سه‌رهاتییا پێشمه‌رگه‌یێن گه‌ریلا ژ مرنێ رزگاركرین و ب ده‌ستێن په‌كه‌كێ ب خوه هاتنه شه‌هید كرن
«سال 2000ێ یه، ل ده‌ڤه‌را حه‌فته‌نینێ ژ بیرهاتنێن گەریلایەکێ وی دەمی»
هێژان ساله‌ك ل سه‌ر پاشڤه‌كێشانا گه‌ریلایان ژ باكور به‌ر ب كامپێن باشوورێ كوردستانێ ڤه ده‌رباس نه‌ببوو، ده‌وله‌تا ترك ئۆپه‌راسیۆنه‌كه به‌رفه‌رهـ ل دژی گه‌ریلایێن په‌كه‌كێ ل دۆلا پساخا و چیایێ خانتوورێ ئه‌نجام دا.
به‌ری كو ئه‌م به‌حسا ئۆپه‌راسیۆنێ بكن و وێ ئالیكارییا كو پێشمه‌رگه‌هان پێشكێشی گه‌ریلایان كری، دێ به‌حسا كامپێن ل باشوور بكن یێن كو گه‌ریلا لێ بجهـ بوون. ئەڤ کامپ د ناڤ وان گوندان ده بوون یێن کو د دەما شەرێ سه‌ددام دا هاتبوونه ڤالا کرن، په‌كه‌كه ل وان گوندان مان .
د سالا 1983ێ دا و ل گۆری رێككه‌فتنه‌كا د ناڤبەرا په‌ده‌كێ و په‌كه‌كێ دا، په‌كه‌كه ل وان ده‌ڤه‌ران ب جهـ بوون و هێدی په‌كه‌كێ ئەو دەڤەر یێن کو ب ده‌ستوورا په‌ده‌كێ كه‌تیه تێدا نه‌هشت نه پێشمەرگە و نەژی خەلکێ وان گوندان بچنە سەر ئەرد و زەڤی و خانیێن خوە، په‌كه‌كێ خەلک دگرتن، جزا دکرن، نە دهشتن خەلکێ فەقیرێ خوەدانێن ڤان گوندان بۆ خوە کار و خەباتەکێ بکه‌ن.
ئۆپه‌راسیۆنا تركان ل گه‌لیێ پساخا
بهارا سالا 2000ێ بوو، ترکان ئۆپەراسیۆنەک ل سەر دەڤەرا حه‌فته‌نینێ و ب تایبەتی ل گەلیێ پساخا و چیایێ خانتوورێ ئەنجام دا، سنۆرێ د ناڤبەرا لەشکەرێ ترکان و پێشمەرگەی دا رووبارێ گەلیێ پساخا بوو، پێشمه‌رگه ل وێرێ بجهـ بوو داكو له‌شكه‌رێ ترك پێشڤه نه‌هێت، تركان پلان كربوو لەشکەرێ وان و جاش ژ ئاڤا گەلیێ پساخا دەربازی ئالیێ چیایێ خانتووری نەبە، 2 رۆژان ئۆپەراسیۆن ب هەمئاهەنگیا بالافرێن کۆبرا دەست پێ کر.
د رۆژا دوویەمن دا ئۆپەراسیۆن گران بوو و گه‌ریلا ژ ئالیێ گرێن «سیسەر، ئەلانش، پارتیزان» پاشڤه‌كێشان بۆ ئالیێ خانتووری کرن، لەشکەر و جاش هەتا رووباری ل په‌ی گه‌ریلایان هاتن، لێ دەرباس نەبوون، گه‌ریلا ژ دۆلێن «مارسس شه‌شدار» بەر ب خانتووری کو سەرانسەری خانتووری پێشمەرگه‌هان گرت بوو و رێنه‌دان کو لەشکەرێ ترک دەرباز ئالیێ وان ببیت، گه‌ریلایان خوە گه‌هاندنە نێزیكی پێشمەرگه‌ی، ده‌مێ پێشمەرگه‌ی دیتی کو گه‌ریلا د ته‌نگاڤیێ دا نە و هەلیکۆپتەرێن جەنگی ژی ده‌رفه‌تا شەركرنێ ژ وان ستاندیە، ب جیهازێ ل گه‌ل فەرماندارێن خوە ئاخفتن و گۆتنێ: «گەریلایێن په‌كه‌كێ نێزی مەنە ئەم چ بکه‌ین»؟.
