عەڤدللا ئۆجالان، رێبەرێ پەکەکێ کو نھا رێخستنا خوە هلوەشاندیە 47 سالان سەرۆکاتیا وێ کر. و د وان 47 سالان دە، وی دو جاران لێبۆرین خواست. پشتی شەرەکی 47 سالان کو وێرانیەکا مەزن ب سەر کوردستانێ دە ئانی. گەلۆ عەڤدللا ئۆجالان ژ کێ لێبۆرین خواست؟
لێبۆرین خواستنا یەکەم
یەکەم لێبۆرین خواستنا تۆمارکری یا عەڤدللا ئۆجالان د 1ێ خزیرانا 1999 دە ل دادگەھا وی یا ل ئیمرالیێ بوو.
ل وێ دادگەھێ، عەڤدللا ئۆجالان ژ بۆ مالباتێن لەشکەرێن ترکێن کو د شەری دە ھاتبوون کوشتن ئاخڤی گۆت:
“ئەز دخوازم داخویانیەکا کورت ژ بۆ ھەمی مالباتێن رێزدار یێن شەھیدان (یێن ترک) بکم. ئەز ب دل و جان خەمگینی و ئێشا وان پارڤە دکم. دیسا، ئەز ژ وان لێبۆرینێ دخوازم ژ بەر پارا خوەیا بەرپرسیاریێ ل ڤر.
لێبۆرین خواستنا دویەمین
عەڤدللا ئۆجالان لێبۆرین خواستنا خوە یا دویەمین د داویا پرتووکا خوە یا ب ناڤێ “پاراستنا گەلەکی” دە، کو د سالا 2004 دە ھاتیە وەشاندن، دا کر. ئۆجالان وھا گۆت:
ژ بەر چاندا نێچیرڤانییێ یا کو د زارۆکاتییا من دە د DNA من دە ھەبوو دھێلا کو ئەز بێ ترس نێچیرا چووچکا بکم، سەرێ وان ژێکم؛ و ژ حەیوانێن کو من ب ژیری نێچیر کرنە و کوشتنە… دخوازم لێبۆرین خواستنا خوە ژ وان بکم. ب ڤی ئاوایی دەست ب ژییانەکا نوو بکم.
ژ بەر ڤێ یەکێ، ئۆجالان جارەکێ ژ مالباتێن لەشکەرێن ترک یێن کو مرنە و جارەکێ ژی ژ ئاژەلێن کو نێچیر کرینە لێبۆرین خواست. لێ گەلۆ وی لێبۆرین ژ کوردان خواست، کو د ڤی شەرێ 47 سالان دە ونداھیێن گران دان و ئێشێن مەزن کشاندن؟ نا…
د نامەیەکێ دە کو د 27ێ شوباتا 2025ێ دە ھاتیە وەشاندن، و ھلوەشاندنا پەکەکێ راگھاندی، عەڤدللا ئۆجالان دیار کر کو “پشتی سالێن 1990، پەکەکە بوو سەدەما بێواتەییێ و شەرێ خوە دوبارە کر.” ئانگۆ، شەر پشتی سالا 1990ێ نەحەوجە بوو. لێ دیسا ژی، د تەڤاھیا دیرۆکا پەکەکێ دە، 50.000 ئەندامێن پەکەکێ ژیانا خوە ژ دەست دانە. و ھەما بێژە ھەموو ژ وان پشتی سالا 1990ێ جانێ خوە ژدەست دا. ژ بەر ڤێ یەکێ، نە حەوجە بوو کو 30.000 ئەندامێن پەکەکێ یێن کو د ناڤبەرا سالێن 1990 و 1999ێ دە ژیانا خوە ژ دەست بدن. ئۆجالان د 1ی خزیرانا 2004ێ دە شەرەکی دن دا دەستپێکرن. و ژ وێ دەمێ ڤە، 20.000 گەریلایێن پەکەکێ ژیانا خوە ژ دەست دانە. ئەڤ 50.000٠ کەس بێسەبەب مرن. گەلۆ عەڤدللا ئۆجالان ژ بۆ کەسایەتییا شەخسێ خوە و خەیالێن خوەیێن تاری ئەڤ قاس کەچ و کورێن کوردان دان کوشتن ما لێبۆرین ژ کەسووکارێن شەھیدێن کوردان خوەست؟ نا…
گەلۆ ئۆجالان لێبۆرین ژ گوند و خەلکێ کو پشتی شەرێ 1990 وێران و پەنابەر بوویی، خوەست؟ نا.
نێزیکی 2.000 ئەندامێن پەکەکێ د ناڤ پەکەکێ دە ب فەرمانا ئۆجالان ھاتن کوشتن. ب دەھان ئەندامێن پایەبلند، د ناڤ دە چەتن گۆنگۆر، ئەنوەر ئاتا، ئەمروللاھ کومرال، محەمەد شەنەر، فاروق بۆزکورت، بارزان دووڕە، کانی یلماز، و شاپور بۆدیشاڤا و ب ھەزارێن دن ژ بەر رەخنەیێن خوە یێن سیاسی یێن ل سەر ئۆجالان ھاتن کوشتن. بەلێ، ئۆجالان ژ چووچکێن کو د زارۆکاتیا خوە دە کوشتبوون لێبۆرین خواست، لێ مخابن ژ ھەڤرێیێن خوە یێن کو وی دانە کوشتن لێبۆرین نەخواست.
ب فەرمانا ئۆجالان، کوردێن ژ تەڤگەرێن سیاسی یێن دنژی تەنێ ژ بەر کو ئەو نە ئەندامێن پەکەکێ بوون، ھاتن قەتلکرن. ب دەھان کەسایەتێن رێبەر، د ناڤ دە فەرید ئوزون، حکمەت فیدان، مستەفا چاملیبەل، و مستەفا تانگوونەر، ژ ئالیێ پەکەکێ ڤە ھاتن کوشتن. گەلۆ ئۆجالان ژ وان لێبۆرین خواست؟ ناا.
ب فەرمانا عەڤدللا ئۆجالان، پەکەکێ د سالا 1992ێ دە ل دژی باشوورێ کوردستانێ شەر دا دەستپێکرن. د ڤی شەری دە، گوندێن باشوورێ کوردستانێ ھاتن شەوتاندن و دەستەسەرکرن، و خەلکێ ھەرێمێ بوون قوربانی. د ڤی شەری دە زێدەتری ھەزار پێشمەرگە شەھید بوون. گەلۆ ئۆجالان ژ گەلێ باشوورێ کوردستانێ و ھێزێن پێشمەرگە لێبۆرین خوەست؟ نا.
عەڤدللا ئۆجالان ژ لەشکەرێن ترک و چووچکا لێبۆرین خوەست، لێ پشتی شەرێ 47 سالان یێ وێرانکار، ئۆجالان قەت ژ کوردان لێبۆرین نەخواست. بەرەڤاژی ڤێ، د نامەیێن خوە دە پشتی ھلوەشاندنا پەکەکێ، وی کەسایەتیێن مینا شێخ سەعید و سەیید رزا ب خایینتیێ تاوانبار کرن. ئۆجالان چاند و زمانێ کوردی وەکی گلێش-زبل پێناسەکر.
دڤێت دەستپێکێ عەڤدللا ئۆجالان بێی هێڤە وێڤە دەرکەڤە و ژ کوردان لێبۆرینێ بخوازە.
