وێنەکرنا شكه‌ستنێ وه‌ك سەرکەفتنەکا دیرۆکی
د تیرمەها سالا 2025 دە، عەڤدللا ئۆجالان ب ڤیدەئۆیەکێ کو د بن چاڤدێرییا میتێ دە هاتبوو تۆمارکرن پەیامەک وەشاند. دەما گەلێ کورد ل ڤیدیۆیێ نێری مەندەهۆش مان. سەدەما سەرەکەیا مەندەهۆشییا گەلێ کورد ژ بەر ڤێ یەکێ بوو کە ئۆجالان تەکەزی ل سەر ئاخافتنا خوە یا د 27ی سباتێ دە کر و گۆت، بلا پەکەکە خوە هلوەشینە و دەست ژ چەکان بەردە و دەست ب ستراتەژییا جڤاکا دەمۆکراتیک بکە.
دەما مرۆڤ ل داخویانیا ئۆجالان دنێرە، خویا دبە کو دورووتیەکە هزری و سیاسی یا مەترسیدار تێ دە هەیە، لۆما پێویستە مرۆڤ ب هویری ڤێ داخویانیا ئۆجالان لێکۆلین بکە.
هەر ژ دامەزراندنا پەکەکێ د سالا 1978 دە هەیا سالا 1999، تەڤ داخویانیێن ڤێ پارتیێ و شیرۆڤەیێن ئۆجالان بۆ پرسا کوردی د بن تێگەها رادیکال یا مارکسی-لینینی و د بن رۆناهییا هزرا هیگل دە بوونە. هەر تم دهات گۆتن هەیا کو کورد چەک هلنەگرن و شەر نەکن نکارن سەربخوە ببن و ببن دەولەتەکە سەربخوە، ژ بەر کو ئازدی بێی چەک ب تو ئاوا نایێ ب دەست خستن.
لێ بەلێ، گوهەرینەکە مەزن د ستراتەژییا ئۆجالان دە چێبوو، ب تایبەتی پشتی سالا 1999 دەما ڤەدگەرە ترکیەیێ، ئەڤ گوهەرینا فکری یا ئۆجالان د بن باندۆرا تێگەهێ فەلسەفی یێ موورای بۆکچین پەیدا بوو ب تایبەت د وارێ سۆشیالیستا ژینگەهی و رێڤەبرییا خوەسەری.
تێ زانین کو تێگەها سۆشیالیستا ژینگەهی یا پڕە ژ تاوانبارکرنا دەولەتێن نەتەوەیی، مینا:
دەولەتێن نەتەوی سەدەمێن دروستبوونا توندوتیژیێنە.
چەک هلگرتن دبە سەرداچوون.
جڤاکێن ناڤخوەیی جێگرێن دیرۆکی یێن دەولەتێ نە.
ئەڤ گوهەرینا هزری ل جەم ئۆجالان زێدەتر نێزیکی کۆدەتایەکە هزرییە ژ پێشکەتنەکە فەلسەفی.
چما ئەز دبێژن کۆدەتایەکە هزرییە؟
ژ بەر کو ئەڤ گوهەرین نە د کەش و هەوایەک ئازاد و ئارام دە چێبوویە، بەلکو د زیندانێ دە پەیدا بوویە و ئۆجالان نەچار بوویە بەر ب ڤی ئاراستە ڤە بچە، دبە کو ئەڤ هزرەکە سیاسی یا دەولەتا ترک بە کو ل سەر ئۆجالان هاتبە سەپاندن، ل ڤڕ پرسەکە ئایدۆلۆژیک پەیدا دبە، ئەو پرس ژی ئەڤە:
گەلۆ تێگهشتنا هزری یا رەها ل جەم کەسەکی کو ژ ئالیێ هزری و فیزیکی ڤە د ناڤا زیندانێ دە هاتبە زنجیرکرن پەیدا دبە؟ بلا عاقلمەندێن د ناڤا پەکەکێ و مللەتێ کورد دە بەرسڤا ڤێ پرسێ بدن.
د پەیاما ئۆجالان دە چ داخوزەکە لێبۆرینێ د دەربارا ڤێ گوهەرینا ستراتەژیک یا کوژەک تونەیە، وی وسا ئەڤ شاشتی بەرچاڤ کرییە کو ئەرکەکە دیرۆکی بوو ل سەر ملێن وی و نابە نیقاش ل سەر ڤێ یەکێ وەرە کرن، هەر وەها خوە وەکە پێغەمبەرەکی کو ژ ئاسیمان هاتیە خوار وێنە دکە ژ بۆی شەرعییەت دان ب ڤێ قۆناغێ.
ڤێ پەیاما ئۆجالان بیرا من ل گۆتنەکە میشێل فۆکۆ یا دەربارێ دەستهلاتا ب رێیا وێنێ گۆتارێ نە ل سەر راستییا گۆتارێ ئانی، واتە راستی نە گرینگە بەلکو رەوانبێژی و دیزاین و جوانکرنا گۆتارێ گرینگە.
داخویانییا ئۆجالان زێدەتر جیبجیکرنا نەرینا فیلسۆفێ جیهانی بۆل ریکۆردە کو تێ دە دیار دکە “وێنەکرنا شکەستنێ وەکە پەیاما رزگاربوونێ” یە، مینا ئاهەنگا ڤێ داوییێ یا ئیرانێ کو تێ دە دیار کربوو ئەو ل هەمەبەر ئیسرائیلێ سەرکەتن.
وێنەکرنا شکەستنێ وەک پەیاما رزگاربوونێ وسا دهێت پێناسەکرن کو شکەستن وەکە سەرکەتنەکە دیرۆکی وەرە بەرچاڤکرن. ئەڤ تێگەهە پڕ مەترسیدارە دەما هزر ببە ئاموورێ بەهانە ئینانا ژ بۆی شکەستنێ نەک ئامووری بەرچاڤکرنا راستیێ.
ددەما ئۆجالان دەست ژ ئارمانجا دەولەتا کوردی بەرددە و پرۆژەیەکی یۆتۆبیایی دەولەمەند دکە، ئەڤ دبە مەزنترین خیانەت ل دیرۆکا پەکەکێ و خوینا هزارەها جانگۆرییان، و کەدا سەدان هەزار گەریلایێن ڤێ پارتیێ.
پرۆژەیا یۆتۆبیایا ئۆجالان نە موومکینە وەرە جیبجیکرن، ئەڤ پرۆژە مینا پرۆژەیا کۆمارا ئەفلاتۆنی یە، ئەڤ نە پرۆژەیەک سیاسیە کو د شیان دە بە وەرە جیبجیکرن و نابە رێنیشاندەرا گوهەرینا دەستوورا ترکیەیێ و نابە ئاموورەک یاسایی کو کورد بکاربن ب ڤێ یەکەکێ بەرەڤانیێ ل خوە بکن، ئەڤ ب تەنێ دبە داخویانیەکە ئەڤینداری یا بەستراک کو هەبوونا وێ ل سەر دنێ تونەیە و نابە، ئانکو وەکە خەونا حووشترانە د دۆرهێلا پڕی ئاستەنگ یا رۆژهلاتا ناڤین دە.
گەلۆ د ڤی پرۆژەیی دە وێ چارەنڤیسا خەباتکارێن ب دەهان سالان خەبات ژ بۆی دۆزا کوردی کری چ بە؟؟
