رێخستنا په‌كه‌كێ چەک و هنده‌ك شکەفتێن خوە یێن ل هەرێما بەهدینانێ د ناڤا سنۆرێ هەرێما کوردستانێ دا رادەستی ئارتێشا ترک کرینە. ل گۆری ئاگاهیێن مه، په‌كه‌كه ل دەڤەرێن سنۆری، ب تایبەتی ل مەتینایێ، چه‌ندین تونێل و چەکان رادەستی ئارتێشا ترک دکەت.
د 11ێ تیرمەهێ دا، 30 چەکدارێن په‌كه‌كێ چەکێن خوە ل بەر چاڤێن مەدیایێ ل شکەفتا جاسەنە یا نێزیکی سلێمانیێ شەوتاندبوون. نها، تێ راگهاندن کو په‌كه‌كێ چەکێن خوە ل دەڤەرێن کو ژێ را دبێژن «هەرێما پاراستنا مەدیایێ» رادەستی ئارتێشا ترک کرینە و ئەڤ رادەستکرن ب دزی تێ کرن.
ژ سباتێ ڤە پەڤچوونێن د ناڤبەرا هێزێن په‌كه‌كێ و هێزێن چەکدارێن ترک دا بەر ب راوەستییانێ ڤە دچن. هەر چەنده جارنان ل دەڤەرێن ب هەڤ ڤە گرێدایی یێن ئامێدیێ و زاپێ هن پەڤچوون رووبده‌ن ژی، لێ ب گشتی پەڤچوون سەکنینە. ژ داویا خزیرانێ و دەستپێکا تیرمەهێ ڤە، راپۆرت دەرکەتنە هۆلێ کو په‌كه‌كێ هنده‌ك تونێل و چەکێن تێدا، ب تایبەتی ل هەرێما بەرواری بالا یا نێزیکی سنۆری، کو گەریلا تێدا نینن، رادەستی ئارتێشا ترک کرینە.
د هەڤدیتنا 30ێ گولانێ دا ئەڤ بریاره هات دایین
تێ راگهاندن کو عه‌بدوللا ئۆجالان، د هەڤدیتنا 30ێ گولانێ دا ل گه‌ل شاندێ دەولەتا ترک و شاندێ پارتیا دەمێ یا ئیمرالیێ، بریار دایە کو هن چەک و سەنگەر رادەستی ئارتێشا ترک بهێن كرن.
د تەڤاهیا پێڤاژۆیا کو ژ هێلا سێگۆشەیا «باخچەلی-ئەردۆگان-ئۆجالان» ڤە هاتیە دەستپێکرن دا، د چاپەمەنیێ دا هەیا نها 7 جڤینێن د ناڤبەرا پارتیا دەم و شاندەیا ئیمرالیێ دا هاتن راگهاندن. لێبەلێ، گەلەک هەڤدیتنێن دن ژی هەبوون کو ژ چاپەمەنیێ را نەهاتنە راگهاندن. یەک ژ ڤان هەڤدیتنێن ڤەشارتی، هەڤدیتنا 30ێ گولانێ بوو کو تێدا شاندەیەک ژ دەولەتا ترک ژی بەشدار بوو. مەراسیما بێچەککرنا په‌كه‌كێ یا 11ێ تیرمەهێ د هەڤدیتنا 30ێ گولانێ دا بریار ل سىر هاته دان. هەروه‌ها، بریار هاته دان ل هەرێمێن کو پەڤچوونێن د ناڤبەرا هێزێن چەکدارێن ترکیێ و هێزێن گەریلا دا قەومینە، پەیمانەکا ڤه‌شارتی بهێته چێکرن.
هەتا نها، شاندێ ئیمرالیێ یێ دەمێ 7 جاران سەردانا ئیمرالیێ کریە. لێبەلێ، هن هەڤدیتن ژی هەنە کو ژ رایا گشتی را نەهاتنە راگهاندن. یەک ژ ڤان هەڤدیتنا یا 30ێ گولانێ یە. د ڤێ جڤینێ دا، ل سەر گەلەک مژاران، ب تایبەتی چالاکیا شەوتاندنا چەکان یا په‌كه‌كێ، لهەڤکرنەک هەڤبەش هات بدەستخستن.
د هەڤدیتنا 30ێ گولانێ دا، ئۆجالان نەرازیبوون نیشان دا و گۆت: «گەر ئەو چەکێن خوە ل بەر چاپەمەنیێ رادەست بکن، نە باشە. دبە کو ئەو ل دژی مە وەرن بکار ئانین وەکە کو ئەو تەسلیم بوونە دێ وەرە فامکرن». لێبەلێ، پێشنیارا شەوتاندنا چەکان ژ هێلا رایەدارێن دەولەتا ترکیێ ڤە هات پێشکێش کرن. نوونەرێ دەولەتێ گۆت: «بلا ئەو چەکێن خوە ل بەر چاڤێن چاپەمەنیێ بشەوتینن، دا کو رایا گشتی دلنییا ببە. پیشتی هنگێ ئەمێ پێڤاژۆیێ ب چێکرنا د ناڤ خوە دە ب بێدەنگی بدۆمینن».
