دەمیرتاش: ئەزێ تێکۆشینا خوە یا ژ بۆ عەدالەت، وەکھەڤی و دەمۆکراسیێ بدۆمینم
ھەڤسەرۆکێ بەرێ یێ ھەدەپێ سەلاحەدین دەمیرتاش، ئەڤە نێزکی 9 سالانە ل گرتیگەھا ئەدرنەیێ گرتییە پارلەمەنتەرێ دەمێ یێ باژارێ کۆجاعەلیێ عۆمەر فاروق گەرگەرلیۆغلو سەردانا دەمیرتاش کر. دەمیرتاش ب روویا گەرگەرلیۆغلو پەیامەک راگھاند. دەمیرتاش گۆت کو ئەو دێ تێکۆشینا خوە یا ژ بۆ عەدالەت، وەکھەڤی و دەمۆکراسیێ بدۆمینە.
فاروق گەرگەرلیۆغلو پەیاما دەمیرتاش ل سەر ئەکوانتێ خوە یێ مەدیا جڤاکی وەشاند.
پەیاما دەمیرتاش یا کو ب زمانێ ترکی و دەستنڤاسی وی ھاتیە وەشاندن وەھایە:
“ئەم سلاڤ و حەزکرنێن ژ دل ژ بۆ ھەموو ھەڤالێن خوە یێن کو سلاڤ و پشگریا خوە ب رێیا پارلەمەنتەرێ (نوونەرێ) مە یێ رێزدار، برێز گەرگەرلیۆغلو، گھاندنە من، پێشکێش دکم. دەما کو ئەم بێ وەستان تێکۆشینا خوە یا ژ بۆ عەدالەت، وەکھەڤی و دەمۆکراسیا راستین ژ بۆ ھەر کەسی ددۆمینین، ئەم دێ ئیسرارا خوە یا ل سەر ئاشتیێ بدۆمینن. ئەم ھێڤی دکن کو لگەل ئاشتیێ، ل ترکیەیێ سەردەمەک نوو ڤەبە و بنگەھەک پر خورتتر ژ بۆ ئاڤاکرنا پێشەرۆژەک گەش لگەل ھەڤ دەرکەڤە ھۆلێ. ب ھێڤیا تەژی ئازادی …”
رۆژا کو، پارلەمەنتەرێ دەمێ عۆمەر فاروق گەرگەرلیۆغلو سەردانا دەمیرتاش کری، د ھەمان رۆژێ دە د گرتیگەھێ دە ل گەل رۆژنەمەڤانێ گرتی فاتح ئالتایل ژی ھەڤدیتنەکی دکە. دوھ ئالتایلی ھوورگلیا ھەڤدیتنا خوە و عۆمەر فاروق گەرگەرلیۆغلو د مەدیا جڤاکی دە راگھاندبوو. د وێ پەیامێ دە ھەلوەستا ئۆجالان و پارتیا دەمێ ل دژی دەمیرتاش دابوو خویاکرن و گۆتنێن توند یێن ئۆجالان د دەربارێ دەمیرتاش دە گۆتین، گەرگەرلیۆغلو دبێژیتە فاتح ئالتایل و ئەو ژی ژ بۆ رایا گشتی ئەشکەرە دکە.
رۆژا پشتی پەیاما ئالتایل، گەرگەرلیۆغلو ڤێ جارێ، پەیاما دەمیرتاش د مەدیا جڤاکی دە پارڤە دکە. ئەڤ یەک بڤێت نەڤێت ل جەم مرۆڤی ھنەک فکارا پەیدا دکە. ھەر چقاس مرۆڤ راستییا د ناڤا پەکەکێ دە دزانە ژی ئەڤ جورەیێن نووچەیان پتر رەوشا پەکەکێ د ناڤا خەلکێ دە ددە خویاکرن.
