسەرۆکاتیا ھەدەپێ ژی دوور بخە. د ئەنجامێ دە، دەمیرتاش، کو ھێرسا سێگۆشەیا ئیمرالی-قەندیل-ئەردۆگان کشاند سەر خوە لۆما ژی ھاتە گرتن.
ب ئەرێکرنا ڤان ھەر سێ ھەڤالبەندان، دەمیرتاش د 4ێ مژدارا 2016ان دە ھاتە گرتن و ئەڤ نەھ سالن گرتییە و دەردۆرێن پەکەکێ ژ ڤێ گرتنێ پر کێفخوەش بوون.
زیندانیبوون زێدە سوود نەدا دەمیرتاش. دەمیرتاش ھەول دا کو چەپگرێن ترک رازی بکە، لێ ئەو ب سەر نەکەت. وی ھەول دا کو پەکەکێ رازی بکە، لێ ئەو دیسا ب سەر نەکەت. وی ھەول دا کو ئۆجالان رازی بکە، لێ ئەو ژی ب سەر نەکەت.
لگەل پێشکەتنێن نوو، دەمیرتاش نھا دخوازە ژ بۆ ئازادیا خوە تشتەکێ بکە، و د راستیێ دە، وی ئەو نامەیا رەخنەدانا خوە د 17ێ خزیرانێ دە نڤیساندی ب ڤی سەدەمی نڤیساند.
داخویانیا دەمیرتاش راگهاندنا ئامادەبوونا وی یا ژ بۆ بەشداربوونا د پرۆژەیا ئەردۆگان-باخچەلی-ئۆجالان دە بوو. دەمیرتاش د نامەیا خوە دە ب زەلالی وھا گۆت: “ئەم، وەکی جڤاکا ترکیەیێ، د ڤێ ھەیامێ دە دێ یەکگرتی بن؛ دەما کو پێویست بە، ئەم دێ ژ ئەدیرنەیێ ھەتا جۆلەمێرگێ ل دژی مەترسی، ئێریش و ئاژاوەگێریێن کوھەبن، ڤەگوھەرینن ئارتێشەکا گەل یا 86 ملیۆنی؛ ئەم دێ ب بەدەلێن جانێ خوە وەلاتێ (ترکییا) خوە یێ ھەڤپار بپارێزن.”
ئانگۆ، دەمیرتاش قەبوول کر کو ئەو ببە بەشەک ژ پەیمانا میساقا مللی یا ترکییێ. وی رەخنەدایینا خوە ژی بۆ ئەردۆگان کر. پشترە ژ بەر گۆتنا خوە یا “ئەم دێ نەھێلن تو ببی سەرۆک”، پاشڤە گاڤ ئاڤێت و ژ ئەردۆگا رە گۆت بەرێز سەرۆکێ کۆمارێ.
نامەیا دەمیرتاش ئیرۆ ب پەیاما کو دەولەت باخچەلی ژ بۆی وی شاندیە، ھاتییە قەبوولکرن.
ئەڤ تێ چ واتەیێ؟ رێ ژ بۆ بەردانا دەمیرتاش ژ گرتیگەھێ د مەھێن پێش دە ھاتیە ڤەکرن.