هەروه‌ها د هەڤدیتنێ دا ل سەر تشتێن کو دکارن وەرن کرن کو پێشی ل پەڤچوونێ ل دەڤەرێن کو هێزێن په‌كه‌كێ و دەولەتا ترکیێ نێزیکن، هات نیقاش کرن و لهەڤکرنەک هەڤبەش هات پەسەندکرن. رایەدارێن دەولەتا ترک گۆتن: «گەریلا و لەشکەرێن ترکێن ل هەرێمان دکارن ب فەرماندارێن خوە رە هەڤدیتنێ بکن و د ناڤبەرا خوە دا چارەسەرییان ببینن. دکارە دەستوور بێ دایین کو ئەو ژ تونێلان دەرکەڤن و جهێ خوە ڤەگوهێزن».
رادەستکرنا چەکان ب ڤەشارتی !
پشتی ڤێ هەڤدیتنێ، پەڤچوونێن د ناڤبەرا گەریلایێن په‌كه‌كێ و هێزێن دەولەتا ترک دا د مەها خزیرانێ و تیرمەهێ دا کێم بوون.
بەرێ هنگێ، هن کۆمێن گەریلا ل هن تونێلێن په‌كه‌كێ-هه‌په‌گێ دا هاتبوون دۆرپێچکرن. تێ پێشبینیکرن کو ئەڤ هێز، ژ بەر کو دەمەک درێژ دەستوور هاتبوو دان کو دەرکەڤن، چوونە بارەگەها هه‌په‌گێ. د بەردێلا ڤێ دا ژی، تێ راگهاندن کو په‌كه‌كێ پلانێن تونێلان و جهێن دەپۆیێن چەکان ل هن دەڤەران رادەستی دەولەتا ترک کرینە.
نها، گەریلایێن په‌كه‌كێ تەنێ د تونێلێن ل ژۆر گوندێ گوهەرزێ یێ ل سەر خەتا ئامەدیێ-دێره‌لۆکێ دا مانە. گەریلایێن د تونێلێن دن دا مایی ب دەستوورا دەولەتا ترک بنگەهێن خوە رادەستکرن.
چەکێن ل مەتینا هاتنە دەستەسەرکرن
ل گۆری چاڤکانیێن نێزیکی په‌كه‌كێ، پرانیا چەکێن کو هاتنە رادەستکرن یێن ل هەرێما مەتینا-زاپێ نە. وەزارەتا پاراستنا مللی یا ترکیێ جارنان چەکێن کو هاتینه رادەستکرن وەکە کو وان دەستەسەرکرنە رادگهینە.
هەری داوی، د 7ێ تیرمەهێ دا، وەزارەتا پاراستنا مللی یا ترکیێ وورده‌كاریێن قه‌باره‌یه‌كێ مەزنێ جەبلخانەیێ کو وەرگرتیە پارڤە کر. د ناڤ چەکێن کو هاتنە پارڤەکرن دا 5 مووشەکێن دژی-تانک، 6 مووشەکێن پاراستنا هەوایی یێن SA-7، 2 تلسکۆپ، چەکێن کاتیۆشا، کامیرێن گه‌رمایێ و چەکێن نیشانه‌شكێن، د ناڤ دا چەکێن وه‌ها گرنگ ژی هەبوون.
زمانێ کو د داخویانیا وەزارەتا پاراستنا مللی دا هاتیە بکار ئانین ژی پر سەرنجراکێش بوو. وەزارەتا پاراستنا مللی دیار نەکر کو کێ چەک ژ کێ وەرگرتنە، و پەیڤا “تەرۆریست” نەهاتیە بکار ئانین.
هەڤدیتنێن ڤەشارتی بەردەوام دکن
ژ بلی هەڤدیتنێ کو ژ رایا گشتی رە هاتنە راگهاندن، گەلەک هەڤدیتنێن دن د ناڤبەرا شاندەیا پارتیا دەم- ئیمرالیێ و دەولەتا ترکیەیێ دا پێک تێن. لێبەلێ تەنێ هن ژ ڤان بۆ رایا گشتی تێ ئاشکەرە کرن. هەم دەولەتا ترک و هەم ژی په‌كه‌كێ، ژ بۆ کو گرسەیا خوە ئامادە بکن و نه‌رازیبوونان نه‌كێشن سەر خوە، پەیمانێن د ناڤبەرا خوە دە ل گۆری راستییا جڤاکێ ژ رایا گشتی رە پێشکێش دکن.