بەرپسیارێ پێشمەرگەی فه‌رمان دا و گۆت: «هەکە ئەو شەرێ وه نه‌كه‌ن و ته‌قێ ل وه نه‌كه‌ن، واته وێ د تانگاسیێ دانە، نابیت ب دەستێ مە بهێنه کوشتن».
ل وی دەمی «عادلێ بلکی» ب جیهازێ ل گەل فه‌رماندارێ پێشمەرگه‌ی ئاخڤی و گۆتێ: «ئەم برانە، نابە هوون مە بێخن ته‌نگاڤیێ دا».
ئه‌و بوو، یه‌ك پێشمەرگە ژی تەقە نەکر، ئەگەر وان ڤیابا کوشتنێ بكه‌ن، گه‌ریلا کەتبوونە دبن کۆنترۆلا وان دا و د کارین ب دەهان گه‌ریلایان شەهید بكه‌ن، لێ پێشمەرگه‌ی هاریكارییا مه كرن و شه‌ر نه‌كرن.
لەشکەرێ ترک ب ڤێ یه‌كێ زانین، له‌وما ب جیهازی ل گه‌ل فەرماندێ خوە ئاخفتن و گۆتنێ كو پێشمەرگەی هاریكارییا گه‌ریلایان كری یه، فەرماندێ ترک ب جیهازی گۆته لەشکەرێ خوە: «سەیێ رەش و سپی هەر سەیە و ئەو هەڤدوو نا کوژن».
وێ رۆژێ ئه‌ندامێن په‌كه‌كێ «یەکبوون گۆیی، رێزان کورتالان، رێناس ئامەد، لۆری بەشێری، هۆگر کۆتۆل» و 4 گه‌ریلایێن دی کو ناڤێن وان نەل بیرە 9 شەهید و 18 بریندار هەبوون، وەختێ شەڤ ب سەردا هاتی پەشمەرگە زڤری لێ ئۆپەراسیۆنا لەشکەرێ ترک هەتا رۆژا سیەمین ژی بەردەوام بوو.
كادره‌كێ په‌ده‌كێ فه‌رمانداره‌كێ په‌كه‌كێ ل مالا خوه ده‌رمان كر
قومتانێ په‌كه‌كێ یێ ب ناڤێ «چ.هـ.» ب برینداری خوە گه‌هانده گوندێن بانیکێ و پیربلا و ل مالا كادره‌كێ په‌ده‌كێ ما، وی کادری په‌ده‌كێ قومتانێ په‌كه‌كێ ل مالا خوە ڤەشارت و پاراست، ئه‌و ماله‌كا ب عورف و عاده‌تێن كورده‌واری بوو، ل مالا خوە ئێمن کر و برینا وی دەرمان کرن و پشتی ئۆپەراسیۆن خلاس بووی، ئەو ل هەسپەکێ سووار کرن و تەسلیمی هەڤالێن وی یێن په‌كه‌كه‌یی کرن.
پشتی کو ئۆپەراسیۆن خلاس بووی، گه‌ریلایان شەهید و بریندارێن خوە کۆم کرن و ل دۆلا مارسس ڤه‌شارتن. پشتی ده‌مه‌كی و ل گه‌ل ب دوماهی هاتنا ته‌مام یا ئۆپەراسیۆنێ ئه‌ندامێن په‌كه‌كێ د بن فه‌رماندارییا عادلێ بلکی دا كۆمبوونا خوه ئه‌نجام دان و ته‌علیمات ژ په‌كه‌كێ بۆ هاتن كو تۆل بهێته ڤه‌كرن.
