پشتی کو کۆما یەکەما پارتیا کارکەرێن کوردستانێ (پەکەکێ) چەکێن خوە دانین، ئەندامەکا کۆمیتەیا ناڤەندی یا پەکەکێ راگھاند، ئەو جارەکا دن مەراسیمێن چەکدانینێ لدار ناخن. ل گۆری داخویانیێ، کۆما کو چەک دانیە، خوە ژ بۆ “بەشداریا سیاسی یا دەمۆکراتیک” ئامادە دکە و پەکەکە ئێدی دێ تێکۆشینا خوە ب رێیێن سیاسی بەردەوام بکە.
گوھەرتنا ستراتەژیێ: ژ چەکان بەر ب سیاسەتێ ڤە
ئەنداما کۆمیتەیا ناڤەندی یا پەکەکێ ھێلین ئومید راگھاند: “کۆما ئاشتی و جڤاکا دەمۆکراتیک، کو چەکێن خوە شەوتاندن، نھا خوە ژ بۆ بەشداریا سیاسی یا دەمۆکراتیک ئامادە دکە.” ھەروھا گۆت: “پەیاما کو پێویست بوو، د مەراسیمێ دە ھاتە دایین. ئەم جارەکا دن مەراسیمێن چەکدانینێ لدار ناخن.”
ھێلین ئومید ل سەر ڤەگەرا ئەندامێن پەکەکێ بۆ ترکیەیێ ژی ئاخڤی و گۆت، “ئەگەر گوھەرتنێن دەستووری بێن کرن، چما ئەندامێن پەکەکێ ڤەنەگەرن ترکیەیێ؟ ئەم تێکۆشینا خوە دگوھەرینن و دکن تێکۆشینا سیاسی.”
داخواز و مەرجێن پەکەکێ
ھێلین ئومید رەخنە ل حکوومەتێ گرت و دیار کر کو “حکوومەت ب ئاوایەکی ھێدی پێنگاڤان ژ بۆ پێڤاژۆیێ دهاڤێژە.” تەکەز کر ژی، دڤێت پارلامەنتۆ پێنگاڤێن کو تێن ئاڤێتن ب یاسایان مسۆگەر بکە و گۆت، “پێویستە ئەڤ پرۆسە ب یاسایێ وەرە گارانتیکرن، ژ بەر کو ئەگەر پرسگرێک دەرکەڤن، دبە کو دژبەریا پێڤاژۆیێ بهێت کرن.”
ل سەر رۆلا کۆمیسیۆنێ ژی ئەنداما کۆمیتەیا ناڤەندی یا پەکەکێ گۆت: “دامەزراندنا کۆمیسیۆنەکا پارلەمانی دێ رۆلەکا گرینگ د دەرباسکرنا ئاستەنگیان دە بلیزە. دڤێت کۆمیسیۆن بکاربە پرۆژەیاسایان ژ بۆ ئازادی و دەمۆکراسیێ ئامادە بکە. بێیی ڤان، پێنگاڤێن مە بێواتە دمینن.”
ھێلین ئومید ھەروھا بەحسا رەوشا رێبەرێ پەکەکێ عەبدوللاھ ئۆجالان کر و گۆت: “د دەستپێکێ دە سۆز ھاتبوو دایین کو مافێ ھێڤیێ یێ ئازادبوونێ بدن ئۆجالان، لێ ھەتا نھا د رەوشا وی دە چ گوھەرتن چێنەبوویە.”
ئەڤ داخویانی د دەمەکێ دە تێ کو تێ چاڤەرێکرن د رۆژێن پێش دە کۆمیسیۆنەکا پارلەمانی بهێت دامەزراندن، دا کو زەمینەیا یاسایی ژ بۆ پرۆسەیا چەکدانینا پەکەکێ ئامادە بکە.
رۆژا 11ێ تیرمەھا 2025ێ کۆمەکا ژ 30 ئەندامێن پەکەکێ، د مەراسیمەکێ دە ل شکەفتا جاسەنەیێ یا ل ناڤچەیا سوورداشا پارێزگەھا سلێمانیێ، چەکێن خوە شەوتاندبوون.
