د چارچۆڤەیا “پرۆسەسا نوو یا ئاشتیێ” دە، شاندەکا دەم پارتیێ لگەل سەرۆکێ گشتی یێ مەھەپێ دەولەت باخچەلی جڤیا. پشتی جڤینێ، پەروین بولدان راگھاند، وان جارەکا دن نێرینێن باخچەلی یێن ئەرێنی دەربارێ پرۆسەسێ دە بھیستنە و تەکەزی ل سەر پێویستیا دیالۆگ و ھەلوەستەکا ھەڤبەش کر.
شاندا دەم پارتیێ کو ژ ئەندامێن شاندا ئیمرالیێ پەروین بولدان، میتحەد سانجار و فایق ئۆزگور ئەرۆل پێک دھات، ئیرۆ 16ێ تیرمەھێ ل ناڤەندا گشتی یا مەھەپێ لگەل سەرۆکێ گشتی یێ پارتیا تەڤگەرا نەتەوەپەرەست (مەھەپێ) دەولەت باخچەلی جڤیا.
پشتی ھەڤدیتنێ، پەروین بوولدان د داخویانیەکێ دە ناڤەرۆکا جڤینێ و گاڤێن پێشەرۆژێ ئەشکەرە کر و گۆت: “مە جارەکا دن نێرینێن ئەرێنی یێن برێز باخچەلی دەربارێ پرۆسەسێ دە بھیستن. ئەم دێ لگەل ئالیێن ئۆپۆزیسیۆنێ و پێکھاتەیێن تفاقا جومھور جڤین و ھەڤدیتنێن خوە یێن دەربارێ پرۆسەسێ دە بەردەوام بکن. ب تایبەتی د قۆناغا ئاڤاکرنا کۆمیسیۆنێ دە، پێویستیا مە ب ھەڤدو ھەیە. “
ھەروھا گۆت: “پێویستیا مە ب دیالۆگێ ھەیە. پێویستیا مە ب ھەلوەستەکا ھەڤبەش ھەیە. ئەم دێ د ھەر قۆناغەکێ دە سەرۆکێن گشتی یێن پارتیێن سیاسی ئاگاھدار بکن. ژ بۆ کو ئەڤ قۆناغە ڤەگوھەرە قۆناغا ئاشتیێ، چ ژ دەستێ مە وەرە ئەمێ بکن.”
ئەڤ ھەڤدیتن د دەمەکێ دە تێ کو پشتی کۆمەکا پەکەکێ چەکێن خوە دانی، ل ئەنقەرەیێ گاڤێن گرینگێن د چارچۆڤەیا “پرۆسەسا نوویا ئاشتیێ” دە تێن ئاڤێتن. شاندا دەم پارتیێ ئیرۆ ب ئاوایەکی جودا لگەل سەرۆکێ گشتی یێ مەھەپێ دەولەت باخچەلی، وەزیرێ دادێ یێ ترکیەیێ یلماز توونچ و سەرۆکێ گشتی یێ پارتیا گەلەجەکێ ئەحمەد داوودئۆغلوو جڤیان، دا کو پشتگریێ ژ بۆ پرۆسەسێ بەرفرەھ بکن.