4-5 رۆژ دەرباس بوون، گەریلا چاڤه‌رێبوون كا دێ تۆل ژ کیژان هێزێ یان کیژان قەرقۆلا تركا هێته ستاندن.
لێ چەند رۆژان پشتی هینگێ به‌رسڤ ژ پارتیێ ئانكو په‌كه‌كێ هات و گۆتنه مه كو نه تۆل ڤه‌كر.
ئه‌و بوو گرووپا گەلیێ حه‌فته‌نینێ، چووبوونه سەر گره‌كێ پێشمەرگەێ ل ناڤبەرا باتیفا و دەرکارێ ل وێرێ چه‌ندین پێشمەرگە شەهید کرن.
ئەڤی ده‌نگوباسی د ناڤ گەریلایان ژی دا بوو ئه‌گه‌رێ نه‌رحه‌تیێ، ژ به‌ر كو وان دزانی پێشمه‌رگه‌ی چقاس هاریكارییا وان كربوو و ئه‌و ژ مرنا موحه‌ته‌م و له‌شكه‌رێ ترك رزگار كربوون، گەریلا ب خوە ژی شاهدێ ڤێ چەندێ بوون، ئەڤه ژی خیانەت بوو، برا كوژی بوو په‌كه‌كێ كری.
ل شوونا په‌كه‌كه فه‌رمانێ بده‌ت و بچیت تۆلێ ژ ل لەشکەرێ ترکان ڤەکەت کو 9 گه‌ریلا د ئۆپه‌راسیۆنا گه‌لیێ پساخا دا شه‌هید كربوون و 18 ژی بریندار كربوون، چوون خیانه‌ت كرن و پێشمه‌رگه‌یێن كو گه‌ریلا پاراستین شه‌هید كرن.
تشتێ هه‌ری دل ب ئێش ئه‌و بوو، ئه‌ندامێ په‌كه‌كێ «چ.هـ» ئه‌وێ كو ب برینداری ل مالا كادره‌كێ په‌ده‌كێ هاتیه پاراستن و ده‌رمان كرن، بوو فه‌رماندارێ وی گرووپا گه‌ریلایان ژ بۆ لێدانا پێشمه‌رگه‌ی، وی ل ده‌ڤه‌را حه‌فته‌نینێ و چیایێ شکێڕە و هەتا ئاڤا خابوور ل پەی پێشمەرگەی د گەریا و کەمین بۆ وان ددانان.
په‌كه‌كێ ژ بلی شه‌هید كرنا پێشمه‌رگه‌ی هه‌ر د وی ده‌می دا، پلان هه‌بوون ته‌قینان ل زاخۆ ئه‌نجام بده‌ت، ژ بۆ ڤێ ژی 2 گه‌ریلا ب ناڤێن رۆژهات و سیپان ب ته‌علیماتێن «عادل بلکی» هاتنه ئامادەکرن كو یه‌ك ژ وان خەلکێ گەڤەرێ بوو و یێ دی ژی خەلکێ ئامەدێ بوو هەردو ژی بسپۆرێن بۆمبەسازکرنێ بوون.
ئەو هەردو گەریلا ل گه‌ل کەسەکی کو ئەهلێ دەڤەرێ بوو و رێبەریا وان کر ژ بۆ كو بچن ل زاخۆ تەقینەکا مەزن چێبکه‌ن، لێ پێشمەرگەی و هێزێن ئەمنی زوو پێ هەسیان و ئەو ژ دەرڤەیی باژێری بێ باندۆر کرن، هەگەر ئەو گەهشتبان هەدەفا خوە ئەو دا تەقاندنەکا پر مەزن و ب خویناوی د ناڤ باژارێ زاخۆ دا ئەنجام بدن.
کوردۆ باکووری
